حواراتفن

الحسيني الشمندي في حوار لمجلة هافن “عمرو محمود ياسين ابن الوز عوام”

الحسيني الشمندي في حوار خاص لمجلة هافن

فنان شاب مميز، تألق بسرعة الصاروخ، أصبح له متابعين تنتظر أعماله.

قدم في معهد فنون مسرحيه سنه 2003 ومحصلش نصيب، وبعدها درس في خدمه اجتماعيه إسكندرية

اشتغل على مسرح جامعه واشتغل مجاميع واخر عمل اشتغل فيه مجاميع كان فيلم السفارة في العمارة ومسلسل عبد الحميد أكاديمي.

الحسيني الشمندي
الفنان الحسيني الشمندي على المسرح

وقدم في معهد فنون مسرحيه تاني في سنه 2017 بعد ما استقر في القاهرة من سنه 2015

واشتغل في مسلسل ازي الصحة، وطاقة القدر، وسرايا حمدين، وقابيل، وسك على اخواتك، والاختيار 1، وخيانة عهد، وفيلم توك توك، خيانة عهد، وادي الجن، الحرير المخملي، وإعلانات سوشيال ميديا وافلام قصيره مشاريع تخرج معهد سينما

وكان لنا حوار شيق مع الفنان الشاب الحسيني الشمندي

حدثني عن دورك في اللي مالوش كبير؟

أجسد شخصيه الأمين احمد “امين مباحث” وهو اللي بيعمل التحريات وبيكون مع ظباط المباحث وقت القبض على حد أو فيه بلاغ ورايحين نفتش المكان.

هو دور بالنسبة ليا جديد

لأن أنا قدمت شخصيه ضابط جيش في الاختيار 1 وعملت أكثر من دور لشخصيه وكيل نيابة آخرهم في مسلسل خيانة عهد ومسلسل ولاد ناس فطول الوقت انا اللي بحقق أو بكون صاحب الامر، لكن هنا انا اللي بنفذ الأمر.

من رشحك للدور وكيف حضرت للشخصية؟

الحقيقة اللي رشحني الأستاذ محمد حجاج هو الكاستينج دايركتور للمسلسل.

أما التحضير للدور كان محتاج مني معلومات كثيرة عن طبيعة عمل امين المباحث وسألت كتير واللي ساعدني كمان للتحضير والدي كان دائمًا بيقدم لي ملاحظات عن الدور وكان مهم جدًا انني أوضح التفاصيل أن أمين المباحث لو معاه ضابط المباحث بيكون دائمًا في كتف الضابط أما لو بيبقى لوحده بيكون كأنه هو اللي متصدر المشهد وتفاصيل مسكة السلاح مختلفة عن مسكة ضابط المباحث وطريقه تعامله مع ضباط المباحث غير طريقه تعامله مع المسجلين أو المتهمين في قواضي فكل ده ممكن ميكونش ظاهر في كلام لكن ظاهر في المشاهد الصامتة.

الحسيني الشمندي .. حدثني عن مسلسل ارشيف ودورك فيه؟ ومن رشحك لأرشيف وكيف حضرت له؟

مسلسل أرشيف هو مسلسل نوعية ال 15 حلقه
ومسلسل قصير ويعرض على منصة “شوفها”
وهي منصة جديدة
والمسلسل من بطولة “حسن عيد وراندا البحيري والحسين الشمندي وأحمد عثمان وأحمد الجوهري ومحمد محسن ومحمد بريقع، وإخراج محمد عمر

وأجسد فيه شخصية رجل أعمال فاسد
ومن رشحني للدور صديقي في معهد فنون مسرحيه أحمد الجوهري
وكان فيه ٣ ممثلين مرشحين للدور ده
وبعد عمل اختبار الأداء تم الاستقرار عليا للعب الدور
وهو شخصية مركبة وصعبة وجديدة عليا جدًا
وأتمنى أكون نجحت فيها لإني تعبت في التحضير ليها
لأنه شخص له وجهة نظر في الحياة خاصة به هو وصعوبة تقديم الشخصية في طبيعتها.

من وجهة نظرك عرض العمل على منصات ممكن يقلل من نجاحه؟

العمل القوي بيفرض نفسه سواء كان على منصة أو على قنوات فضائيه
لكن الفكرة أننا لسه مش متعودين على فكره المنصات وده مع الوقت هيختلف
وأغلب الأعمال نجحت على المنصات قبل عرضها على الشاشة زي مثلا مسلسل اللعبة.

ممكن فنان يبني وممكن فنان يهدم، هل من فنان هدم الحسيني الشمندي في يوم ووجعك؟

لا هي مش فكره فنان هي الفكرة أن ممكن اختلاف الآراء يكون هدام واكيد كل ممثل بيواجه ناس مش مقتنعة بيه وبموهبته

وانا قابلت ده في بداياتي، مش من ممثلين بس من ناس جوه دائرة الفن عمومًا
وانا عمومًا باخد أي رأي سلبي باني احوله أنه يكون سبب في إني اشتغل على نفسي أكتر وأثبت العكس لكل حد شايفني امكانياتي قليله.

بس اكتر حاجه بتضايقني عمومًا هي فكره التعامل مع الممثل اللي جاي يصور كام مشهد
مش بيكون فيه اهتمام بيه زي النجم بطل العمل
بس الحمد لله انا بحكم خبرتي واني بمثل من ٢٠٠٣ واشتغلت مسرح كتير وحتى في البدايات اشتغلت مجاميع وكومبارس فبقت عندي من الخبرة ما يكفي للتعامل مع مثل هذه المواقف.

ابن الوز عوام من وجهة نظرك من ابن الوز هذه الفترة؟

انا الحقيقة لسه متابعتش كل أعمال رمضان عشان أقدر احكم
لكن ممكن اقول وانا واثق بعد ما شوفت أكتر من عمل له هو السيناريست والمؤلف عمرو محمود ياسين موهوب جدًا وشاطر جدًا وقلمه عبقري.

الحسيني الشمندي .. أوصف لي مسلسل الطاووس في جملة؟

معاناة المرأة المصرية كل يوم

حدثني عن رسالتك من خلال اعمالك في رمضان هذا العام

الفن رسالة، وأهم حاجه أنا عملتها رمضان ده فيه رسالة كان مشهدي في مسلسل الطاووس
وهو أننا نوصل فكرة أن المصريين عمرهم ما تعاملوا مع بعض من وجهة نظر انت ديانتك ايه
لا احنا بنقول للراجل الكبير أو الست الكبيرة يا حج ويا حجه واحنا منعرفش ايه ديانتهم والناس بتحب بعض مش عشان ديانتهم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!