نورا عبد الرحمن هي ممثلة مصرية شاركت في السباق الرمضاني من خلال مسلسل القاهرة كابول، هجمة مرتدة، بين السما والأرض.
وكشفت لـ مجلة هافن عن دورها في مسلسل “القاهرة كابول “و”هجمة مرتدة ” وعن كواليس العمل وإلى نص الحوار.
من رشحك للدور لمسلسل هجمة مرتدة؟
عن طريق اوديشن في مكتب تركواز لأحمد تمام وعملت اوديشن مع أستاذ عمرو موسي مساعد أول المخرج أحمد علاء و ده كان أول اوديشن اعمله واتقبلت الحمد لله.
كيف كانت استعدادك للشخصية؟
انا حبيت الشخصية جدًا وهي قريبه مني وفرحت إني بدايتي هتكون قدام المخرج أحمد علاء وقدام أستاذ هشام سليم انا بحبه جدًا، ولما خدت ورشه واتطلب مني اعمل ٣ شخصيات من اختياري عملت أول واحده مريضه كانسر وقريت عنه كتير عشان اعمله والكلام ده كان من ٣ سنين، فرحت اوي إني لما جالي أول دور كان عن مريضه كانسر، فكنت حاسه إني مذاكرالها من زمان، وشغلي كان على علاقتي ب بابا اللي هو أستاذ هشام سليم أكثر من شغلي كمريضه، كنت حابه علاقتنا ببعض هي اللي تكون باينه.
كيف كانت كواليس العمل؟
كل حاجه كان ليها حلاوتها، كل مخرج كان غير الثاني ومدرسه تانيه فأني بدايتي تكون مع أستاذ أحمد علاء وأستاذ حسام علي وأستاذ ماندو العدل وأستاذ حماقي فرقت معايا جدًا اتبسط في الشغل معاهم جدًا، وأستاذ هشام سليم في هجمه مرتدة حسيته بابايا بجد وأستاذه أميره العايدي شجعتني جدًا وحسيت انها صاحبتي ومامتي، مش لاقيه حاجه اقولها غير إني استمتعت بكل ايام تصويري في كل مسلسل أكثر من الثاني.
ما أكثر شيء جذبك للدور في مسلسل هجمة مرتدة؟
علاقتي بأستاذ هشام سليم حبيت علاقة ساره وحبها لأبوها اللي وجوده بيقويها
وطبعًا مسلسل قوي ومخرج قوي جدًا
فأكثر حاجه تفرحني إني اشارك في المسلسل ده
وإني اشتغل مع أستاذ أحمد علاء وقدام الأستاذ هشام سليم وكنت متشجعه جدًا بسبب كده.
نورا عبد الرحمن .. هل تابعتي ردود أفعال الجمهور على شخصيتك في مسلسل هجمة مرتدة والقاهرة كابول؟
أكيد كلها حلوه جدًا
واتبسط إني أكثر تعليق جالي إني الناس حاسه إني قريبه منهم او حد من اصدقائهم، ده أكثر تعليق فرحني.
من رشحك للدور لمسلسل القاهرة كابول؟
احمد تمام (تركواز) هو اللي رشحني واتبسط من ثقته فيا وتشجيعه الكبير ليا ولموافقه المخرج الجميل أستاذ حسام علي فرحتني.
هل من شخصيات ترغبي في تقديمها قريبًا؟
أكثر شخصيه بتمني أقدمها شخصيه فيها شر يعني عصبيه أو حقوده أو شقيه أو من بيئة متوسطه
لأني دي حاجات بحب أعملها جدًا وحساه تحدي إني اوصل ده
برغم إني شكلي غير كده فحابه أوي ادخل التحدي ده واعمل حاجه عكس شكلي وشخصيتي
لان بالنسبالي التمثيل إني أعمل حاجه عكس شكلي وشخصيتي واقتنع بيها وانا بعملها وأحس إني الناس صدقتني فيها.
