شيماء عبيد في حوار خاص مع مجلة هافن
✍️ ميرنا جمال
شاركت الفنانة شيماء عبيد في دراما رمضان 2021، بمسلسل كوفيد 25، من خلال شخصية “هايدي” حيث ظهرت بدور شخصية أنانية ممزوجة بالكوميديا وتحب الميكب والأشياء الدنيوية وبسبب أداء الفنانة شيماء الرائع نجحت شخصية هايدي التي جسدتها في الموسم الرمضاني هذا العام وأشاد بها الجمهور وتفاعل معها
وكان لمجلة هاڤن حوار خاص مع النجمة شيماء عبيد كشفت لنا فيه كواليس الشخصية والمسلسل
حدثينا عن تجربتك في مسلسل كوفيد 25؟
تجربتي بالنسبة لي كانت خطوة مهمة جدًا في حياتي لأن استاذ يوسف الشريف اولًا من نجوم الوطن العربي المعروف بتقديم أشياء مختلفة ودائمًا كنت اتمنى أن يجمعني بينه وبيني عمل وبالطبع استاذه إنجي ايضًا أحب دائمًا قراءة الكتب الخاصة بها، وأكون سعيدة بأعمالها لأنها برة الصندوق دائمًا، “ف الحمد لله دي كانت خطوة مهمة اوي ان انا ابقي جزء من عمل تحت قيادة استاذ أحمد نادر جلال مخرج من المخرجين المعدودين في وطننا العربي”.
ماذا أضافت التجربة لشيماء عبيد؟
أضافت لـ cv بتاعي إني اشتغلت مع التلاته دول ف دي حاجه اولا كانت مهمه بالنسبة لي تاني حاجه المسلسل بجد نقلني نقلة نوعية كبيرة جدا الحمد لله الدور ناجح جدا جدا جدا مع الناس والشخصية قصرت مع الناس جدا وحبوها وكرهوها وعيطوا معاها وكانت الحمد لله اعتقد انها هتبقى فتحة خير عليا ان شاء الله.
هل كنتي خائفة من فكرة المسلسل؟
أنا أحب أفلام الرعب و من اكثر الافلام او المسلسلات التي أحب أن أشاهدها على نيتفلكس وقبله الافلام العادية وكنت أميل للرعب يجذبني عمومًا وكنت اتمنى طوال الوقت ” ان احنا ف مصر نعمل حاجه كدة بس للأسف النوعية اللي كانت بتتعمل حاسة إنها مش على المستوى المطلوب” ولا تواكب السينما العالمية بالخارج ، فعندما قامت إنجي بكتابة الورق وانا علمت بالفكرة تحمست جدا لإني كنت اعلم ” انها بتكتب حاجه هتبقي كويسة اوي وف نفس الوقت لما لاقيت استاذ أحمد نادر جلال هو المخرج قولت اكيد العمل هيطلع هايل ف كنت متشوقة جدا اني اعمل حاجه كدة بما ان انا بحب افلام الرعب”.
شيماء عبيد .. من رشحك لدور هايدي؟
الذي رشحني استاذ احمد نادر جلال استاذ يوسف الشريف وانجي قاموا بعرض عليه ال cv خاصتي وهو الذي اختارني لدور هايدي تحديدًا.
ما الذي جذبك لدور “هايدي”؟
عند قراءتي للورق وجدته دور مختلف عن كل الشخصيات شعرت انه الجميع جميعهم في اتجاه وشخصية هايدي في اتجاه آخر دائمًا الشخصية المختلفة ف أي عمل تظهر حتى وان كان الدور ليس كبيرًا” بس لو اتعملت كويس بتعلم من الناس “.
ما الصعوبات التي واجهتك مع الشخصية؟
الشخصية لم تكن كوميدية من البداية أنا وضعت بها طابع الكوميدي حتي لا تكن مستفزة فقط “و عشان تروح للست المستفزة والوصولية والسطحية بس تبقي باربي اللي هي معناها انها لا تفكر ف أي شيء لدرجة انها تافهة حاولت اتفه من الشخصية عشان تجيب كوميدي شوية مع الناس والحمد لله ربنا وفقني فيها و اكتر حاجه كانت مخوفاني في شخصية هايدي لما هتسيب الشخصية الكوميدي اللي كانت عملاها وبعدين لما هتهرب النقلة لما هربت وعرفت ان ابني مات ف دي كانت اكتر حاجه مخوفاني جدا الناس هتتقبلها ازاي وبصراحة هي دي اجهدتني نفسيا شوية وبصراحه اكتر من احسن المشاهد اللي عملتها والناس مع انهم كانوا بيتمنولي ان زومبي يأكلني لكن بكوا معي.
شخصيه شيماء عبيد هل تشبه شخصية هايدي من حيث عدم اهتمامها او خوفها من الفيروسات؟
نعم شخصية هايدي قريبة مني في هذا الموقف ” انا من الناس اللي بطهر وبعقم طول الوقت بس مش الناس الموسوسه لا انا بعمل اللي عليا والباقي بتاع ربنا واكيد أكون مؤمنة ان اللي ربنا بيكتبوا بيكون” مهما اخذت احتياطاتي ويجب ايضًا اخذ الاحتياطات، ولكن شخصية هايدي عكسي تمامًا في ” إني مش الشخصية السطحية دي خالص و مش التفاهة دي خالص خالص ومش من هواة الميكاب والبراندات و ده اخر همي بحب السفر اه لكن المظاهر الدنيوية دي مش بهتم بيها انا حد مش بيحط ميكاب معظم وقته غير ف الشغل او لو مقابلة او فرح غير كدة مش بحط حتى مش بتلاقي حاجات انثوية ف شنطتي يعني تلاقي قلم لكن مفيش قلم روج مفيش باودر مفيش مراية مفيش الحاجات دي مفيش مبرد مفيش مفيش مفيش فهي شخصية مختلفة عني تمامًا في النقطة دي “.
ما هي الرسالة من شخصية هايدي؟
أن المظاهر والحياة الدنيوية ليست هي الأساس لأن أحياناً ” الدنيا مش بتكون مستاهلة الدنيا ممكن تروح في ثانيه في حاجات اهم” مثل الاجتماعيات التقارب بين الناس اللي بتحبيهم ان انتي تضحي عشانهم وتلاقي حد يضحي عشانك وانتي تضحي عشانه كمان في فكرة الخوف لما بيسيطر علي بني ادم كنت بقول ان هو محدش بيقدر ابدا وقت الخوف او قرب الموت يقدر يحكم هو هيعمل ايه فهي الشخصية هربت محدش فاهم هي هربت ليه جوزها شايفها ان هي هربت عشان عينها راحت علي فلوس الملياردير لكن هي بتقوله لا انا محبتش حد غيرك بس لاقيت الناس كلها بتهرب ف هربت خافت على حياتها فيجب أن لا يحكم شخص على آخر إلا عندما يكون في مكانه أو نفس موقفه.
كيف وجدتي ردود أفعال الجمهور على الشخصية على السوشيال ميديا؟
في البداية أنا بشكر ربنا جدا جدا جدا لأن ردود الافعال هي التي جعلتني أشعر بنجاح الشخصية ” قد ايه الناس تفاعلت معايا لما طلعت لايف ولما بقيت احط بوستات والإنستغرام بتاعي عدد الفولورز زاد وكل يوم كل يوم كل يوم الناس بتبعتلي مسدجات ع الخاص كتير جدا جدا كلها ضحك وهزار وانتي مستفزة بس بنحبك احنا كنا عايزين هايدي تتاكل بس زعلنا عليها لما ماتت وليه موتي
ما أكثر رد كان غريب بالنسبة إليكي؟
توجد فتاة كلمتني كانت تبكي أكثر شخص أثر فيا “كلمتني ولاقتها حطالي مسدج بتقولي انتي موتي ومسجلالي فويس وبتقولي انا مش عايزة أكمل مش عايزة أكمل قوليلي إنك مموتيش” هذا أكثر شيء جعلني أبكي، وأيضًا ممثل جميل وشاطر اوي واعتبره الجيل وهو ميعرفنيش ولا انا اعرفه لاقيته بيقولي انتي موهوبة اوي وشاطرة اوي وهتبقي من النجوم المتميزين ف المستقبل القريب اوي.
شيماء عبيد .. كيف كانت كواليس العمل؟
أنا عملت اعمال كثيرة من قبل “ذهاب عودة، انا شهيرة وانا الخائن، الأخ الكبير، طلقتك نفسي” مع استاذ محمد النقلي
و”إلا أنا” مع “درة” قبل كوفيد، الناس كلها كويسة بس أنا مشوفتش كواليس حلوة اوي كدة
كلهم قاعدين مع بعض بياكلوا وبيشربوا وبيضحكوا ف غرف بعضهم
ومش بنعمل حاجه غير ان احنا بنهزر و بنعدي الوقت وبنبقي عايزين نيجي طول اليوم عشان نشوف بعض تاني
كلنا طالعين من المسلسل بلا استثناء بنقول احنا ازاي مش هنشوف بعض تاني هو احنا كدة خلصنا
طبعا مش هقدر اتكلم على كل الكرو كلهم مالوش حل، البنات كلهم حلوين اوي، وبيحبوا بعض
راندا البحيري كانت سبورت اوي وطيبة اوي وحنينة وانا بحبها اوي وبقينا صحاب اوي اوي اوي
طبعا الجميلة ديانا هشام وهاجر الشرنوبي وسلمي الديب و رحاب عرفة
وايتن عامر طبعا هي طبعا الستار بتاعتنا احنا كلنا لسة في اول طريقنا وفي ناس قريبة من ايتن زي راندا
وايتن كمان لم تتركنا وظلت تجلس معنا طوال الوقت وبنضحك وبنهزر ونرقص ونعمل كل حاجه مع بعض
مكانش في حد قافل على نفسه اوضته خالص
بالعكس كنا نتجمع في غرفة حد كل يوم وناكل مع بعض وكنا بنفطر ونتسحر معًا.
ماذا عن تجربتك مع إسلام جمال؟
اسلام جمال شخص جميل جدًا وطيب جدًا وخلوق جدًا.
ماذا عن تجربتك مع يوسف الشريف؟
استاذ يوسف الشريف شخص ليس له مثال أنا عمري ما شوفت كدة وانا متأكدة اني مش هلاقي حد كدة تاني
يعني انسان خلوق وبيحب الناس وبيحب الممثليين بتوعه اوي
كل يوم بيدخل علينا اللوكيشن واحد واحد يسألنا عاملين ايه؟
ولو مش واخدة بالي يقولي “ازيك يا شيماء عاملة ايه انتي كويسة؟”.
لما وقعت ف المشهد بتاعي بتاع الزومبي انا وقعت ع الحديد واتخبط جامد ف جسمي وقمت بإعادتها مرتين
فكان كل همه أول لما دخل المكان انا، لأنه كان برة
جري عليا هو وأحمد نادر جلال” انتي كويسة انتي كويسة” قولتله انا كويسة متتخضش
هو قد كدة بيحافظ ع الناس اللي معاه بيحب كل الناس اللي معاه
وطيب وبيديكي احساس بالطمأنينة وان انتي مش خايفه
وطول الوقت الـ feedback منه لما تعملي مشهد يقولك حلو اوي برافو عليكي طول الوقت بيشجعك.
هل توجد أعمال قادمة لـ شيماء عبيد؟
لدي مسلسل قمت بتصوير جزء منه والجزء الآخر بعد رمضان اسمه “الحرير المخملي”
60 حلقه سيعرض في شهر 7، مع النجم مصطفي فهمي ونخبة من الفنانيين إخراج أحمد حسن انتاج اسلام مرسي.
