ياسمين سمير عن مسرحية “كلها غلط” في حوار خاص لمجلة هافن
ياسمين سمير فنانة شابة خطفت قلب الجمهور إليها منذ ظهورها الأول في مسلسل “أزمة سكر” بطولة الفنان “أحمد عيد”، ثم قدمت العديد من الأعمال التلفزيونية ومنها: “أخت تريز، ابن أصول، بفعل فاعل، إمبراطورية مين، الداعية”.
وكانت أول تجربة سينمائية لها من خلال مشاركتها في فيلم “تؤام روحي” بطولة الفنان “حسن الرداد”، كما أنها عضوة في فرقة الفنان “أشرف عبد الباقي”، وقدمت معه ست كوم “اللوكاندة”، بالإضافة إلى مسرحية “كلها غلط”.
وكان لمجلة هافن حوار خاص مع الفنانة الشابة “ياسمين سمير” تكشف فيه عن كواليس مسرحية “كلها غلط”، وعن كواليس العمل مع الفنان “أشرف عبد الباقي”، وعن أعمالها القادمة.
حدثينا عن مسرحية “كلها غلط” وعن دورك في المسرحية؟
مسرحية “كلها غلط” بدأنا فيها من سنتين تقريباً أو ثلاثة، وكنت بعمل دور تاني خالص غير الدور اللي بقدمه دلوقتي، كان دور “فيديت” النجمة بتاعة العرض.
حاليًا بقدم دور “الدوبليره بتاعة النجمة”، هو دور فيه كوميديا أكتر وفيه لعب أكتر مع “أستاذ أشرف عبد الباقي”، والشغل مع أستاذ أشرف بيكون حاجة ممتعة جدًا، فدا اللي محببني في الدور التاني أكتر، وهو دور مختلف تمامًا عني أي شخصية أنا قدمتها قبل كدا.
ياسمين سمير عن مسرحية “كلها غلط” وكواليس العمل مع الفنان “أشرف عبد الباقي”.
جميلة جدًا، دائمًا أي شغل مع أستاذ “أشرف عبد الباقي” بيبقى شغل ممتع، لأن أحنا مش بنبقى رايحين الشغل أحنا بنبقى رايحين البيت، رايحين لبابا، بابا بقى في كل حاجة، في الأخلاق في الاحترام في القاعدة بيفضل يحكيلنا عن حاجات في حياته، وعن مواقف نتعلم منها، يسألنا عن حاجات في حياتنا، أبونا بمعنى الكلمة.
استاذ أشرف عامل ما بينا من زمان حتة الروح والفرقة الواحدة والأخوات والناس يبقى قلبها على قلب بعض، ودا موجود فعلًا في الفرقة بتاعتنا بقاله فترة كبيرة.
كيف تم ترشيحك لمسرحية “كلها غلط”؟
تم ترشيحي عن طريق دكتوري في المعهد دكتور “محمود سامي”، هو مهندس الديكور الخاص “بمسرح مصر” وبمسرحية “كلها غلط”، ورشحني لأستاذ أشرف وعملي اختبار وبعدها تم اختياري، وانضميت لفرقة استاذ أشرف، وكان أول عمل يجمعني بيه كانت مسرحية “كلها غلط”.
حدثينا عن إحساسك عند تحية الجمهور بعد إنتهاء العرض؟
إحساس مكافأة، الجمهور بيديك بونبوناية اللي هو برافو عليك أنت تعبت، أنت شقيت، أنت عملت مجهود، ودي بتبقى أحلى حاجة، والواحد بيمثل على المسرح علشان تحية الجمهور.
حدثينا عن دورك في مسلسل “إلا أنا”، وكيف تم ترشيحك للدور؟
الدور كان بالنسبة لي مختلف المسلسل عبارة عن 10 حلقات بطولة النجمة “حنان مطاوع”
وكنت بقدم دور “نهى” وكانت مخطوبة وخطيبها مسافر ومامتها بتتوفى ومش بتلاقيه جنبها بطبيعية سفره
فلما بيرجع إجازة وبيكون مشتاق ليها، فهي بترفض أنها تكمل معاه لأنه ماكنش معاها في أكتر وقت هي محتاجه فيه
وبعد كدا هو بيحب حنان مطاوع وفي الوقت دا هي بتفكر أنها ترجعله علشان تصالحه بس هو بيرفض
والدور دا بالنسبة لي كان دور مهم لأنه عمل ردود أفعال قوية جدًا سواء على السوشيال ميديا أو في الشارع
لأن ناس كتير أوي عندها نفس المشكلة دي، سواء ستات أو رجالة.
تم ترشيحي للدور عن طريق المخرج “أحمد حسن”، والمنتج الفني أستاذ “أحمد عبد العزيز”.
كيف كانت كواليس مسلسل “إلا أنا”؟
كانت جميلة جدًا لأن أغلبهم صحابي وأغلب الموجودين
كمان كانوا كلهم ممثلين شباب في سني، فالكواليس كانت حلوة أوي وكلها مرحة.
وكمان النجمة حنان مطاوع كانت إنسانة جميلة أوي
وكانت سبورت جامد اوي في اللوكيشن وبتشجع دائمًا الموهوب، ولما بتلاقي حد موهوب بتوقف جنبه جدًا.
أحمد حسن المخرج كان هايل في توجيهاته وكواليسه كمان هادية ومريحة للممثل
يعني بقدر أن أنا أحس وأبدع معاها، ودا كان تاني أو تالت تعاون ما بينا واستمتعت بيهم جدًا.
ماذا عن دورك فيلم “تؤام روحي”؟
هو أول تجربة سينمائية ليا، كنت خايفة منها جدًا وفي نفس الوقت كنت مستمتعة بيها جدًا جدًا
لأني كنت أول مرة أقف قدام كاميرا سينما وفي فيلم مهم جدًا
والحمد لله أول فيلم أشارك فيه حقق نجاح حلو أوي سواء في مصر أو في الوطن العربي.
وآراء الناس كانت حلوة جدًا وفي ناس كتير كلمتني عن دوري
وكنت بقدم دور صديقة الفنان “حسن الرداد” في الشغل وأن هو بيمر بأزمة أن مراته بتموت
وأنا بحاول أقف جنبه وبحاول أن أنا أجبله واحدة صحبتي أعرفه عليها علشان ينسى موضوع مراته
فالدور كان لذيذ وطبعًا جنب نجم كبير زي “حسن الرداد”، نجم قد أي محترم وقد أي بيقدر خارجين المعهد
وبيقدر الممثلين اللي جايين من عند استاذ “أشرف عبد الباقي”،
وأنا كعضوة في فرقة “أستاذ أشرف” دا بيقدمني بشكل حلو جدًا للوسط الفني ولنجوم الوسط الفني
فكان بيتعامل معايا بمنتهى اللطف والمشاهد معاه كانت جميلة وروحها حلوة جدًا.
إلى جانب الفن، ما هي هوايتك المفضلة؟
التمثيل بالنسبة لي رقم 1، بحب الرياضة وبحب أروح الجيم ومواظبة على دا دائمًا في أوقات فراغي.
ما هي أحلامك القادمة؟
بتمنى أن أنا أحقق نفسي أكتر في التمثيل، بتمنى أقدم أعمال مهمة وتأثر في الناس أكتر
أتمنى أن الشغل المعروض عليا يكون في حاجات تبرز موهبتي
وتبقى متنوعة من حيث أن الناس تشوفني في كذا لون مش بس كفيديت وأقدم شخصيات مختلفة.
هل تحبي أن توجهي رسالة إلى شخصًا ما؟
أحب أوجه رسالة للنجم “أشرف عبد الباقي”، أقوله شكرًا على كل حاجة عملها وبيعملها علشانا
شكرًا على أنه أداني فرصة مهمة وكبيرة في ست كوم “اللوكاندة”
وشكرًا على أنه أداني فرصة كبيرة في مسرحية “كلها غلط”، أن أنا أبقى بطلة قدامه
بشكره على كل حاجه حلوة عملها لي وعلى السند والدعم اللي هو مقدمه لي
حقيقي ياريت يبقى منه في الوسط الفن يعني اثنين ثلاثة كان الوسط أختلف كثير.
ماذا عن أعمالك القادمة؟
إن شاء الله في مسلسل قريبًا.
