تألق الفنان الشاب “جورج أشرف” من خلال ظهوره المميز أثناء مشاركته في مسرحية “أبو العربي”، بطولة الفنان “هاني رمزي“، والفنانة “داليا البحيري”.
وكان للفنان “جورج أشرف” حوار خاص مع مجلة هافن يكشف فيه تفاصيل مشاركته في مسرحية “أبو العربي” وعن كواليس العرض.
حدثنا عن مسرحية “أبو العربي” وعن دورك في المسرحية؟
مسرحية “أبو العربي” بطولة “الفنان هاني رمزي، داليا البحيري، ليلى عز العرب، أحمد فتحي، محمد جمعة، وإخراج وإنتاج أستاذ تامر كرم، عرض لايت كوميدي جميل جدًا جدًا وأنا يشرفني أن أنا أكون مشارك حتى ولو بدور بسيط جدًا في العرض.
دوري المفروض أن أنا “فرارجي” وبتناقش من خلال الأستاذة “داليا البحيري” فكرة التحرش أو الاعتداء على الأنثى ولكن في سياق كوميدي لطيف جدًا.
حدثنا عن كواليس العرض؟
كواليس العرض كانت جميلة جدًا جدًا، تخيلي بقى عرض كوميدي في نجوم الكوميديا في مصر وإنتي موجودة في وسطهم فالموضوع كان مبهج جدًا جدًا، الجو مليان محبة فعلًا، وضحك كنا بنضحك من قلبنا وبنساعد بعض بكل الطرق.
كيف تم ترشيحك لمسرحية “أبو العربي”؟
تم ترشيحي للعرض “أبو العربي” عن طريق أستاذ تامر كرم كلمني لأن أحنا أصلًا في الفرقة بتاعته، فرقة “كوميدي كلاب”، ولسه العروض بتاعتنا هتم إن شاء الله قريب جدًا.
حدثنا عن احساسك عند تحية الجمهور بعد انتهاء العرض؟
تحية الجمهور بعد العرض بتبقي إحساس لا يوصف، تخيلي تبقي في عمل ناجح وقوي، تحت نجم كبير سوبر ستار ومخرج كبير، لكي أن تتخيلي الطاقة اللي بتاخديها من الجمهور فبنشكر ربنا.
حدثنا عن كواليس العمل مع الفنان “هاني رمزي”؟
أستاذ هاني رمزي الكواليس بتاعته جميلة جدًا إنسان متواضع وبسيط وبشوش وعلى طول بيساعد في شغله بيدي تعليمات وبيساعد جدًا في التفاصيل الصغيرة، يعني لو شاف حاجة وحاسس أنها محتاجة تتظبط بيقول لنا لأ يا جماعة ظبطوها، إنسان جميل بكل المقاييس يعني فنان حقيقي.
جورج أشرف .. حدثنا عن تجربته تعاونك مع المخرج “تامر كرم”؟
أستاذ تامر كرم ده أول تعاون بيني وما بينه صريح يطلع مشروع قدام الجمهور
وفي بروجكت تاني ما بينا اسمه “كوميدي كلاب”
عبارة عن فرقة من الشباب عاملين برده مسرحيات كوميدية بنحضر لها بإذن الله وقريب جدًا هتعرض بإذن الله
أستاذ تامر بجد من أفضل المخرجين اللي أتعاملت معاهم وإنسان حقيقي جدًا جدًا ومتعاون لأبعد الحدود.
ماذا عن تجربتك في التمثيل أمام الفنان “جمال سليمان”؟
تجربتي أمام أستاذ “جمال سليمان” في التمثيل حاجة رائعة، رائعة جدًا
هو دكتور في التمثيل وكان بيديني ملاحظات كتير
وبيساعدني كمان في الدور
لما كان بيشوف أن أنا مثلًا محتاج إني أثبت الأداء أو أن الأداء بيخرج عن سياق الشغل أو سياق المسلسل
كان بيديني كده زي إنذار أو توجيه لشغلي بشكل يكون أفضل
بحيث أن أنا أكون طالع بأفضل شكل عندي ومناسب كمان للعمل ككل.
هل هناك دور معين تتمنى تجسيده؟
مفيش دور معين، أنا كممثل بتمنى أعمل كل الأدوار مش دور معين
وربنا يقدرنا ونقدر أن أحنا نبدع ونطلع أحلى حاجة عندنا في أي كاراكتر بنقدمه.
أيهما أقرب إلى قلبك “جورج أشرف” الدراما أم المسرح ولماذا؟
صدقيني دا ليه طعم ودا ليه طعم، بس أنا بالنسبة لي المسرح بيبقى أكتر
لأن المسرح هو أولًا أحنا طالعين منه وهو اللي ربانه ووصلنا منه لأي نجاح تاني
وطول ما انتي بتشتغلي فيه بتاخدي “الفيد باك” بتاع شغلك في وقتها
لكن الدراما بتبقى بعد كده، الدراما مختلفة شوية بس أنا الأقرب لقلبي المسرح.
