نجاة المهدي مطربة مصرية شابة، تتميز بموهبتها وصوتها الساحر، تدربت على أصول الغناء في دار الأوبرا المصرية مع المايسترو “سليم سحاب”.
خطفت أنظار الجمهور إليها من خلال مشاركتها في مسابقة “Miss elegant“، وحصولها على لقب الوصيفة الأولى لعام 2019م.
قدمت العديد من أغاني التي نالت إعجاب الجمهور وحققت نجاحًا منها “روحي فيك”.
وكان لمجلة هافن مع المطربة “نجاة المهدي” الحوار التالي.
كيف جاءت بدايتك في مجال الغناء؟
أهلي وصحابي صوتي نال إعجابهم ولاحظوا دا وأنا كمان حسيت دا لما كنت بغني لوحدي.
ما هي أبرز التحديات التي واجهتك في بدايتك الفنية وكيف تغلبتِ عليها؟
أنا كنت “كابتن فريق أول” في “كرة السلة”، والموضوع بالنسبة لي كان مسئولية كبيرة عليا، وأنا لازم لما أكون في حاجة أكون قدها فكملت في الغنا بس ماسبتش الرياضة.
من أكثر مشجع لكِ؟
أهلي، صحابي، جمهوري.
حدثينا عن أغنية “روحي فيك”؟
أغنية “روحي فيك” عزيزة على قلبي أوي، وكان تفاعل ورد فعل الناس عليها لطيف في وقتها، والأغنية “روحي فيك” كانت إهداء من الموزع “عدنان الشامي”، والأغنية غالية عندي جدًا.
ماذا عن تجربتك الأولى مع المايسترو “سليم سحاب”؟
اشتركت في الأوبرا من وأنا صغيرة، من يوم ما اكتشفت أن في صوت حلو، والناس بتقولي كدا وفي الإذاعة وصحابي، وفي حفلات المدرسة، وطبعًا كنت عايزة أبقى أكاديمية، وعايزة أبقى شاطرة، وأحسن من موهبتي وأشتغل عليها، فروحت الأوبرا للمايسترو “سليم سحاب”، وأخدت كورسات كتيرة مع المايسترو “سليم سحاب” في الأوبرا.
ماذا عن تجربة “Miss elegant” بالنسبة لكِ؟
كانت بالنسبة لي خطوة كويسة، اشتركت فيها من باب الانتشار، من باب العلاقات الكويسة، وإني انتشر اكتر في كل مكان، وأنا الحمد لله عندي مقومات إني أكون موديل بس دا مش هدفي خالص، والموديل كفاشون حاجة وكموديل إعلانات حاجة تانية، وأكيد لو جالي فرصة إعلان كويسة أكيد هكون مقبلة ومرحبة جدًا بالفكرة، وبالفعل جالي كذا فكرة بس مش مناسبين بالنسبة لي.
المسابقة كانت حلوة جدًا بالنسبة لي، وصلت عند نقطة معينة وقولت لا أنا بالنسبة لي انا كدا اكتفيت من المسابقة، وأخدت الوصيفة الأولى ” Miss elegant congeniality” على مستوى مصر، ومعنديش أي اعتراض إني أشارك في أي مسابقات تانية ليها علاقة بالأناقة أو الجمال، دي بتبقى حاجات مفيدة بالنسبة لي، بتدعمني وبتساعدني في مجالي الأساسي اللي هو الغنا.
حدثينا عن الملحن الكبير “حلمي بكر”؟
الموسيقار “حلمي بكر”، أنا بحبه جدًا جدًا، شخص محترم جدًا، وبيحب المجال أوي أوي، بيعشق المزيكا وبتجري في دمه، فعشان كدا دايمًا دمه حامي من ناحية أنه مابيقبلش يسمع أي حاجة غير اللي أتعود عليها وغير اللي دَرسها وغير اللي درِسها وغير اللي اتربى عليها.
وأنا شاركت في مسابقة “أبداع” في الجامعة، وكنت تعبانة جدًا جدًا، وكان ضغط بروفات كتير، وكان عندي برد، وكنت صولو أساسي وكان صعب إني أتبدل، وكانت فرصة بالنسبة لي مكانش ينفع أتنازل عنها، فكان مساندني جدًا، وقال كلام في حقي من غير ما يعرفني خالص، أن أنا صوتي كويس جدًا الحمد لله.
وبعدها شاكرت معاه في برنامج في التلفزيون المصري، والحمد لله شهادته دايمًا في المسابقة أو في برامج كلامه ليا بيكون شهادة أعتز بيها، وأنا بحبه جدًا وربنا يديله الصحة يارب.
هل ما زالتِ تعانين من رهبة الجمهور والمسرح؟
لا خالص بالعكس، من أحلى لحظات حياتي وأنا على المسرح، وأنا قدام الميكروفون وقدامي الجمهور، بتبقى أحلى لحظة بالنسبة لي، ولو يعرفوني كويس ببقى متطمنة جدًا، لو مايعرفونيش طبيعي بكون قلقانة القلق الطبيعي وليس القلق المرضي خالص، بكون مطمنة وبكون مبسوطة وعارفة إني الحمد لله عندي موهبة وعارفة أن صوتي هيعجبهم، والحمد لله دايمًا ربنا مش بيخذلني، ودايمًا بكون عند حسن ظن الناس بيا، ودي نعمة كبيرة بحمد ربنا عليها الحمد لله.
من مطربتك المفضلة؟
أمال ماهر بالنسبة لي المطربة المثالية وقدوتي، وبحبها جدًا جدًا، وبدعي ربنا يفك كربها ويطلعها من الأزمة اللي فيها على ألف خير، لأن دا آثر جدًا على نفسيتي.
من الفنانة التي تتمني مشاركتها في عمل ديو غنائي؟
حلم حياتي أشارك مع “آمال ماهر”.
بجانب الغناء ما هي هوايتك المفضلة؟
هوايتي المفضلة هي “كرة السلة”، أنا بعشق الرياضة من صغري، بلعب “كرة السلة” من وأنا عندي 9 سنين ومازلت.
هل تتابعين ردود الأفعال عبر السوشيال ميديا؟
آه طبعًا، دا أساسي عندي أتابعهم، وأتواصل معاهم دايمًا في كل جديد، وهما الأساس، وهما كلامهم اللي بيشجعني وبيخليني أكمل وقت ما بكون محبطة، وعندي طاقة سلبية زي أي حد عنده طاقة سلبية في الدنيا، وعنده إحباط وهبوط نفسي، هما اللي بيدعموني دايمًا بكلامهم وتشجيعهم، ودا عندي أساسي، فطبعًا لازم أتابع ردود أفعالهم.
هل تفكري في خوض تجربة التمثيل؟
ممكن إن شاء الله لما ربنا يريد وأوصل لحلمي في الغنا، لو التمثيل أو الدور دا هيزود ويكبر من اسمي ومن شكلي، طبعًا مش هفكر دقيقة إني أرفض.
من من الشعراء أو الملحنين تتمني العمل معهم؟
الأستاذ أيمن بهجت قمر، أمير طعيمة، عمر مصطفى، عزيز الشافعي، وليد سعد، وغيرهم نجوم كتير.
ما هي أحلامك القادمة؟
حلم حياتي إني أكون من أهم مطربات بلدي مصر، ودايمًا أكون فخر لبلدي وللوطن العربي كله، ويارب للعالم كله كمان.
ماذا عن مشاريعك القادمة؟
إن شاء الله مضيت عقد لأغنيتي الجديدة وبنحضر لمفاجأة إن شاء الله تنال إعجاب الجمهور.
