عربيتي كانت بتتحول لغرفة متنقلة ايام الدراسة في المعهد
اتشرفت بالعمل مع يوسف الشريف
فنانة متميزة ومتلونة في أدوارها عملت دور الابنة والزوجة والأم
صنعت لها اسماً واستطاعت الوصول للجمهور ببساطتها وعفويتها، شاركت في أعمال كثيرة من أبرزها كيد النسا، الزوجة الرابعة، الطوفان واخر أعمالها هو مشاركتها الفعالة في مسلسل كوفيد 25 أمام يوسف الشريف حيث لعبت دور مختلف وقوي
نجمة حوار اليوم هي الفنانة المتألقة أيتن عامر
وهذا ما نص عليه الحوار: –
في بداية حوارنا.. ممكن تحدثينا عن كواليس مشاركتك بمسلسل كوفيد 25 رمضان 2021؟
انا لقيتهم بيكلموني عشان اشترك في مسلسل covid 25
وانجي علاء شرحتلي فكرة المسلسل وشرحتلي الدور اتحمست جدا وكنت مبسوطة اوي وانا بشتغل مع يوسف الشريف واحمد نادر جلال.
لماذا قبلتي دور نهال في كوفيد 25؟
لأن الدور جديد عليا معملتهوش قبل كده والدور فيه انفعالات كتير ودور صعب مش سهل
وانا الحاجات الصعبة دي دايمًا بتبقى مُغرية أوي بالنسبالي
فـ أكيد كنت مبسوطة ان جالي دور صعب زي ده.
لو رجع بيكي الزمن كنتي هتختاري الفن أيضا، ولماذا؟
اه هختار الفن لأن دي حاجة انا بحبها وبتبسطني واكيد اي بني آدم بيعمل الحاجة اللي بيحبها وبتبسطه، فـ أكيد لو رجع بيا الزمن اه هختار الفن.
ما الأكلة المفضلة لدي أيتن عامر؟
عادًة انا بحب الأكل عموما فـ مفيش حاجة أكتر من حاجة بس في حاجات favorites كده زي مكرونة بالبشاميل.. رز ملوخية وفراخ، بحب الأسماك.
مع أي فنان أو فنانة من نجوم الصف الأول ترغبين في التمثيل أمامه/أمامها؟
أنا بحب حلمي.. كريم عبد العزيز.. بحب آسر ياسين واحمد السقا.
حدثينا عن الصعوبات التي واجهتك في بداية دخولك الفن..
الدراسة مع الشغل كانت صعبة عليا شوية بس انا كنت مهتمة جدًا بالدراسة الحمد لله وكنت باجي على نفسي، فـ الحقيقة انا مكنتش بنام وكنت بطلع من التصوير على المعهد ومن المعهد على التصوير وكنت ممكن اقعد على الوضع ده 10 او 15 يوم ورا بعض لدرجة ان عربيتي كانت بتتحول لغرفة متنقلة يعني
فيها الهدوم والشامبو والشاور جل والبلسم ومخدة وكل حاجة كانت بتبقى جوا العربية.
ماذا عن الفنان يوسف الشريف؟
يوسف الشريف من الناس اللي سعدت بالشغل معاها واتشرفت بالشغل معاه لأنه من الناس اللي أنا بحبها جدا جدا جدا وبتبسط اوي بالشغل معاه لأنه بني آدم محترم وشاطر وبيهتم جداً بشغله وتفاصيله وعايز الناس اللي جنبه كلهم يبقوا حلوين وأدوارهم مميزة وبارزة وبيشتغل بحب شديد للناس كلها فـ الحقيقة الشغل معاه كان متعة.
