في فيلم بلبل حيران لما (بلبل) إتعرف علي كل بنت .. سألها عن أكتر حاجة هي بتحبها وبتهتم بيها وراح لعم (أيوب) عشان يجيب كتاب يخص الحاجة دي، ويعرف كل تفصيله عنها.
بغض النظر عن إن الموضوع كان في سياق كوميدي بحت ، وأعتقد إن المؤلف نفسه مقصدش يوصل المعلومه بالشكل ده، إلا إن النوع ده من المعرفة مهم جداً.
مش مهم انتَ بتعرف تعمل ايه .. ولا ايه مميزاتك كبني أدم .. أجلاً أم عاجلاً الست هاتزهق خصوصا لو كانت الحاجة الي انتَ مميز بيها دي متهمهاش .. فلما تقولك أنا بحب الغنا .. متعملش فيها فتك وتسمعها أغاني .. لا انتَ لازم تكون ملم بكل حاجة ليها علاقه بالغنا .. موسيقين وفنانين وتاريخهم وتفاصيل حياتهم عشان تقدر تقربها منك وتحسسها بالأهتمام الي هي عايزاه .. ومفيش مانع انها توصل لدرجه انك انتَ ذات نفسك تغني .. مفيش مشكلة خالص .. هي هاتقدر ده وهاتحترمه فيك جداً
المشكله الحقيقيه إنك ميكونش عندك خلفية عن الحاجة الي بتهمها وكل الي تعرفه عنها الأسم بس .. والمشكلة الأكبر إنك متكونش عارف إزاي تحصل علي المعلومة دي ومنين .. عشان كده كلنا محتاجين لعم (أيوب) في حياتنا.
