سمر متولي، ممثلة مصرية شابة، وهي ابنة الفنان الراحل “محمد متولي”، تخرجت من كلية الفنون الجميلة قسم “جرافيك”، بدأت حياتها كفنانة تشكيلية، وبسبب عشقها للتمثيل منذ الصغر اشتركت في ورش تمثيل.
شاركت “سمر متولي” في العديد من الأعمال التلفزيونية ومنها: “فيفا أطاطا، أمر واقع، ممنوع الاقتراب أو التصوير، شبر ميه، طلقة حظ”.
كما شاركت “سمر” في أكثر من عمل سينمائي مثل: “200 جنيه، يوم وليلة، نادي الراجل السري”.
وكان لمجلة هافن حوار خاص مع الممثلة الشابة “سمر متولي”.
- كيف جاءت بداية دخولك لعالم التمثيل؟
جاءت خلال تصوير مسلسل “فيفا أطاطا” مع والدي الفنان “محمد متولي” أثناء تصويره ساعتها قولتله: “أنا عايزة أمثل يا بابي، أجرب مش ممكن أكون بعرف”، قالي يلا بينا نقول لأستاذ “سامح عبد العزيز” بس أهم حاجة تكوني قد الخطوة دي، قولتله قدها، طلعنا نستأذن أستاذ سامح وقالي ماتيجي تمثلي معانا قولتله لسه والله جاين نقولك كده ولبست ساعتها لبس الشخصية كانت فلاحة وطلعت وعملت الدور ومن ساعتها كملت.
- هل شجعك والدك الفنان “محمد متولي” لدخولك مجال التمثيل؟
كان معايا في كل خطوة وبيشجعني إني أخد كورس وورش تمثيل وكان بيذاكرلي كتير أوي واتعلمت منه كتير.
- وما أهم النصائح التي قدمها لكِ؟
قالي أهم حاجة تكوني ضيفة جميلة ومحبوبة من الجمهور، لو حبك كملي ولو حسيتي أنك تقيلة عليه بطلي، وربنا يرزقني بحب الناس يارب دايمًا.
- هل دراستك “للجرافيك” ساعدتك في مجال التمثيل؟
أكيد الجرافيك والرسم عشان تكوني قوية فيه لازم يكون خيالك واسع وده طبعًا بيساعدني أقدر أشوف شكل الشخصية وأرسمها كمان في خيالي وأطور منها في أدائها وحركاتها وشكلها.
- حدثينا عن دورك في فيلم “200 جنيه”؟
بقدم دور بنت بتمثل الطبقة البسيطة الشعبية بتظهر مع الفنان “أحمد السقا” في أحداث الفيلم وبتحصل أحداث ما بينها وبين السقا.
- كيف جاءت مشاركتك في الفيلم؟
عن طريق الصدفة كانوا بيصوروا في مكان أنا فيه روحت سلمت عليهم والإخراج تابع معايا وحصل نصيب إني أشارك في عمل بالحجم الكبير ده وطبعًا فارق معايا جدًا وجودي في عمل بالحجم ده.
- ماذا عن كواليس العمل؟
جميلة جدًا طبعًا والسقا بالنسبة ليا من نجومي المفضلين وكان حلمي أمثل معاه، وأنا بتبسط وأنا بصور عمومًا بحس انه ده بيتي من وأنا صغيرة وأنا في اللوكيشن.
- كيف تلقيتِ ردود الأفعال حول دورك في فيلم “200 جنيه”؟
والله مبسوطة بردود الأفعال جدًا وحاسة أنه هيفرق معايا جدًا إن شاء الله في الأعمال القادمة.
- حدثينا قليلًا عن دورك في مسلسل “إجازة مفتوحة”؟
دوري “فريدة” مخرجة، دوري معظمه مع النجم الجميل الأستاذ “شريف منير” والنجم “كريم أبو زيد”.
- كيف تم ترشيحك للمسلسل؟
عن طريق الإخراج أستاذ “شادي عبد السلام” وطبعًا بريادة مخرج وقائد العمل أستاذ “محمد حماقي”.
- حدثينا عن كواليس مسلسل “إجازة مفتوحة”؟
طبعا مبسوطة جدًا وخصوصًا ده تاني تعامل مع شركة الإنتاج “سيل ميديا” مع أستاذه “مها سليم” وفريق الإنتاج كله بالتعاون مع “سنرجي” بعد مسلسل “شبر ميه” وأنا بثق في اختيارات مدام “مها” شغلها ليه روح حلوة، عشان هي روحها حلوة وست جدعة جدًا ونفسي اشتغل في كل أعمالها.
وطبعا أستاذ “شريف منير” عشرة سنين من أيام مسرحية “حزمني يا” بحبه جدًا وبيفكرني بأحلى ذكرياتي، والنجم “كريم أبو زيد” بردو أعرفه من زمان والعائلة كلها فحاسة إني في بيتي.
- ما الذي تتمنيه خلال الفترة القادمة؟
أتمنى أن دوري في مسلسل “إجازة مفتوحة” يعجب الناس وخصوصًا انه هيتعرض في الوقت الحالي وطبعًا، أتمنى أقدم أعمال تانية بشخصيات مختلفة ومتنوعة في الفترة الجاية إن شاء الله.
- هل تحبي أن توجهي رسالة إلى شخصًا ما؟
بحب أقول لشركة “سنرجي” أن هي عملت طفرة في حجم الأعمال وعددها وده بيدي فرصة لأكثر عدد من النجوم في الظهور في الساحة الفنية، وبأدوار مهمة جدًا في تاريخهم الفني وطبعًا أنا بشتغل معاهم وده شرف ليا في معظم أعمالي، ونفسي أكبر أكتر معاهم ويتيحوا الفرصة دي ليا.
