فنلقاءات

صلاح عبد الله لهافن “فيلم المحكمة يقدم قضايا هامة”

يشارك الفنان القدير “صلاح عبد الله” في بطولة فيلم “المحكمة”، ومن المقرر طرح الفيلم في دور العرض السينمائي قريبًا، والعمل تدور أحداثه في إطار اجتماعي ويناقش عدد من القضايا الهامة في المجتمع.

وكان لمجلة هافن حوار خاص مع الفنان القدير “صلاح عبد الله”.

  • في البداية حدثنا عن آخر أعمالك دورك فيلم “المحكمة”؟

أعتقد أن هو فيلم مهم جدًا، وممكن يعيد النظر في القوانين وفي التعامل مع المواقف من خلال القضايا اللي الفيلم بيطرحها.

  • وكيف تم ترشيحك للمشاركة في فيلم “المحكمة”؟

اللي استدعوني طبعًا للمشاركة والترشيح المؤلف “أحمد عبد الله” ده صديق قديم وعملت معاه أفلام كويسة جدًا مثل: “كباريه، الفرح، ومسلسل الحارة” وأعمال تانية كتير.

وطبعاً المنتج “أحمد السبكي” منتج الأعمال اللي ذكرتها، والمخرج “محمد أمين” ده كان أول تعامل ما بينا رغم أنه صديق عزيز وأنا بحب شغلة جدًا ومتهيألي أن هما التلاتة اتفقوا على ترشيحي للدور، وأنا حابب الدور ده قوي وإن شاء الله يطلع والناس تحبه زي ما أنا حبيته.

الإنس والنمس.. تواصل معايا الأستاذ “شريف عرفة” المخرج وأنا في الساحل السنة اللي فاتت “2020”، قالي أنا عايزك في مشهد في فيلم هنيدي الجديد تقبل ومشهد مهم وحلو.

قولتله أنا عايز أشوفك، نفسي أشوفك، أنا هاجي علشان أشوفك وفعلًا عملت المشهد ده وكنت مبسوط أوي، وشوفت “هنيدي وأيمن أبو المكارم”، روحتله التصوير وكل فريق العمل الخاص بالمخرج “شريف عرفة” وتربطني علاقة قوية أوي بشريف وهنيدي وكنت سعيد أوي إني شاركت في هذا المشهد وهو مشهد واحد.

  • وماذا عن مشاركتك في مسلسل “شقة 6″؟

المسلسل من نوعية اللي بيسموها الرعب، وأنا شاركت في عمل مشابه له وهو مسلسل “جمال الحريم”، قدمت فيه دور اللي بيدعوا للإيمان بطريقة لذيذة ومتحضرة جميلة، لأنه في عصر قديم كنت حابب أنا الدور ده أوي في “جمال الحريم”، وحبيت الدور اللي قدمته في مسلسل “شقة 6” دور “ماهر”.

  • وكيف جاءت مشاركتك في مسلسل “شقة 6″؟

المخرج “محمود كامل” بدأ بالتواصل معايا، وهو الحقيقة كان عامل تكنينك ومنهج جديد في التصوير وأنا سبتله نفسي وأعتقد ان النتيجة كانت طيبة.. الحمد لله.

  • ما رأيك في الدراما المصرية الحالية؟

الدراما المصرية بخير وهتفضل بخير إن شاء الله.

أنا لا اقيم نجاح أعمالي الفنية، الجمهور هو من يقيم، بمعنى أن انا لما بكون في مكان أو حاجة بشوف في ناس ممكن تعلق على مسلسل معين، على فيلم معين، على شخصية معينة عملتها، فبحس أن ده التقييم لمشواري الطويل.

وأنا داخل علي 40 سنة بحترف التمثيل، آه طبعًا فيهم أول 10 سنين كانوا المسرح هو كل حاجة وبعد كده توالت بقى الأعمال التليفزيونية والسينمائية، عملت كتير الحمد لله ألف حمد وشكر نسبة الأعمال اللي نجحت قوي مع الناس الحمد لله نسبة طيبة قد تتجاوز 70℅.

  • وكيف ترى أهمية السوشيال ميديا في حياة الفنان؟

السوشيال ميديا بقت “سلاح ذو حدين”، هي مهمة جدًا آه بس إزاي اتعامل معاها هو ده الأهم.. أنا بتعامل مع السوشيال ميديا بس براعي الضوابط اللي أنا ذكرتها “أخد منها الصالح وأسك على الطالح، أخد منها المفيد وأسك على المسيء أو الذي يثير الفتن”.

حتى في الكورة السوشيال ميديا أثرت في الكورة جدًا، بقت مؤثرة بتأثر في الفن وفي الكورة وفي السياسة وحاجات كتير، السوشيال ميديا دي الاختراع اللي إحنا عاصرنا.. الحمد لله.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!