تشارك الفنانة الشابة “ياسمين سمير” حاليًا في مسلسل “إلا أنا” حكاية “بالورقة والقلم”، ومن المقرر عرض الحكاية قريبًا.
وتحدثت “ياسمين سمير” في حوار خاص لمجلة هافن عن تفاصيل مشاركتها في حكاية “إلا أنا” وعن دورها في مسلسل “الحرير المخملي”.
- حدثينا عن دورك في مسلسل “إلا أنا” حكاية بالورقة والقلم”؟
بقدم دور “هبة” زوجة رامي شقيق “يسرا اللوزي” الدور بيناقش قضية مهمة جدًا، اللاين بتاعي عمومًا بيناقش إهمال الزوج لزوجته، لإنه بيبقى عاوز يقعد مع صحابه بيبقى مش فاضلها بيبقى مش حابب اهتمامها بيه وبحياته بيبقى عايز مساحة ليه ولحياته، ومن خلال الأحداث بنشوف دا بيأثر عليهم إزاي وبيوصل علاقتهم لإيه، وكل دا هيبان في الأحداث والنهاية بتاعتهم عاملة إزاي.
- وكيف جاءت مشاركتك في حكاية “بالورقة والقلم”؟
ترشيحي للدور تم عن طريق المنتج الفني أستاذ “أحمد عبد العزيز”، هو من الناس اللي متبنياني فنيًا من أيام ما كنت في المعهد ساعدني كتير جدًا في أهم الخطوات في مجالي الفني، وطبعًا المخرج “محمد بكير” أنا اشتغلت معاه قبل كدا في مسلسل “ابن أصول”، وهو من المخرجين المحترمين جدًا اللي أنا بتبسط وبستمتع جدًا وأنا بشتغل معاهم.
- ماذا عن تجربتك في العمل مع المخرج “محمد بكير”؟
المخرج “محمد بكير” من المخرجين الفنانين اللي فاهم أوي نفسية الممثل، فاهم يعني أيه شخصية هو بيلعبها، قبل أي مشهد يقعد معاكي يفهمك انتي خارجة من إيه وطالعة على إيه وحالتك النفسية هنا إيه بيلم معاكي الشخصية، ممكن مثلًا مع زحمة اللوكيشن حاجة تقع منك حاجة تتوه منك لا، دائمًا بيسندك دائمًا معاكي، أنا شيفاه مخرج فنان لأقصى درجة.
- حدثينا عن مشاركتك في مسلسل “الحرير المخملي”؟
الحرير المخملي مسلسل طبعًا كبير ٦٠ حلقة، حاجة كدة ملحمية كبيرة هي مأثورة رواية اسمها “الحرير المخملي” بطولة نخبة كبيرة جدًا من النجوم “مصطفى فهمي، داليا مصطفى، هالة فاخر، أحمد وفيق، أحمد سعيد عبد الغني، دنيا عبد العزيز، محمد علي رزق، وغيرهم نجوم كبار.
وإخراج طبعًا الجميل “أحمد حسن” من الناس برضوا اللي بستمتع بالشغل معاها، واشتغلت مع أحمد كذا مرة وكل مرة الحقيقة بعمل دور مختلف عن التاني، المرة دي
عاملة دور كدا أنا مش عاوزه أحرقه بس دور مختلف خالص عن أي دور أنا لعبته قبل كدا مش هحرقه مش هقول حاجة عنه يارب بس يعجب الناس.
