الإنسان بيروح في لحظة .. أمينه الشماع كانت بتعمل تحاليل عادي جداً عشان داخله علي جواز، فإكتشفت إنها عندها لوكيميا.
محدش بياخد كل حاجة .. علي الرغم من فلوسها وعربيتها وشغلتها وجوزها الحنين إلا إن كل ده فارقها بمجرد ما عرفوا إنها عندها المرض الوحش، بس من ناحية تانيه إكتشفت إن عندها أهل بيحبوها وصاحبة بتعزها جداً وشريك حياة لا كان علي البال ولا علي الخاطر “وعسي أن تكرهوا شيئا وهو خير لكم”.
الأمل بيعمل المعجزات .. لما سابت حبيبها الأولاني وإبتدت رحلة العلاج، إتعرفت علي سليم اللي بدوره إداها حاجة مهمة جداً هي كانت مفتقداها .. إداها سبب تعيش عشانه .. إداها الأمل.
حب الناس نعمة مبنبقاش مدركينها .. صاحبتها مسابتهاش وأهلها كانوا دايماً في ضهرها حتي أختها اللي من أخر بلاد المسلمين جت تصالحها ، مصارين البطن بتتعارك، بس الدم عمره ما يبقي ميه.
القناعة كنز لا يفني .. وربنا بيقولنا أنا عند حسن ظن عبدي بي .. فمتبقاش سئ الظن بالله
اللي أنا حكيته فوق ده مش قصة حقيقية، دي حكاية مسلسل حلاوة الدنيا .. يمكن تكون في حكايات كتير شبه الحكاية دي في دنيتنا بس إحنا منعرفش عنها حاجة ، بس عموما فكرة المسلسل فكرة رائعة .. إستخدام أسوء الأمراض علي وجه الأرض لتوجيه فكرة الأمل والرضا بالمكتوب والترابط العائلي بالشكل الإيجابي ده إختراع.
المسلسل بصت لنص الكوباية المليان ، فكرة إن ربنا دايما بياخد منك حاجة عشان يعوضك بالي أحسن منها ، فكرة إنك متبصش للإبتلاء علي أنه حاجة وحشة وتحاول تتحملة وتصبر عشان ده بيشيل من عنك ذنوب أو بيكسبك أجر الصابرين ، فكرة إنك تحس بالنعم اللي ربنا مديهالك وإنت مش حاسس بيها ، وبدل ما تشكره عليها ، شاغل بالك بالتعديد علي الحاجات اللي ضايعة منك.
