حواراتفن

حاتم جميل لـ “هافن”: الاحتكارية قعدت فنانين كتير في البيت والشغل بقي قليل

محمد هنيدي كوماندا الكوميديا، ولا منافسة عليه، وهو خارج اي منافسة، وسعيد بمشاركتي معه في “يا أنا يا خالتي

اتعلمت من أستاذ “علاء ولى الدين” كتير بعد جملته ليا في فيلم الناظر “هتتعلم ولا مش هتتعلم”، وكنت من المحظوظين إن أول أعمالي يبقى فيلم “الناظر

فنان له بصمة بأدواره التي تتردد بين الجمهور وله جمل عالقة مع الكثيرين حتى الآن منهم “مالك ياض يا وش، ومحدش هيتعلم هنا”.

شارك مع كبار نجوم الفن الراحلين منهم “علاء ولى الدين، طلعت زكريا، عزت أبو عوف، حسن حسني”.

له دور في فيلم “الناظر” وهو دور طالب مشاغب بالمدرسة، وظهر من خلاله للجمهور وأحبه بعد ذلك في أعمال كثيرة، يحكي لنا عنها الفنان “حاتم جميل” من خلال حواره الصحفي الخاص بمجلة هافن وإليكم نص الحوار

  • شخصية وائل في فيلم الناظر لها مردود إيجابي عند الجمهور هل هذا الدور هو سر ظهور الفنان حاتم جميل للساحة الفنية؟

هي أول علاقة بيني وبين الجمهور والوسط الفني على الإطلاق، وكان ليا الشرف أن يكون أول عمل ليا من كتابة السيناريست المميز إلى الآن أحمد عبد الله، والمخرج الذي لقبته ببرنس الإخراج “شريف عرفه”، وأستاذي “علاء ولي الدين” اللي اتعلمت منه على المستوى الفني والشخصي رحمة الله عليه.

من حظي أن أعمل مع العملاق فنيًا محمد هنيدي، الكوميديان اللي في وجهة نظري خارج المنافسة.
حين عُرض عليا الدور من خلال الأستاذ أحمد عبد الله سألني “حاتم بتثبت حد بطريقه كوميدية، تقوله ايه؟”.
قولتله “اديني 10 دقايق واقولك يا أستاذ”، وفعلا قلت له “هقول مالك ياض يا وش”، وفعلا الجملة ضربت لحد دلوقتي، والناس بتقولها ليا في اي مكان.

  • فيلم “عيال حبيبة” ضم نخبة من كبار النجوم، ماذا استفدت من هذا العمل وكيف كانت كواليسه؟

فيلم عيال حبيبة أنا بعتبره احتكاكي بنجوم جيل مدرسة أتعلمت منهم كتير، وفيلم عيال حبيبه من الافلام الظريفة اللي تحسب ليه تواجد إيجابي.

  • الزمهلوية فيلم ضم قطبين للكرة المصرية، ما هو انتمائك الكروي وهل الدور كان يتناسب مع انتمائك؟

فيلم الزمهلويه من الافلام الخفيفة الشبابية اللي بتمس قطاع كبير من الشباب، وكنت عامله بقدر من خفة الظل، وعرفت ده من المقربين، مع ان الفيلم ما اخدش حظه في السينما، بس من الافلام اللي بحبها، وكنت عامل دور زملكاوي وانا أهلاوي.

  •  كريمة كريمة مسلسل كوميدي، كيف كانت كواليس هذا العمل؟

كريمة كريمة مسلسل فيه كوكبه من النجوم كل حد فيهم مدرسه في الكوميديا، وده الفرق بين المسلسلات الكوميدية الحالية اللي بتلعب علي النجم الاوحد او النجم والسنيد.

وطبعا ليا شرف العمل مع الاستاذ المخرج الكبير محمد الرشيدي والأستاذة مجدي ذكي والمجموعة الكبيرة من الكوميديانات اللي في العمل.

طبعا عمنا وأيقونة الضحك الفنان الكبير طلعت زكريا الله يرحمه، كنت عامل دور ظابط، وهنا بعمل الشخصية والنقيض بتاعها، ظابط مخابرات ونزلت اراقب سعيد حركات فبقيت واحد صايع.
ده بيكشف الممثل، لان دور وعكسه بيظهر امكانيات الممثل في عمل واحد وان كان الدور صغير.

  • ماذا عن شخصية “عتريس” في “سرايا عابدين 2″؟

دور عتريس في سريا عابدين مع استاذي عمرو عرفه اللي بعتبر نفسي مجرد إني اشتغلت معاه عمل واحد وسام علي صدري لأنه فنان وانسان فوق العادة.
والدور كان دور سفرجي بلطجي وبيكون أحد نواحي صراعات الخدم في السرايا ويعد بلطجي كوميدي لحد كبير.
وليا الشرف إني اشتغل في عمل ضخم، ياريت نكرر التجارب العملاقة لأننا قادرين عليها بشكل كبير على المستوى الفني.

  • شاركت في العديد من الأعمال، ما هي أقربهم إلى قلبك؟

والله أقرب الاعمال لقلبي فيلم “الناظر” لان استاذ علاء لما قالي هتتعلم ولا مش هتتعلم، اتعلمت فعلا منه الجانب الانساني والقلب الكبير والتواضع وحب الناس اللي قليل جدا تلاقيه دلوقتي.
ومن وجهة نظري فيلم الناظر اتعمل وسط حاله من الحب بين كل اللي اشتغلوا فيه عشان كدا فيلم عايش وهيعيش كتير جدا، يكفي مفيش عيد من غير فيلم الناظر.

  • الفنان “حاتم جميل” يفضل الأعمال الدرامية أكثر أم الكوميدية؟

انا بحب الشخصية اللي بتلعب الشر الكوميدي الخفيف، لان النجوم اللي لعبت النوع ده إلى الآن كلامهم عايش وبنردده.

  • خلال مسيرتك الفنية شاركت مع كبار الفنانين في مصر والوطن العربي ولهم أسمائهم، من منهم الأقرب إلى قلبك ومن منهم أثر في تكوين حاتم جميل كفنان؟

والله كل النجوم كان ليه شرف العمل معاهم بحبهم جدا طبعا، ولكن استاذ علاء ولي الدين هوا الاقرب اللي قلبي لأنه على المستوى الفني والانساني لا يتكرر.

  • ما هي أخر أعمالك؟

أخر عمل عملته دور عنتر في مسلسل ضد مجهول للأستاذة غادة عبد الرازق ومحصلش نصيب بعدها لأننا دخلنا في مرحلة احتكاريه كان تأثيرها ان كتير من الفنانين قعدوا في البيت.
ولكن الحمد لله الموضوع اختلف وان شاء الله الموسم ده هيكون موسم خير علي الفنانين وان شاء الله هنرجع تاني للشاشة بإذن الله لإننا في مرحله ترشيحات لسه وربنا كريم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!