قصص

حنبتدى الحكاية

القصة بتدور احداثها بالصعيد جو الرجوله والشهامه والحب والطيبه
كانت جميله بنوته جميله ورده لسة  بتفتح… ابن عمها (ثابت ) كان كبير العيله
وكان بينهم أجمل احساس كله براءة وصدق …الإحساس اللى بتعبر بيه بالعيون  بيكون صادق وأقوى  من الاحساس اللى بتعبر بيه بالكلام
جميلة:سلام عليكم إذيك يا عمتى عامله إيه وصحتك عاملة إيه
العمه:الحمد لله يا جميلة أخبار دراستك إيه
جميلة:الحمد لله الدراسه والثقافه أجمل حياه ممكن  نعيش فيها
العمه:انا عارفه اد ايه انتى بتحبى دراستك والعلم  وانتى قربتى تخلصى دراستك وفيه أخبار جميله اوى
جميله: بجد يا عمتى …ايه قولى ايه عشان خاطرى
العمه:اصبرى بس لما تروحى حتعرفى
جميله مشيت من عند عمتها وقلبها بيرقص من الفرحه وطارت للبيت اكيد ثابت طلب ايدها ماهى قربت تخلص بقه دراستها …بس كان المفروض يعرفنى صحيح هو مش بيتكلم بس كنت حفهمه من نظرة عيونه ….
دخلت جميلة البيت والفرحه طايره من عنيها وراحت لمامتها وحضنتها
الام: جميلة الجميلة شكل عمتك قالتلك على الخبر  المفاجأه عنيكى بتقول كده
جميلة:لا ماقالتش حاجة ولا لمحت حتى …..وضحكت ضحكه كلها براءه ..
الام:مش انتى بتحبى العلم والدراسه ونفسك تكملى فى الكليه؟
جميلة:ايوه جدا …
الام:جهزى نفسك ياست البنات عشان مسافرين المانيا ..منحه شغل تبع والدك …وحياخدك معاه تكملى دراستك
جميله؛ الضحكه مابقتش عارفه تكملها للخبر ده ولا تحزن لبعدها عن حبيبها ولا يجيلها احباط لان مش ده الخبر اللى كانت مستنياه
ومابقتش عارفه تحس بايه …ولا تعمل ايه….وسافرت جميله بوداع العيون …
عدت سنين طويله ورجعت جميلة من السفر
العيله كلها متجمعه عشان تستقبل الأب الخوال والأعمام وولادهم وبناتهم ناس كتيره فضلت جميله بعيونها تدور على ثابت
اهوه ثابت هناك وسط الناس والهوجه دى ….جميله بصتله مابقتش شايفه غيره ولا سامعه غيره وسط الدوشه
بتدور على عيونه وسط عيون الناس ومش لاقياها
ولا بصلها كأنها هوا ولا حتى سلم عليها …
جميله:اكيد ثابت اتجوز ده حتى مارضاش يبصلى زى زمان ولا يكلمنى بعيونه ولا حتى سلم عليه
مسكت دموعها وفضلت عنيها على ثابت ….
مشيت الناس كلها ومابقاش فى الساحه الكبيره الخاصه ببيت العيله
غيرها ودمعه محبوسه لسه حتنزل على خدها الرقيق
وفجأة لقت ايد بتمسح الدمعه قبل ماتنزل على خدودها
ثابت:ماينفعش العيون دى تتكلم غير لثابت مالهاش دعوه حتى بخدودك
حتى دموعك ماتنزلش غير على كفى …..اتوحشتك اوى يابنت عمى
جميلة:بس انت حتى مابصتليش
ثابت:لو عينى قابلت عينك وسط الناس كانت حتحضنك وسطيهم وأنا عيون حبيبتى ماتتحضنش قصاد حد ..
جميله: انت حتى ماسلمتش عليه
ثابت؛لو كنت لمست ايدك مكنتش حسيبها ….انا ماصدقت رجعتيلى عشان اقولك …..بحبك
جميله بنظرة كلها حياء وبراءة انا كنت مفكره ان حكايتى معاك خلصت
ثابت…لسه يا جميلة حتبتدى.الحكاية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
إغلاق