ريهام الشنواني هي فنانة مصرية شابة ولدت ١٨ ابريل في حاصلة على الاقتصاد من جامعة الاسكندرية
كانت بدايتها عن طريق الاعلانات ثم اشتهرت بدور “نهى” في مسلسل “إلا أنا” في حكاية “بالورقة والقلم”، وكان لمجلة هافن حوار خاص معها حول هذا الدور، واليكم نص الحوار: –
- إزاي دخلتي مجال التمثيل؟
عن طريق الإعلانات، ثم ورشه استاذ خالد جلال مركز الابداع، ومشروع تخرج سينما مصر، كنت عامله زينات صدقي، ومن هنا بدأت القائمين على الاعمال يشوفوا العرض ويعرفوني.
- ايه سبب دخولك مجال التمثيل بالرغم من عملك كمضيفة طيران؟
بصي التمثيل موهبتي، النفس اللي بتنفسه، كياني، احلامي، طموحي، حياه بالنسبالي واظن كل دا يخليني ادخل مجال التمثيل رغم ان المشوار مكنش سهل، كان أصعب بكتير مما تتخيلي، وأنا لسه مسبتش شغلي كمضيفة طيران لان دا اصلا اكل عيشي ومهنتي من سنين.
- مين رشحك للدور في حكاية بالورقة والقلم؟
ترشيحات من الانتاج والاخراج والتأليف.
- ايه اللي جذبك لدور وشخصية نهى؟
انها شخصيه مرحه ودمها خفيف والحكاية فيها تراجيدي و دا كان تحدي ليا لأني معروفه إني بقدم كوميدي وكنت عاوزه اثبت ان الممثل بيقدر يلعب كل الشخصيات.
- إحكيلنا عن كواليس كانت ازاى؟
احلي كواليس بجد، من امتع الاجواء فعلا، كلها صداقه وحب ومساعده.
- علاقتك بكاست العمل كانت ازاى وقت الكواليس؟
كلهم بقوا صحابي بجد من أصغر حد لأكبر حد ولحد دلوقتي صحاب حتى بعد انتهاء الحكاية.
- من خلال دور الصاحبة الجدعة في المسلسل ازاى بتشوفي الصداقة ودورهم في حياة بعض؟
والله نادرا الايام دي لما نلاقي صحبه جدعه، بس لو لقينا ليها معاني كتير اوي منها الأخوة والجدعنة والسند.
- من وجهة نظرك ازاى نمنع حاجة زي الهاكرز والابتزاز؟
انا عن نفسي مش بتصور صور على الموبيل ممكن يكون فيها اي شبهه، ومش بفتح اي سايتس معرفهاش او لينك معرفوش وبكون حريصة اوي عشان التكنولوجيا عمله ذات وجهين زي ما فيها خير فيها أذى
- ازاى بتشوفي فكرة مساندة الزوج لزوجته في أزمتها من خلال علاقة حماده ونهى في المسلسل؟
هو دا الي مفروض يحصل بالفعل، الزوج لازم يكون سند وضهر ودعم لزوجته.
- ازاى بتشوفي التكنولوجيا وتعاملها؟
سلاح ذو حدين
- ايه نوعية الاعمال اللي بتفضلي إنك تعمليها؟
كل الاعمال وكل الشخصيات نفسي اعملها، فعلا طماعة اوي انا، انا بحب أمثل، بستمتع وانا بمثل فعلا.
- في اعمال جديدة ليكي قريب او معروض عليكي اعمال؟
انتهيت من تصوير فيلم معالي ماما وقريبًا بالسينما ان شاء الله، ودلوقتي في مسرح وقريبا هننتهي من البروفات وهنعلن عن موعد العرض
