حوارات

لبنى عزت لهافن: العند مش بيوصل لأى حاجة في الدنيا

لبنى عزت هي فنانة مصرية شابة، تدرس في معهد الفنون المسرحية قسم تمثيل وإخراج.

اشتهرت بشخصية “هايدى” فى حكاية “بالورقة والقلم” فى مسلسل “إلا أنا”، وكان لمجلة هافن حوار خاص معها، وإليكم نص الحوار.

  • ازاى بدأتي مجالك الفني؟ 

انا فى معهد الفنون المسرحية اصلا أكاديمية الفنون قسم تمثيل وإخراج وقبل المعهد اخدت ورش عمل في التمثيل والإخراج والتصوير وفى حاجات كتير وبعدين دخلت المعهد من هنا بدأت

  • من رشحك لدور هايدي فى الا انا؟ 

اللى رشحني لدور هايدى الاستاذ محمد بكير المخرج، وقالى انها شخصية مهمة جدا فى الاول وحكالي عنها شوية وبعدين كلمنى مؤلف العمل، وكلمنى شوية عن شخصية هايدى، وحبيت الدور قبل ما نعمل اى حاجة.

  • ايه اللى جذبك لدور هايدي؟

حبيت الشخصية جدًا، وحبيت الرسالة اللى فيها

حبيت انهم بيحطوا الضوء على قضية مهمة جدًا جدًا، لأن الناس فى المواقف اللى زى دى مش بتبقى شايفة نفسها وهما بيعاندوا مع بعض ومش شايفين ولادهم 

ودى فرصة كويسة جدًا إنهم يشوفوا ده بيسبب ايه لأولادهم  من غير ما ياخدوا بالهم.

وهايدى ست مش وحشة هى ست عنيدة ومش قادرة تتقبل إن يوسف مبقاش معاها ومبقاش شئ يخصها، هي بس بتتملك الأشياء، والتملك ده مش افضل حاجة، لكن هايدي مش وحشة بدليل ان نهاية المسلسل فى آراء الناس أن هايدى صعبانة عليهم جدًا 

ودى حاجة تانية حببتنى فى الشخصية ان الناس تكرهك فى الاول، وبعدين فى الآخر العكس تمامًا والناس تحبك.

  • ازاى بتشوفى الست العنيدة زي شخصية هايدى؟

بشوف اى كان ست او راجل العند ده مش بيوصل لاى حاجة فى الدنيا العند شئ مخيف بالذات لو العند فى الغلط العند فى حقك مفيش مشكلة لكن العند فى الغلط سيئ بمعنى الكلمة 

  • من خلال شخصية هايدى ازاى يكون فى احترام متبادل بين زوجين منفصلين؟

اولا لو فى اطفال او اولاد طبعا مصلحتهم اولا ونبقى شايفين ان سعادتهم اولا مستقبلهم اولا لما نحط الحاجات دى قصادنا وطبعا سعادتهم من سعادة أولادهم هيفرق كتير فى سلوكنا مع بعض ولو مفيش اولاد حتى بعض الانفصال الاحترام بينهم واجب والاحترام بينتج عن التقبل يعني هايدي مش احترمت فى الاول العلاقة لانها مش تقبلت انفصالها عن يوسف ومش تقبلت ان ده حصل بالفعل وانه مبقاش من حقها والتقبل بيخلى كل ده سهل اننا نتقبل اننا انفصلنا واننا شخصين فى حياتين مختلفتين ونحترم بعض.

  • من أدائك لشخصية هايدي ازاى منخليش الاطفال متتأثرش بانفصال الاب والام؟

اننا نبعد خلافاتنا ومشاكلنا عنهم وانهم ميبقوش طرف واضح فى مواقفنا مع بعض اى كان الموقف، لأنهم فى الاول والاخر ملهمش اى ذنب فى اى حاجة ممكن تكون بتحصل قصادهم 

وحتى لو فى مشكلة تبقى مشكلة شخصية بيني وبين الشخص مش مساومة، المساومة دى اكبر غلط، واكبر حاجة بتأثر على نفسية الاطفال فى السن ده بالذات، والحاجات دى اللى بتبنى شخصيتهم

ودى رسالة مهمة ان مشاكلنا نحلها احنا مش انهم يبقوا طرف فى الحكاية، وبلاش مشاكل من الأساس حتى لو فى حاجة نعدى، لان اولادنا اهم حاجة فى حياتنا زى ما قولنا فى الرسالة حتى لو هنيجى على نفسنا 

يعنى هايدى فى الاخر جت على نفسها وعلى مشاعرها عشان سعادة بنتها وشافت انه خلاص يوسف مبقاش من حقها والتقبل بداية السلام فى كل شئ، اننا نتقبل اللى حصل، ورفض المواقف فى العقل بيسبب مشاكل كتير لكن لما نتقبل ونتصالح مع نفسنا  هيبقى احسن بكتير.

  • هل في أعمال جديدة ليكى او معروضة عليكى؟

انا لسه مش صرحت بده حتى على الاكونت بتاعى، انا بعمل الحكاية الثانية “بدون ضمان” ودى المفاجأة انى بصور دلوقتى الحلقات فى الحكاية الثانية بدون ضمان مع هنادى مهنا وهاجر احمد واسلام جمال ومش هقدر اتكلم عن الشخصية والتفاصيل والحكاية بتحمل عدة رسايل مهمة.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!