خفيفة الروح والحضور، متمكنة في ظهورها كممثلة ومطربة أيضًا، لديها إمكانيات فنية قوية، دائمًا ما يصفها الواصفون بـ “بنت البلد الجدعة”، تجعلها عفويتها و تلقائيتها الممتزجة بالتقدير قريبة جدًا لدى جمهورها.
انطلقت من خلال أولى بطولاتها “تامر وشوقية” لتأخذ مكانها في الدراما بأدوار الكوميديا السهلة الممتنعة، ومن ثم تنوعت في اختياراتها، واتقنت تقديم جميع الأشكال الفنية.
إنها المطربة والفنانة “مي كساب” وكان لمجلة هافن حوار خاص معها وإليكم نص الحوار.
- مين رشحك لدورك فى حكاية عقبال عوضك؟
المخرج معتز حسام والمنتجة مها سليم.
- ايه اللى جذبك للدور؟
اللى جذبنى للدور انه شبه بنات كتير وشبه اغلب البنات فى مصر.
- ايه رايك فى كلمة عانس وبايرة اللى بتتقال لاى بنت بتتاخر فى الجواز؟
الكلمتين دول بكرهم طبعا لانهم موروثات خاطئة بالنسبالنا وأتمنى ميكونش موجودين فى المجتمع لأنه ميصحش نقولهم.
- من وجهة نظرك ازاى نمنع كلمة عانس وبايرة من المجتمع؟
نمنعهم بالتربية والعلم وبأننا نبتدى نشتغل على الموضوع عن طريق الجهات المعنية زى المجلس القومى للمرأة يوجهوا جهودهم لحل المشكلة دى بتوعية الأمهات ازاى يتعاملوا مع بناتهم وتوعية البنات ايه معايير اختيارها للشريك الصح ازاى تتعامل لو حصلها المشكلة دى لو اتاخرت فى الجواز.
- من وجهة نظرك ازاى نغير وجهة نظر المجتمع عن الجواز وان ده نصيب له وقته؟
احنا المفروض الاول نعرف الموضوع ده بيحصل ليه؟، يعنى في عقبال عوضك بينا إن مشكلة شخصية شادية واللي سببت تأخرها فى الجواز ان دايرتها مقفولة عليها، لانها من المدرسة للبيت ومن البيت للمدرسة معندهاش دايرة معارف غير اللى فى المدرسة والجيران.
ودى بتبقى حقيقة ومشكلة كبيرة جدا وسبب اساسى ان بنات كتيرة قاعدين فى البيت محدش بيشوفهم ولا بيقدروا يتعرفوا على حد، هيشوفوا ناس جديدة فين او يشوفوا ناس يتعرفوا عليها فين.
وجهة نظر المجتمع واحدة واحدة هتتغير لما هناخد ان دى مشكلة ونفضل وراها نحلها زى مشاكل كتير ونوجه كل جهودنا كدولة وأفراد وناس معنية بيها ونشتغل عليها.
وفكرة الأخلاق والقيم والتربية والتعليم اظن ان ده وقته اننا نركز فيه عشان نبنى جيل صحي لان الجيل ده للاسف سهل يتاثر عليه باى حاجة لانه مش فاهم وبينساق ورا اى حاجة من غير فهم ووعى ومحتاجين نشتغل عليه.
- مى كساب كأم من رايك ازاى الام يكون ليها دور فى ان محدش يقول على بنتها عانس؟
هو انا لسه بناتى صغيرين ومش عارفة وقتها هتصرف ازاى بس اكيد هوعيهم، اكيد هخليهم يبقى عندهم معايير صحيحة لاختيار شريك حياتهم.
ولو لقدر واحدة فيهم اتاخرت هتعامل مع الموضوع بذكاء وحكمة واشوف ايه السبب ممكن واحدة فيهم تبقى منطوية متعرفش تتعامل او تعمل علاقات.
- هل في أعمال جديدة ليكى او معروض عليكى أعمال؟
اتفقت على ١٥ حلقة كوميدى فى رمضان لسه مش استقرينا على الاسم النهائي للمسلسل، ومسلسل اللعبة الجزء الثالث، والالبوم الجديد، بشتغل عليه فى الوقت الحالى، وفيلم فولت زيادة.
