صرحت الفنانة “الهام شاهين” لمجلة هافن بان فيلم “ريش” لم يستحق كل تلك الضجة التي اثيرت حوله.
وبسؤالها عن قصة الفيلم المسيئة لمصر وهل يستحق تكريم وزارة الثقافة له قالت: انا مش انسحبت من الفيلم، وشوفته للأخر وهو بيتكلم عن الفقر الشديد.
وانا عن نفسي محبتش الفيلم ومش شايفة انه يستحق كل الضجة المثارة حواليه، فيلم عادى وتجربة غريبة شوية وفيه راجل بيتقلب فرخة.
وأكملت قائلة: انا مش عارفة هو فانتازيا ولا ايه تصنيفه لكن عموما هو مش من النوعية اللي استمتع بمشاهدتها.
وأشارت: أي فيلم بياخد جايزة دولية كبيرة طبعا بيتكرم، ده شيء طبيعي لأنه بيرفع اسم مصر، وان مصر تاخد جايزة كبيرة في مهرجان دولي مهم، فطبيعي ان وزارة الثقافة تكرمه.
وأضافت قائلة: انا شايفة ان مصر أكبر بكتير من ان فيلم ممكن يسئ لسمعتها، الفيلم انا عن نفسي محبتهوش، مفهوش متعة مشاهدة بالنسبالى، وفيه تساؤلات كتير المشاهد بيسألها والفيلم مش بيجاوب عليها.
وأكملت قائلة: انا مش عارفة اصنف نوعيته لكن الفيلم بالنسبالى فقد مصداقيته من اول لحظة ان راجل اتقلب فرخة، جو غير واقعي وانا مش اقتنعت بيه ومش اتعاطفت مع أي شيء بيحصل في الفيلم.
وهو بيتكلم عن الفقر، والفقر مش لازم يكون قذارة، وده معجبنيش، لكن في الاخر الفيلم لا يستحق كل الضجة المثارة حواليه، وانا بشوف انه فيلم مش هيعجب الجمهور، ممكن يعجب نوعية معينة.
وذكرت: اللي بيعمله الاعلام ده بيعمل دعايا للفيلم، وانا شايفة انه فيلم عادى كأن قدامى لوحة سيريالية، في ناس هيعجبها النوع ده من الفن وفى ناس مش هتعجبها خالص، وانا واحدة من الناس اللي معجبنيش خالص، لأني مش فهمته ولا وصلني رسالته ولا فهمت الفيلم عايز يقول ايه.
