حوارات

نرمين الفقي لـ”هافن”: مشاهدي مع صبري فواز في حكاية “على الهامش” كانت تشبه لعبة “البينج بونج”

جميلة من جميلات الدراما المصرية، بموهبتها الصادقة وملامحها البريئة استطاعت أن تجذب أنظار وقلوب الجمهور إليها.

قدمت العديد من الأعمال الفنية المميزة في تاريخ الدراما والسينما المصرية ومنها: “الليل وآخره، بنات عمري، العنكبوت، جبل الحلال، أبو العروسة، لؤلؤ، ضل راجل، واخيرًا مسلسل النمر”.

وتشارك الفنانة “نرمين الفقي” في مسلسل “إلا أنا” حكاية “على الهامش” والتي تقدم من خلاله دور “ياسمين”، كما حققت حكاية “على الهامش” نجحًا كبيرًا منذ بداية الحلقات وأصبحت تريندًا على مواقع التواصل الإجتماعي.

وكان لمجلة هافن حوار خاص مع الفنانة “نرمين الفقي” تكشف فيه تفاصيل مشاركتها في مسلسل “إلا أنا”.

  • في البداية.. ما الذي حمسك للمشاركة في حكاية “على الهامش”؟

طبعًا أنا اللي حمسني جدًا لمسلسل “إلا أنا” قصة “علي الهامش” أنها قصة واقعية ومن الحياة وللأسف الشديد ستات كتير جدًا جدًا بتعاني من هذا الموضوع.

  • حدثينا عن استعداداتك للدور؟

استعدادي للدور هو استعدادي لأي شخصية أنا بقدمها جديدة لأني بحاول بقدر المستطاع أن أنا أقدم جديد، بقعد أذاكر كويس أوي بطلع راكوراتي لوحدي بتعايش مع القصة بشوف المود بتاع الشخصية لازم أبقى في القصة بجد أبقى أنا الشخصية اللي بقدمها بتعايشها بكل المقايس، فالإستعداد بيبقي استعداد نفسي، معنوي في الشكل والأداء في كل حاجة.

  • كيف كانت كواليس العمل؟

الحمد لله يارب كواليس العمل كانت أجمل ما يكون وأنا سعيدة بكل المشاركين الكبار والصغيرين كنا أسرة، كنا ناس بنحب بعض، وأنا ماقدرش أنجح لوحدي من غير وجود فنانين بمعنى الكلمة؛ لأن بحس أن إحنا لازم ناخد إحساس المشاعر من بعض ف أيد لوحدها ماتسقفش أبدًا.

صبري فواز” فنان بمعنى  الكلمة كان في مشاهد حسيت فيها أن إحنا بنلعب “بينج بونج” اللي هو بندي الكورة لبعض في “الصعود، النزول، في المشاهد، الأحاسيس، المشاعر، الكلام، الطبيعية، التلقائية” فأحنا الأتنين كنا زي ما بيقولوا عُمله لوجه واحد مش لوجهين أبدًا.

  • ما رأيك في المسلسلات التي تعرض على المنصات؟

المسلسلات التي تعرض على المنصات.. أنا شايفة أن هي مش بيبقى فيها ملل، بتبقى الأحداث فيها سريعة جدًا، المشاهد لازم يركز فيها أوي مانروحش ونيجي ونقول إحنا لسه عند نفس الحدث ف بالعكس أنا شايفة أنها بتطرح مشاكل وبتطرح حكايات كتير عن حياتنا وممكن نلاقي من خلالها حلول وهو ده الحلو.

طبعا بتأثر بكل الشخصيات اللي انا بمثلها وبتعايشها جدًا، مابعرفش أفصل منها غير يمكن بعد ما بطلع وساعات بتأثر فيا أوي أوي.

قابلت أكيد في أعمال كتير قدمتها لازم تكون فيها جزء من شخصيتي.. إحنا بنقدم شخصيات كتير لناس كتير في حياتنا موجودة ولازم كلنا يبقى حصلنا حادثة أو حادثتين أو يبقى عندنا واقع من الشخصيات دي فأكيد كلنا طبعًا لازم نكون اتأثرنا أو شوفنا من ده.

  • وما الذي تتمنيه خلال الفترة المقبلة؟

يارب إن شاء الله دايمًا اللي تتعرض عليا تبقى أعمال جميلة وأكون دايمًا عند حسن الظن.

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!