في أعمال فنية كده مينفعش نتكلم عنها لإنها بتتكلم عن نفسها .. بس لما السفه يوصل بينا لإننا ننتقد فيلم زي فيلم “الممر” علي جندي مش ماسك قناصة صح أو جندي لابس مموه جديد مش قديم يبقي لازم نحط النقط علي الحروف.
أولا: فيلم “الممر” عمل فني زي أي فيلم فوارد فيه الإخطاء اللي من النوع ده لأن القائمين علي العمل ممثلين مش جنود حقيقين .. كمان هما ممكن يكونوا منسقين مع القوات المسلحة فوارد جداً إنك تكون إنت اللي بتهبد وهما اللي صح.
ثانيا: الفيلم فكرة وليس أداء .. هو عايز يفكرنا بروح الوطنية والفداء والإنتماء، لما كنا كلنا إيد واحدة .. زائد إنه عايز يأرخ حقبة مهمة جداً في حياة القوات المسلحة.
ثالثاً: كل ممثل في الفيلم كان بيوصل فكرة معينة .. احمد عز واحمد صلاح كانوا بيجسدوا كذا فكرة متمثلة في إن المركب اللي ليها ريسين بتغرق،وإن القيادة لو مكانتش حكيمة بتهد، مشيداً بأهمية سلاح البحريه في القوات المسلحة .. ومحمد فراج بيجسد شخصية الجندي الشجاع اللي شايف إن الدفاع عن أرضه ووطنه واجب وإن لو مفيش أرض يبقي مفيش أهل علي عكس أمير صلاح اللي كان شايف إن حماية أهله أهم من حماية أرضة، مشيداً بأهمية القناصين في أي معركة حربية .. والشرنوبي اللي جسد أهمية العلم في المعارك .. وأحمد فلوكس اللي جسد العزة والكرامة في كل كلمة نطقها خلال العمل الفني .. وأخيراً أحمد رزق اللي قام بالدور الفكاهي طول الفيلم لأن إحنا فعلاً شعب فكاهي، بنخلق النكتة من وسط ألف هم .. ده غير إياد نصار وأسماء أبو اليزيد وناس كتير أبدعوا في أدوارهم علي أكمل وجه.
“الممر” مش مجرد فيلم عادي .. ده فيلم للأجيال اللي جايه بأسلوبهم وبطريقتهم .. وأداء شريف عرفة كمخرج فيه كان ممتاز بصراحة ويقال إنه ناوي يعمل فيلم ثاني بأسم الثغرة برده من ملفات حرب أكتوبر إستكمالاً لسلسلة الممر .. بنتمني لية التوفيق ويستفاد من الأخطاء اللي بيقال إنها موجودة في الفيلم اللي جاي ده لو في أخطاء أصلاً.
