جلا هشام هي ممثلة شابة مصرية أشتهرت الفترة الماضية بدور هدير في حكاية بدون ضمان من مسلسل الا انا.
درست في كلية الإعلام قسم أذاعة وتلفزيون، ودخولت مجال التمثيل بأخذها ورش عمل وهي عمرها ١٧ عام وذهابها إلى الكاستيج وهي ١٧ عام
وكانت بداية دخوها المجال الفني عام ٢٠١٦ كان معروض عليها فيلم قصير أسمه “جبل البنات” وحصل على العديد من الجوائز كما شاركت في مسلسل لمس اكتاف عام ٢٠١٩، وكان لمجلة هافن حوار خاص معها.
- مين رشحك لدور هدير فى حكاية بدون ضمان؟
اللي رشحني لدور هدير في الحكاية المخرجة ياسمين احمد كامل واتكلمنا في الدور وقالتلي عايزاكى في دور هدير واننا نعمله ازاى وشايفين هدير ازاى وليه هدير كده.
- ايه اللى جذبك للشخصية؟
انا جذبني المسلسل الاول عشان ابقى صريحة كفكرة الا أنا لأنه قصص ناجحة جدا ولذيذة جدا وهو اصلا مسلسل نسبة المشاهدة عليه عالية جدا فى كان مهم جدا اني اكون جزء منه.
اللي جذبني في الشخصية انه ليها ابعاد كتيرة اوي مش باينة في المسلسل وهى اللي موصلاها انها تبقى كده ان باباها متوفي وقاعدة مع اسرة بتتصرف بالطريقة دى ودى افكار ودى طريقتها ومش عندها خصوصية لسه مش اتجوزت والناس كلها بتتجوز ومش بتشتغل فى كل دي عوامل كتيرة اوى ممكن تأثر انها تخلي شخصية زى هدير تبقى عندها نسبة اذى
ومش عايزة اسميه شر فى هى عندها مشاكل كتير وكم الحاجات الكتير اللى عندها طافحة بالمنظر ده ممكن ميكنش باين اوى في القصة بس انا لما ذاكرتها ذاكرتها على الاساس ده وكان بالنسبالى ان ده مبرر جدا للى هي اللى بتعمله من الحاجات اللى هى حاساها بالنسبة لشخصية هدير فى البيت اللى هي اتربت فيه
- احكيلنا عن كواليس العمل كانت ازاى؟
كواليس العمل كانت مرهقة اوى كان عدد ساعات كتير اوى بس كانت لطيفة اوى مع استاذة سلوى واسلام وهنادى وكنا بنضحك كتير ونهزر
بس كان في لغبطة فى المواعيد كان فى ارهاق عليا انا مش من العمل لانى بعمل كذا حاجة تانية فى نفس الوقت فى كان الموضوع مرهق جسديا عليا جدا
- كلمينا عن علاقتك بكاست العمل؟
بحب استاذة سلوى واسلام جدا واسلام اخويا فعلا كنا بنهزر وننكش فى بعض دايما واستاذة سلوى ممثلة كبيرة جدا فى كان حاجة مهمة ان انا بقف ادامها وكنا بنضحك ونهزر ونتكلم في حاجات شخصية
اما هنادى بقى انا كسبتها وبحبها جدا كفنانة وكشخصية وكانت متواضعة جدا وكانت لذيذة معايا وبتدعم كل الناس ومبسوطة انى اتعرفت عليها واشتغلت معاها
- ايه هى وجهة نظرك فى الزواج فى بيت عيلة؟
برفضه رفض تام لحد اما اموت هو مش اوبشن بالنسبالى وبرفضه جدا ومش بشوف انه صح الا فى ظروف معينة زى انه الاب مش موجود والام عندها مشكلة صحية مثلا احنا منسبهاش لوحدها
وده يبقى لازم برضا الطرفين ان احنا منسبش حد تعبان لوحده لكن غير كده انا ضد الجواز فى بيت العيلة لان فى خصوصية معينة بتطلب وفى حياة بتتبنى مع شخص غصب عن العيلة وبيبقى بحب بيبقى فى تداخلات وبيبقى احساس انهم محتاجين الونس
فدى بالنسبالى حاجة مش قد كده الا لو فى حالة الاب او الام عندهم مشكلة صحية ومينفعش نسيبهم لوحدهم
- من وجهة نظرك ازاى تكون علاقة الاخت بزوجة اخوها؟
تبقى اختها ويبقوا اصدقاء دى هتبقى علاقة دم جديدة من غير مايكون ليها علاقة بالدم هتبقى اختى اللى بابا وماما مجابوهاش فى لازم يبقى فى احترام وتوافق وصداقة لانهم هيبقوا شايلين بعض وفى ضهر بعض لما يحصل اى موقف لدى او لدى فى حاسة انها حاجة مهمة جدا
- من وجهة نظرك ازاى نمنع مشاكل الزواج فى بيت العيلة؟
يبقى فى نقاش صريح جدا من الاول فى كل حاجة يانوافق يانرفض لان الدنيا اختيارات يعنى انا عندى نقط معينة وهو عنده نقط معينة يااقبل ياارفض الموضوع كله
لكن فكرة ان اتنازل عن شخص بحبه انه يحصل حاجة تفاجئنى فما بعد مينفعش فى الصراحة لو مش موجودة من الاول انه انا مينفعش معايا نقط معينة وهو مينفعش معايا نقط معينة بكل صراحة
- نصيحتك ايه للبنات بان الزوجة واخت زوجها تكون علاقتهم كويسة ببعض؟
ان فى الوقت بتاع الخطوبة يبتدوا يتعرفوا على بعض يشوفوا طباع بعض اكيد مش هلاقى فيها كل الحاجات الجميلة اللي في الدنيا بس نكتشف بعض ونتقبل عيوب بعض ونشوف طريقة اننا نتعامل بيها مع بعض بحب
ونبقى عارفين ان اخويا اللى هو اقرب حد ليا ان هى هتبقى مراته وليها احترامها خصوصيتها وليها اسرارها اللى لازم احافظ عليها ونصيحتى للناس يبتدوا يتعرفوا على بعض فى فترة الخطوبة
- اي الأدوار اللي بتتمني تعمليها؟
اتمنى اعمل كل الادوار اللى في الحياة كل البني ادمين حقيقية او مش حقيقة انا حابة اكتشف شخصيات وبنى ادمين مختلفين وبطلعهم للشاشة عشان ناس كتير تتعاطف معاهم تتعلم منهم حاجة تتبدى تشوف نفسها فيها او حد يعرفوه فيها او يفيدهم وينور مخهم لحاجة
ومش فى دماغى ادوار معينة نفسى اعملها ومش حابة اتحط فى ادوار معينة او فى طبقة اجتماعية معينة حابة انى العب فى كل الاتجاهات واحاول اثبت نفسى فى كل حاجة فيهم واشتغل على نفسى ف كل حاجة فيها
- هل في أعمال جديدة ليكي أو معروض عليكي أعمال؟
كان فى واعتذرت عنه لانى تعبت جدا فى بدون ضمان صحيا وحسيت ان لو اخدت اعمال تانية فى وقت انا مش تمام فيه مش هعرف اديله حقه وهكروت فيه عشان عايزة ابقى موجودة فيه وده مش السكة بتاعتى خالص
انا نفسى كل عمل بديله حقه فى الشغل والمذاكرة والتركيز عشان ابقى بطلعه باحسن شكل ممكن وانى ممكن اكون بعمل كذا عمل شبه بعض او مش فيهم فرق وده بيطلب منى الجرأة انى اقول لا على اعمال ان احترم جسمى واديله راحته الكافية انى استجمعت طاقتى للى جى واكون احسن فيه
