• سعيد إني اقدرت أوصل مشاعر الأطفال اللي بيعانوا من مرض السكر بطريقة صحيحة
• دوري في حكاية “سكر مر” جديد ومأثر وكان تحدي بالنسبة
• المخرج زود لي المشاهد من كتر ما كان مقتنع بأدائي
• أصعب المشاهد هي مشاهد المواجهة بيني وبين والدي والدتي
• ردود الأفعال كانت جميلة جدًا والناس متأثرين بالدور
حقق الطفل الموهوب “آدم وهدان” نجاحًا كبيرًا من خلال مشاركته حاليًا في بطولة مسلسلي “الآنسة فرح الجزء الرابع، حكاية “سكر مر” من مسلسل “ورا كل باب”.
وكان لمجلة هافن حوار خاص مع والده الطفل “آدم وهدان”.
- ما الذي جذب “آدم” في المشاركة في حكاية “سكر مر”؟
إن الدور جميل، مأثر، جديد، وكان تحدي بالنسبة له، آدم عرف القصة قبلي لما راح عمل اوديشن مع أستاذ “محمد عبد السلام”، وشرح له الدور، وبعدها قالي: “أنا عاجبني الدور جدًا، الدور حلو ومأثر وهيخلي الناس تتأثر وتلمس الشخصية بتاعتي.
- وما هي استعداداته لدور “تامر”؟
أنا خليته يركز في قصته ومشاهده وحفظها، وبدأ يدرب على مشاهده قدام المراية ويشوف الأحاسيس بتوصل إزاي.
- وهل يواجه “آدم” صعوبة في حفظ السيناريو؟
لأ خالص، حتى كان في مشاهد فيها حفظ كتير أضافت وقت التصوير وحفظها بسهولة.
- ما هي أصعب المشاهد التي واجهته أثناء التصوير؟
أصعب المشاهد هنشوفها في الحلقات اللي جاية، مشاهد مواجهة بينه وبين والده ووالدته، مشاهد حلوة أوي.
- حدثينا عن ردود الفعل المبدئية حول دور “آدم” في حكاية “سكر مر”؟
ناس كتير علقت وخصوصًا الناس اللي أولادهم مرضى بمرض السكر، متأثرين جدًا، فرحانين بالمسلسل أنه لأول مرة مسلسل يناقش مشكلة “مرضى السكر” بالنسبة للأطفال، كمان شهر نوفمبر شهر التوعية بمرض السكر.
ردود الأفعال جميلة جدًا، فرحانين بأداء الولد حاسيين أنه: “طبيعي، قدر يوصل مشاعر الأطفال صح اللي بيعانوا من مرض السكر ربنا يشفيهم يارب.
- كيف كانت كواليس التصوير؟
كواليس التصوير كانت جميلة جدًا، كل الكرو بصراحة كانوا معجبين بأداء آدم ككل، كتير جدًا كانوا بيصقفوله بعد مشاهد معينة، كل الكرو كان بيشجعه وفرحانين بيه، آدم كان بيصور فترة طويلة علشان يلحقوا العرض.
كان مبسوط جدًا في التصوير مع أستاذة “منة فضالي”، وللأسف ماكنش في مشاهد تجمعهم كتير مع بعض، بس كان مبسوط بالتصوير معاها أوي.
أستاذ “مراد مكرم” كان طاير معاه من الفرحة، وإن شاء الله في عمل آخر هيجمعهم قريب، وأستاذ “مراد مكرم” كان بيوصيني عليه دايمًا، وكان معجب بيه أوي.
- ماذا عن تجربة “آدم” في العمل مع المخرج “محمد عبد السلام”؟
أستاذ “محمد عبد السلام” صاحبه، قاله أنا فخور بيك، وأنت دايمًا معايا، وكان في مشاهد كتير زودها له من كتر ما هو كان مقتنع بدور “آدم”.
- ما جديد “آدم” في الفن خلال الفترة المقبلة؟
جديد “آدم” إن شاء الله حلقة “مدد” من سلسلة حلقات “خارج السيطرة”، فيلم “الجريمة” إخراج “شريف عرفة” هو دور جميل ومأثر، مع عرض حاليًا مسلسل “الآنسة فرح الجزء الرابع، وعرض حكاية “سكر مر” من مسلسل “ورا كل باب”.
