دوري في حكاية “إن كبر ابنك” كان جميل جدًا ومتوافق مع أفكاري.
مع أن الست لو اتطلقت في سن صغير أنها تتزوج مرة أخرى.
أنا ضد تضحية الست لأنها لو ضحت بتبقى محتاجة كل اللي حواليها يضحوا.
الكواليس بيني وبين “وفاء عامر، نرمين زعزع” كانت أكثر من رائعة وحسيت أننا أصدقاء حقيقي.
ردود الأفعال كانت عظيمة وهايلة، والجمهور وصفني بالصديقة الوفية.
سعيدة جدًا بالتعاون مع المخرج “معتز حسام” وبترشيحه وثقته فيا.
أنا مهتمة بقضايا المرأة، وأتمنى تقديم أعمال تاريخية.
خالد الصاوي هو الأستاذ وأنا بتعلم منه طوال الوقت.
الفن رسالة ومسئولية سنحاسب عليها أمام الله، فيجب أن نختار ما نقدمها للناس.
هدى الأدريسي
الفنانة “هدى الإدريسي” فنانة مصرية من أصل مغربي، بملامحها الجميلة وشخصيتها الرقيقة وأدائها الصادق، نالت إعجاب الجمهور، وحققت نجاحًا كبيرًا.
قدمت العديد من الأعمال السينمائية ومنها: اللمبي، معالي الوزير، مبروك رمضان أبو العلمين حموده، إلى بالي بالك، حرب إيطاليا، كابتن هيما”.
ومن أبرز المسلسلات التي شاركت بها: “هي ودافنشي، الآنسة فرح، قصر العشاق، الصعلوك، ريش نعام، قوت القلوب، تامر وشوقية، السرايا”.
وحققت الفنانة “هى الإدريسي” مؤخرًا نجاحًا كبيرًا من خلال مشاركتها في حكاية “إن كبر ابنك” من مسلسل “زي القمر”، بطولة “وفاء عامر، نرمين زعزع”.
وكان لمجلة هافن حوار خاص مع الفنانة “هدى الإدريسي”.
- في البداية.. حدثينا عن أخر أعمالك دورك في حكاية “ان كبر ابنك”؟
كان دور جميل جدًا ورائع ومتوافق مع أفكاري؛ لأن أنا شايفة إن من حق الست تتجوز لو اتطلقت فى سن صغير وضدد التضحية لأن الست لما بتضحي بتبقي محتاجة كل اللي حواليها يضحوا بردو زي ما هى ضحت، فبالتالي بيطلع على الأولاد.
وبعدين من حقها کست لو اتطلقت في سن صغير إن يبقي ليها زوج وبيت مش عيب أبدًا أن الواحد ينفصل المهم أن هو يختار اختيار أفضل ويكمل حياته لأن الحياة مش بتقف على حد.
- وما الذي حمسك للمشاركة فى حكاية “إن كبر ابنك”؟
ترشيحي من المخرج طبعًا لأن أنا اشتغلت معاه، طبعًا أستاذة “وفاء عامر” لأن أنا أحب جدًا إن أنا أشتغل معاها، في تعاون بينا في بدايتي على مسرح “جلال الشرقاوي” منساش كواليسها وحبها للممثل فده كان من الأسباب الأساسية، وجود “نرمين زعزع” بردو فكنت حاسة إن إحنا أصدقاء حقيقي وأخوات.
- حدثينا عن ردود الأفعال التي تلقيتيها حول دورك؟
ردود الأفعال كانت عظيمة وهايلة؛ لأن الناس كلها اهتمت أو الستات بمعنى أصح بموضوع زواج الأم لو اتطلقت في سن مُبكر وكمان كان في اشادة بدوري كصديقة وفية مع صديقتها وده أسعدني جدًا.
- مع أو ضد زواج المرأة إذا كان لديها أولاد؟
مع زواج المرأة لو اتطلقت في سن صغير أو حتى لو أولادها كبروا وهاتعيش لوحدها، فهتبقى عبء على ولادها، وفي زوج مناسب وظروف مناسبة ليها انا مع جدًا.
- ماذا عن كواليس التصوير مع الفنانة “وفاء عامر” والفنانة “نرمين زعزع”؟
أجمل كواليس مع الاستاذة “وفاء عامر” إنسانة جميلة جدًا جدًا، فنانة رائعة بتحب الممثل بتحب زمايلها، بتحب كل الناس تبقى في أحسن صورة، شخصية جميلة جدًا وأحب جدًا إني أتعامل معاها تاني.
الحقيقة الصديقة والزميلة “نرمين زعزع” حبيبتي تعاملنا مع بعض بردو زمان فى مسرحية، شخصية جميلة جدًا انسانة جميلة وفنانة جميلة فالكواليس كلها فعلًا رائعة يارب دايمًا وبيبان على الشاشة على فكرة.
- ماذا عن تعاونك مع المخرج “معتز حسام”؟
أنا كنت سعيدة جدًا بالعمل مع أستاذ “معتز حسام” لأن أنا تعاملت معاه قبل كدا في 3 أعمال كمساعد مخرج، وكان باين أن هو مشروع مخرج قادم، سعيدة جدًا جدًا بالتعاون معاه وبترشيحه ليا، ثقته فيا.
- ما رأيك في المسلسلات متعددة الحكايات؟
فكرة رائعة وبتقدم أفكار مهمة جدًا.
- ما سبب غيابك عن السينما؟
بالنسبة للسينما هو كل المخرجين شباب جداد وللأسف معرفش حد فيهم متعاونتش مع حد فيهم، ودايمًا الترشيح بيبقي من خلال عمل بتترشحي لعمل تانى، فأنا في ناس كتير لسه محالفنيش الحظ اتعامل معاهم ودايمًا الدور الجيد بينادي صاحبه فأتمنى إن شاء الله طبعًا أقدم سينما قريب، أنا بحب السينما وكل الفنانين بيحبوا السينما، ربنا يكرم إن شاء الله.
- هل هناك دور معين تتمنى تقديمه؟
والله أنا مهتمة بقضايا المرأة، أي دور يبقي إضافة يبقى بيناقش قضية تخص المرأة بالتحديد أنا يهمني جدًا جدًا إني أقدمه.
- إذا عرض عليكِ تقديم السيرة الذاتية لشخصية تاريخية من تتمني أن تكون؟
أنا بحب جدًا الأعمال التاريخية وبدايتي كانت في مسلسل “نسر الشرق” مع الاستاذ الكبير الله يرحمه ‘حسام الدين مصطفى” في دور عظيم، كمان في مسلسل عظيم جدًا فأنا بحب الأعمال التاريخية جدًا وبحب اللغة العربية جدًا وكل الشخصيات التاريخية شخصيات ثرية جدًا طبعًا، فأتمنى إن شاء الله لو في فرصة انا مقولش أبدًا لأ لأي عمل تاريخي.
مش حاجة معينة مع إني شخصيات كتير أتمنى أقدمها، أنا بميل للأندلس، أتمنى اشتغل في عمل عن الأندلس، أقدم فيه شخصية جميلة.
- شاركتِ الفنان “خالد الصاوي” في العديد من الأعمال حدثينا عن كواليس العمل معه؟
خالد الصاوي أنا حالفني الحظ وشاركته معاه في أعمال كتير، بداياتي كانت معاه في “نسر الشرق” كنت زوجته، دا الأستاذ أنا بتعلم منه طول الوقت، بحب فعلًا أشتغل معاه، بحس أنه فيه كيميا، بيحب الممثل جدًا، وما بيبخلش بالتوجيه، فالعمل معاه رائع، وأتمنى يتكرر تاني بإذن الله.
- في النهاية.. هل تحبي أن تضيفي شئ أخر؟
أحب أقول إن الفن رسالة ومسئولية سنحاسب عليها أمام الله فأتمنى أننا نختار أعمالنا، نختار اللي إحنا هنقدمها للناس، خصوصًا الدراما التلفزيونية لأن إحنا بندخل بيوت الناس فنبقى ضيف خفيف، يأما نضيف يا أما بلاش نزعج المشاهدين، ويجب أننا نقدم أعمال تفيد المجتمع حتى لو ترفيه، أنا بسوف في الفن الجمال ماحبش أشوف صورة تانية.
