حوارات

سارة عبد الرحمن لـ “هافن”: عشان أقدر أجسد شخصية هداية ملاك كان لازم الاقي وجه شبه بيني وبينها

سارة عبد الرحمن ممثلة شابة مصرية تألقت في تجسيد شخصية هداية ملاك في حكاية “تقلها دهب” إحدى حكايات مسلسل “الا أنا” وكما اشتهرت بدور هبة في مسلسل سابع جار

مين رشحك لتجسيد شخصية هداية ملاك؟

اللي رشحني شركة أروما.

كان إحساسك لما عرفتي انك هتجسدي شخصية هداية ملاك؟

حسيت بالحماس و المسؤولية وكنت متحمسة جدا أن أنا أبدأ أحضر للشخصية.

احكيلنا عن كواليس العمل كانت ازاى؟

كواليس العمل كانت لذيذة جدا لان فريق العمل كله كان فيه احساس ان احنا بنعمل حاجة مهمة بالنسبالنا وكنا بنشتغل كتير اوى وكان لازم اننا نخلص التصوير عشان نعرض وكان في تركيز عالي.

كلمينا عن علاقتك بطاقم العمل وتجربتك معاهم؟

كانت تجربة مثمرة جدا لانه كان لازم نخلص تصوير في وقت قليل وكان في مجهود كبير اوى لازم يتحط وانا مبسوطة انى كنت مع فريق العمل ده بالذات.

ازاى جهزتى نفسك لتجسيد شخصية هداية ملاك؟

اتفرجت على كل الانترفيوهات بتاعتها وتواصلت معاها واتدربت تايكوندو كذا مرة وابتديت انى افهم الرياضة وافهم البطل الأوليمبي بيمر بايه غير التحضير العادي لأي شخصية انا بعملها.

ايه اصعب مشهد واجهتي صعوبة فيه؟

كانت أصعب مشاهد هي مشاهد طوكيو كانت صعبة فيها مجهود بدني كبير وكان في مشاهد كتيرة محتاجة مجهود بدني والمشاهد بتاعة صربيا كانت صعبة عشان فيها مشاعر كتير وكانت مشاعر ممكن تكون مش اسهل حاجة الواحد يحس بيها.

ايه رأيك في نوعية الشخصيات اللى زي فريد المحبط للي حواليه وبيحاول ييأسهم انهم مش هيوصلوا؟

الشخصيات اللي زي فريد دول بيبقوا اصلا محتاجين اهتمام معين ومحتاجين من جواهم حاجات معينة في حياتهم لانهم بيعملوا كده كرد فعل لحاجة جواهم وللاسف دول بيبقوا موجودين في كل حتة وكل مجال وبيبقوا محتاجين اهتمام اصلا وبتمنى ان الشخصيات اللي زي دي تلاقي الاهتمام اللي هما محتاجينه لأنهم بيأذوا اللي حواليهم.

الشخصيات زي دكتور يحيي والمهندس عزيز بتشوفيها ازاى؟

دول الناس اللي فعلا بيبقوا يعنى اكبر دعم للبطلة ووجودهم اعتقد مهم جدا جدا وزي ماشوفنا في الحكاية أنه دورهم محوري في انها تقدر تحس بالدعم ده وتكمل.

العيلة هى السبب الأساسي ورا نجاح بنتها ودعمها في اى حاجة بتحبها حتى لو المجتمع شايفها غريبة؟

بالنسبالي العيلة في حياة هداية كان جزء كبير اوي لان اعتقد ان هداية عليتها كلها رياضية وعندهم تايكوندو من زمان  وان هي متربية في بيت زي ده ساعدها جدا ودعم مامتها وأخوها وعيلتها كلها كان جزء كبير اوى من نجاحها وان هي تقدر تكمل بالرغم من ان بقيت المجتمع مش شايف ده فأنا اه متفقة جدا في جزء العيلة ده.

فى رأيك هل الجواز ممكن يعطل اي بنت تحقيق حلمها ونجاحها؟

مظنش لا أعتقد ان الجواز بالعكس وبالذات لو الزوج بيعمل معاها للحلم ده بالعكس ممكن يبقى حاجة بتساعد وبتدعم أكتر لتحقيق الأحلام او النجاح.

من وجهة نظرك شريك الحياة بيكون ليه عامل ودور مهم في نجاح اللي معاه زى عبد الرحمن عمل مع هداية؟

اه جدا شايفة جدا ان شريك الحياة ده مهم جدا يكون شايف وبيساعد ومؤمن بشريكة حياته أن هي تقدر تحقق اللي نفسها تحققه.

هل في تشابه في شخصية سارة عبد الرحمن وهداية ملاك في الحقيقة؟

حاسة اننا شبه بعض في حاجات انه بنكلم مهما حصل، طبعا هي بطلة أوليمبية ونفسي اوصل لإنجازات شبه انجازاتها وعشان اقدر أجسد الشخصية دي  كان لازم ألاقي وجه التشابه ما بينا وبين بعض.

هل في حياة سارة عبد الرحمن أشخاص بتدعمها وبتسندها زى هداية؟

اه طبعا بالتاكيد عيلتي بيساعدوني جدا وبيسندوني جدا وعندي مجموعة من الاصدقاء في المجال بيدعموني جدا وشغلنا صعب جدا ومحتاج ان الواحد ميكنش لوحده وانا ممتنة جدا لوجود الناس دي في حياتي.

ايه الادوار اللى بتتمنى تعمليها؟

انا نفسي طول الوقت اكون متنوعة وكل دور يكون مختلف عن اللى قبله وان انا افضل اتحدى نفسي واطلع حاجات جديدة كل مرة

 وان انا فالاخر جمهوري شايف حاجات مختلفة ويوصله اللي انا بحاول اوصله.

هل في أعمال جديدة؟

عندي مسلسل ال ٨ إخراج أستاذ أحمد مدحت.

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!