أعلن محمد الستار رئيس قسم الغناء بالمعهد العالي للموسيقى العربية، عن كواليس مقطع الفيديو الذي انتشر على مواقع التواصل الإجتماعي له هو ومطرب المهرجانات “حمو بيكا” حول، استعداده لخوض اختبارات نقابة المهن الموسيقية.
وكشف أن الصورة التي التقطت له وهو “حمو بيكا” كانت منذ عام تقريبًا وتم التقاطها بدون علمه وليس كما يقال عنها أنها التقطت الأسبوع الماضي كما قال “حمو بيكا”، حيث وصف الأخير بأنه شخص مخادع يميل إلى خداع الجمهور من أجل كسب المزيد من المتابعين، ووصفه بأنه شخص لا يريد التطور.
وقد نشر محمد عبد الستار عبر حسابه الشخصي على “فيس بوك” توضيح قائلًا به: “ردا على أصدقائي الصحفيين والإعلاميين المحترمين عشان ننهى الموضوع ده تماما، حمو بيكا شخص بيأدى نوعا من المزيكا أنا لا أؤمن به، ولا أسمعه ولكنه موجود ومنتشر ومش محتاج أى إنكار منى أو من غيرى.
واستكمل حديثه قائلًا: “رقم اتنين بكل بساطة النقابة عملت دورها قدام الإعلام، وأنهم يظهروا الحقيقة أنهم مش بيحاربوا حد من غير مبرر، وحبوا يساعدوهم أو يمدوا أيديهم بمعنى أصح لأشهرهم، ونظرا للثقة الكبيرة الحمد لله من أعضاء النقابة فيا وفى تاريخى فى تدريب الأصوات لأسماء كبيرة جدا دربتها طول حياتى، ومش هذكر حد منهم احتراما لخصوصيتهم، تم ترشيحى انى أدربه عشان يقدر يؤدى فى الامتحان، واللى حصل بكل بساطة أننا اتقابلنا مرتين ومن خلالهم قدرت أحدد هل هو يملك الموهبة اللى تخليه يؤدى فى الامتحان ولا لأ.
وأضاف: “بعد المرتين اللى ممكن يكونوا بقالهم سنة تقريبا واللى اتاخدت فيهم الصور من غير علمى بالمناسبة، ما حصلش أى مقابلة تانى نظرا لعدم اهتمامه من الأصل أنه يطور من نفسه أكتر أو يحاول يكون أحسن هو بس بيحاول يكسب تعاطف، ويعمل استعراض أنه بيحاول وده مش حقيقى أبدا، وده كل الوضع بالتفصيل الدقيق”.
وتابع: “وبكده فعلا مفيش أى كلام تانى ممكن يكون عندى أو معلومات أكتر، الموضوع ده للأخوة الصحفيين المحترمين اللى بشكرهم على اهتمامهم اللى بردو كنت أتمنى يكون مساويا للدعم اللى بيتقدم على مدار سنين منى ومن زمايلى المحترمين، أن إحنا نقدم أصوات محترمة وتستاهل ونكون سببا فى رفع الذوق العام، ولسه أتمنى ده يحصل”.
وقد ختم حديث قائلًا: “المجتهد ضعيف الموهبة هينجح وهيبقى حاجة، ومتكامل المواهب اللى قاعد فى البيت مستنى الناس كلها تيجى تخبط على بابه هيفضل حياته كلها فى بيته، وأخيرا أنا دورى كمدرب للأصوات لفترة تتعدى “30” سنة، وأستاذ دكتور ورئيس لقسم الغناء بالمعهد العالى للموسيقى العربية بيخلينى مستحيل أرفض أساعد حد، وبالعكس فيه أقل منه موهبة ويمكن شفت تعليقاتهم ومبسوط أنى قدرت أساعدهم بفضل ربنا يكونوا أحسن ويبقى كمان عندهم الثقة اللى تخليهم ينتقدوا، الكل يستاهل فرصة يتحدد له هو يقدر وعنده موهبة حتى لو بنسبة ولا لا”.
يذكر أن نقابة المهن الموسيقية المصرية برئاسة النقيب “هانى شاكر”، كانت قد أصدرت قرارًا بمنع التعامل مع عدد من مطربي المهرجانات أبرزهم “حمو بيكا”.
وجاء البيان الذي صُدر من نقابة المهن الموسيقية كالآتي: “قررت نقابة المهن الموسيقية منع التعامل مع كل من “حمو بيكا، نور التوت، مسلم، عنبة، أحمد موزة”، ويمنع كل من ليس عضوًا بالنقابة وغير مصرح له بالعمل.
وقد صرح “حمو بيكا” بعدها بأنه يريد العمل ويريد الغناء والتصريح ليخرج الفنان “هاني شاكر” ويؤكد على أن من حق “حمو بيكا”، خوض الاختبارات من أجل الالتحاق بالنقابة العام المقبل.
