الفن نيوزفن

رانيا منصور لهافن: الحكمة دي صفة حلوة اوي لازم الواحد يبقي عنده حكمة في التفكير والكلام

شهد شاهين

الفنانة رانيا منصور فنانة مصرية درست التمثيل في كلية آداب قسم مسرح وبدأت مسيرتها الفنية كفتاة اعلانات ثم اتجهت للتمثيل وكان اخر اعمال الفنانة مسلسل حي السيدة زينب بطولة محمود عبد المغنى، سوسن بدر، ليلى عز العرب ومن أشهر أعمالها فيلم حلم عزيز بطولة احمد عز.

وكان لمجلة هافن حوارا خاص مع الفنانة رانيا منصور لتكشف فيه عن تفاصيل مشاركتها في مسلسل كريمة كريمة وعن رأيها في الاعمال الفنية.

واليكم نص الحوار:

متي بدأت مسيرتك الفنية؟
بحب التمثيل من وانا صغيرة كنت ديما بشتري كتب للتمثيل في المدرسة ولما كبرت قررت ان انا ادرس تمثيل في كلية آداب قسم مسرح وابتديت اعمل اعلانات وكنت بعمل كاستينج قبلها في مسلسلات وافلام لحد ما اختاروني في مسلسل

ما هو اول عمل ليكي؟
مسلسل كلمة حق بطولة ميرفت امين واخراج سامي محمد علي

حدثينا عن تجربتك في مسلسل كلمة حق؟
كان اول مسلسل ليا اشتغلت فيه انا روحت كانوا بيعملوا كاستينج للدور اللي انا عملته واختاروني اختارني المخرج قابلت المخرج يومها وقالي المشهد وقريت المشهد وقالي طب روحي ذاكري وتعالي علي يوم التصوير روحت التصوير وكنت مذاكرة المشهد كويس جدا جدا وصورت من اول تيت فكان مبسوط مني جدا ومكنش مصدق انه اول مرة امثل انا طبعا كنت درست تمثيل من وانا صغيرة وكمان فترة اللي انا اشتغلت فيها في الاعلانات فادتني طبعا ان انا اقف في الكاميرا واتعلم ازاي ان انا اكسر رهبة الكاميرا ده ساعدني جدا لما مثلت في اليوم اللي كان هو اول يوم تصوير ليا اني مثلت كويس عشان انا كنت يعني كانت اول مرة امثل في المسلسل بس مكنتش اول خبرتي في التمثيل وبس والحمد لله طبعا المسلسل انا مبسوطة بية جدا ومبسوطة ان انا اول مسلسل ليا اشتغله مع الفنانة الكبيرة ميرفت امين ودي كانت بدايتي

ماهي الصعوبات التي واجهتك في مسيرتك الفنية؟
كانت في البداية لان انا خريجة جامعة اسكندرية وكان المفروض اجي اعيش في القاهرة علشان اعرف أمثل وانا طبعا مكنتش اعرف حد خالص يعني مكنتش عارفة ابتدي منين بالضبط علشان مفيش حد يعرفني مفيش حد ممكن يرشحني في دور ففي الاول ابتديت اروح شركات الاعلانات واعمل كاستينج فاختاروني في اعلانات واصور اعلانات لحد ما كنت بحضر كاستينج وكده ولحد ما اترشحت في اول حاجة بس في البداية كانت الصعوبة ان انا أقدر اقنع اهلي ان انا اسافر من اسكندرية واجي اعيش في القاهرة مكنتش حاجة سهلة

كيف كان شعورك عن تعاونك مع نجوم كبار مثل ماجدة زكي في مسلسل كريمة كريمة؟
مسلسل كريمة كريمة ده كان مسلسل لذيذ جدا وانا كنت بحبة اوي وبحب ان انا اشتغل فيه طبعا الفنانة ماجدة زكي فنانة بسيطة وتحسي انها مامتك يعني فكنت بحس انها زي مامتي فعلا وهي بسيطة كدة وانتي بتشتغلي معاها تحسي ان هي بتتعامل ببساطة مفيش تكلف لطيفة طبعا جدا وحبيت الشغل معاها

من مصدر الدعم بالنسبة لكي؟
اختي واهلي هما اكتر حد داعم بالنسبالي تحديدا اختي ومامتي

من هم الممثلين الذي تتمنين العمل معهم؟
نفسي اشتغل مع محمد رمضان واحمد السقا

من مثلك الأعلى في مجال التمثيل؟
في ممثلين طبعا كتير بيعجبوني سواء في مصر او برا مصر فمن كل حد بتاخدي حاجة يعني كل حد عنده ميزة عنده حاجة معينة بس مفيش حد شبة الثاني فمقدرش اقولك ان انا مثلا زي فلانة مقدرش اقول كدة كل حد ببقي معجبة فيه بحاجة معينة

من أقرب ممثلة لقلبك وتريدين العمل معه؟
أقرب ممثلة لقلبي مني زكي ومنة شلبي اكتر ممثلين أحب اتفرج عليهم

ماهي امنيتك هذه الفترة؟
ان انا اتطور يعني حاسة ان انا في تركس كدة معينة في حياتي ممكن تكون معطلاني شوية فحاسة ان التركس دي موجودة عشان خاطر انا اتعلم منها حاجات واعدي واروح ليفل اعلي فأمنيتي ان انا أعدي من التركس دي

ما هو الدور الذي قمتي به والاقرب الي قلبك؟
كلهم بحبهم كل الادوار اللي انا عملتها بحبها ممكن يكون في ادوار أقرب شوية يعني اخر دور عملته كان اسمة ليلي في مسلسل حي السيدة زينب بحب اوي الدور ده

ما هو فيلمك العربي المفضل؟
اكتر فيلم بحبة واللهي عندنا افلام حلوة وانا بحب الافلام العربي القديمة والافلام الجديدة يعني اخر فيلم اتفرجت علية اسمة من اجل زيكو فيلم ده لطيف انو كانوا في يعني شغل حلو وفي اخراج حلو وفي تمثيل حلو والفكرة حلوة والتأليف حلو ومعمول ببساطة كدة كن غير فذلكة ومن غير امكانيات كتيره بس هو من كتر كدة طلع حلو اوي اوي

ما الامر الذي يشعرك بعدم الارتياح؟
الكذب والخداع بلاقي شخص بيكدب عليا وبيحاول ان هو يخدعني بحس ان انا مش مرتاحة

كيف كان استعدادك لتصوير فيلم حلم عزيز مع الفنان احمد عز؟
فيلم حلم عزيز من الافلام اللي انا مبسوطة ان انا اشتغلت فيه مع الفنان احمد عز لطيف طبعا جدا والمخرج الاستاذ عمرو عرفة انبسطت جدا بالشغل معاهم واستعديت للدور في وقت قياسي وانا اختاروني اعمل الدور واتحضرت للتصوير في وقت قليل اوي هما كام يوم كدة كانوا قبل التصوير وبعدين كنا داخلين تصوير فقريت الدور وديما بشتغل مع acting watch فبتناقش معاه في الدور ونطلع تفاصيل للشخصية وبدخل اصور

ماهي الصفات التي تتمني ان تمتلكيها؟
الحكمة دي صفة حلوة اوي لازم الواحد يبقي عنده حكمة في التفكير والكلام ووجهة نظر في الحياة عمتا دي حاجة مهمة جدا

من هو اكتر فنان استفادتي منة خلال مشوارك؟
واللهي كل حد بتعلم منة حاجة ناس مختلفة فكل حد عنده حتة بتميزه عن الثاني فانا باخد الحتة الحلوة وبتعلمها

من وجهة نظرك مهنة الفن محتاجة اي عشان تطور؟
مهنة الفن يعني الافلام والمسلسلات والاعمال الفنية اللي بتتقدم احنا واصلين لمستوى مش وحش ابدا بس طبعا الواحد لما بيتفرج على اعمال فنية برا مصر بيبقي فيها نسبة ابهار اكتر ولو ان حاسة ان الفترة الأخيرة المخرجين بيتابعوا بصراحة بيتابعوا الافلام الفنية والافلام العالمية لدرجة كبيرة فأعتقد ان في نسبة من التطور حصلت بدرجة كبيرة فأعتقد ان في نسبة من التطور حصلت كبيرة بس محتاجين اكتر أه محتاجين اكتر بصراحة محتاجين اكتر دراسة وإمكانيات

ماهي الانجازات التي حققتها في حياتك العملية؟
احلي انجازات عملتها في حياتي العملية ان انا عندي أجمل بنوتة اسمها “تونا”

هل تتمكني من العمل تحت الضغط والتوتر؟
احنا ديما بنشتغل تحت ضغط وتوتر ضغط الوقت والتوتر ان نلحق نخلص وديما بنشتغل تحت ضغط وتوتر

ماهي النصائح التي سوف تقدميها لكل من يعمل معك ضمن الفريق؟
النصائح اللي بقدمها لاي حد
الروقان يعني بالرغم الضغط والتوتر اللي بنشتغل فيه ده والواحد اشتغل بروقان ومزاج وركز هنعرف نستغل الوقت اكتر استغلال ممكن دي حاجة مهمة ان انتي تعرفي تستغلي الوقت متضيعيش ولا حاجة من الوقت من غير ما تستغليه

كيف تتعاملي مع مشكلة واجهتك اثناء العمل؟
بتجاهلها وبكمل علشان لو وقفت عند كل مشكلة في الحقيقة عمتا في شغلي بس لو كل واحد وقف عند كل مشكلة مش هيعرف يكمل ومش هيعرف يعدي دايما نحاول نكمل وتوجدي حلول او مبررات او تسامحي

ماهي مصادر القوة التي تمتلكيها في شخصيتك؟
مصادر القوة التي امتلكها في شخصيتي ان انا بعرف اتغير وبعرف ابقي Flexible مع المواقف ومع الشخصيات مبنشفش نفسي كدة ومبنشفش دماغي دايما بحاول حتى لما بيبقي فيه حد مختلفة معاه تماما بقعد كدة مع نفسي قاعدة وبفكر هو الشخص ده بيفكر ازاي ومبرراته اي وبيعمل كدة لي وفي نفس الوقت انا كمان بعمل كدة لي واي مبرراتي في الحاجة اللي انا متمسكة بيها او في دماغي لحد ما بقتنع يا برأيي يا برأية يا برضا بحل وسط فان انا Flexible كدة وبقدر اتكيف مع الظروف والمواقف واعتقد ان في مصدر قوة في شخصيتي

ماهي المعوقات التي تقف امام خطتك المستقبلية؟
مفيش معوقات بتقف امام خطتي المستقبلية انا بشوف كدة طول الوقت الواحد لو ركز في شغلة وركز في نفسه وركز في حياته هيتطور وهيعرف يكمل لكن لو هنقف عند كل العقبات دي مفيش حاجات بتوقفنا ومفيش حاجة تقدر توقفنا اصلا يعني

ما هو الامر الذي تؤمني به لدرجة كبيرة؟
الامر اللي بؤمن بية لدرجة كبيرة المحبة تحسي ان المحبة ممكن تغير حياة اي شخص لو انتي بتتعاملي بحب مع كل حاجة بتعمليها ومع كل حد بتتعاملي معاة من منطق ان ده انسان خلقة ربنا مكرم زيه زيك فلو انتي الحاجات اللي بترضيها علي نفسك بترضيها علي الناس واللي مبترضيهوش علي نفسك مبترضيهوش علي الناس فأعتقد ان دي حاجة يعني مهمة جدا وانا مؤمنة بيها اوي اوي وكمان مؤمنة ان اللي بيفكر في حاجة وحشة بيركز علي الحاجات السيئة او الشيء عمتا اللي انتي بتركزي فيه بيجيلك فيفضل ان انتي لو عقلك واخدك او تفكيرك او مشاعرك واخدكي نحية حاجة مش سيئة اعتقد ان انتي عليكي بسرعة ان انتي تتخلي عن الموضوع ده لان مهما فكرت فيها او مهما ركزت معها مش هتروح بالعكس بتزيد والعكس طبعا صحيح

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!