تجربة راجعين يا هوى أى حد يتمنى يشتغل فيها
النظارة دى قصة لوحدها المخرج طلبها ولفيت سوق النظارات عشان تكون مناسبة للشخصية
وفاء عامر دمها خفيف وروحها حلوة فى اللوكيشن
ميس أميرة فى دايما عامر شبهى
نفسى أعمل سيكو دراما وبقول شكرا لكل حد آمن بيا
ريهام الشنوانى هي مضيفة طيران فى الأصل، لكنها حققت المعادلة الصعبة وقدرت تثبت نفسها فى عالم الفن والتمثيل وأصبحت فنانة صاعدة ومتميزة جدا، قدرت فى وقت صغير أنها تتفوق على نفسها وتثبت نفسها فى اكثر من عمل درامى.
حيث أنها التحقت بورشة الفنان محمد صبحى، ثم شاركت فى مسرحية “سينما مصر” بناءا على ترشيح من المخرج خالد جلال.
ومن أبرز أعمالها مسلسل الا أنا الجزء الثاني ومسلسل اللعبة وفيلم معالى ماما، وايضا تشارك فى الماراثون الرمضانى لهذا العام بمسلسل دايما عامر وراجعين يا هوى، وكان لمجلة هاڤن حوار متميز معها، واليكم نص الحوار/
فى بداية الحوار حدثينا عن تجربتك فى مسلسل راجعين يا هوى ؟
كفايا اقولك انها قصة اسامة انور عكاشة وإخراج محمد سلامة وحوار محمد سليمان عبدالمالك و بطولة النجم خالد النبوي دى تجربة راجعين يا هوى اي حد يتمنى انه يشتغل فيها.
هل كان فى تحضيرات معينة للدور؟
اه طبعا كان في تحضيرات كتير مع المخرج محمد سلامة على الدور وطبيعة الدور ورؤيته اتفقنا على كل حاجة وطبعا رغده هلال الاستايلست كان فى تحضيرات معاها كتير بالنسبة لللبس والاستايل المناسب للشخصية، والنظارة طبعا دى قصه لوحدها استاذ سلامة هو اللى طلبها كده لفيت عليها في سوق النظارات عشان تكون مناسبه جدا للشخصية.
وماذا عن العمل مع الفنان اسلام ابراهيم؟
الشغل مع اسلام ممتع جدا كفاية دمه الخفيف وروحه الحلوة فى اللوكيشن وانا بحبه من زمان وفرحت جدا اول معرفت انه جوزى فى المسلسل و انا محظوظه بصراحه ان يكون معايا حد زى اسلام فى روحه الحلوة ومعاملته ومساعدته ليا و جدعنته.
هل واجهتك أى صعوبات أثناء تصوير مسلسل راجعين يا هوى ودايما عامر نظرا لتقارب مواعيد التصوير؟
لا الحمدالله الدنيا كانت متظبطة وكل الناس متعاونة فى التصوير بس طبعا مجهود عليا، بس كله يهون في سبيل حاجة الواحد بيحبها.
كيف كانت كواليس العمل مع الفنانة وفاء عامر؟
عسل عسل عسل كلها ضحك هى دمها خفيف اوى وجدعة اوى اوى بحب روحها في اللوكيشن اوى وكفاية انى بمثل معاها.
من وجهة نظر ريهام الشنوانى الجمهور بيمثل كم فى المائة من نجاح العمل؟
الجمهور بيمثل كل حاجة 100% الجمهور هو اللى بيصنع الممثل وممكن ينزله سابع ارض وفى الاخر الواحد بيقدم حاجة للجمهور هو الحكم الاول والاخير .
وما الذى جذبك فى دور “ميس أميرة” فى مسلسل دايمًا عامر؟
ميس اميرة شبهى دى أكتر حاجة شدتنى ليها ودمها خفيف وفضولية وده كان مختلف تماما عن راجعين يا هوى.
قدرتى تتفوقى على نفسك فى مسلسل راجعين يا هوى ومسلسل دايمًا عامر..حدثينا عن المجهود الذى بذلتيه أثناء التصوير؟
والله أى مجهود يهون في سبيل ان الواحد يشوف نتيجة تعبه ومجهوده، كل حاجة بتتنسى.
طليتى علينا فى رمضان السنادى بخفة دم ولطافة..فـ من وجهة نظرك ايه الفرق بين خفة الدم والكوميديا المبتذلة؟
لا مفيش حاجة اسمها كوميديا مبتذلة، هى مدارس مش اكتر فى كوميديا افيه وفى موقف وفى فرس الدور هو اللى بيحكم ومخرج العمل طبعا و نوع العمل وطبعا نوعه سواء تلفزيون او مسرح.
لو جالك دور انك تمثلى قصة حياة حد من المشاهير هتختارى مين؟
انا بحب فؤاد المهندس وزينات صدقي جدا جدا ونفسي اعملها لو فى فرصه طبعا.
ايه الأدوار اللى نفسك تقدميها؟
نفسى اعمل سيكو دراما اوي وعموما انا لسة فى الاول نفسى اعمل كل الادوار بانواعها.
لو هتقولى كلمة شكرا من خلال الحوار ياترى هتقوليها لمين؟
ياااه ناس كتير اوى بصراحة نفسى اقول شكرا لكل حد امن بيا واداني فرصة وكل حد اتفرج عليا من وقته و شكرا لكل الناس اللى وقفت جنبى و دعمتنى سواء فى الوسط الفنى او اصدقاء.
ومع نهاية الحوار استمتعت جدا بالحديث معاكى، واحب اعرف رأيك فى الحوار؟
انا اللى استمتعت بيه وشكرا جدا ليكي ولوقتك و لأسئلتك اللطيفة دي و المُلمة.
