كعادته استطاع الطفل المتألق “زياد الشرقاوي” من جذب انتباه الجمهور له ولأدواره المميزة، وفي هذه المرة استطاع “زياد” أن يجذب تعاطف الجمهور بمشاهده المؤثرة في مسلسل “دنيا تانية” بطولة النجمة “ليلى علوي، حيث تمكن من تقديم دوره بشكل متقن ومؤثر، وأشاد الكثير بموهبته وأدائه المميز.
وكان لمجلة هافن حوار خاص مع “زياد الشرقاوي”
ما سبب حماسك للمشاركة في مسلسل “دنيا تانية”؟
بالتأكيد مشاركة النجمة “ليلي علوي” في عمل فني شرف كبير جدًا وسبب مهم جدًا إني أكون متحمس للشغل في مسلسل رمضاني من بطولتها؛ لأن هي ليها جمهور كبير والحمد لله إني محظوظ إن كل أعمالي كانت بمشاركة نجوم كبيرة.
وكيف تم ترشيحك لدور “سليم”؟
روحت اعمل (كاستتنج) على الدور بحضور مساعدين الإخراج الأستاذ خالد سعيد والأستاذ شادي مهران والحمد لله عجبتهم جدًا ورشحوني للأستاذ أحمد عبد العال المخرج اللي برضه قدرت أكسب ثقته من أول مشهد الحمد لله.
كيف كانت أجواء التصوير؟
من أول يوم والناس كلها في حالة تعاون وبنحاول كلنا نطلّع أقصى حاجة عندنا علشان المسلسل يطلع بشكل مرضي للجمهور.
كيف كانت كواليس التصوير بينك وبين الفنانة “ليلى علوي” والفنان “فراس سعيد”؟
الحقيقة أنا محظوظ بالشغل مع النجمة الأستاذة “ليلى علوي” اللي كانت طول الوقت بتساعدني في تفاصيل الشخصية وقد ايه ملاحظاتها كانت مهمة جدًا وساعدتني أطلع بشكل كويس وأنا بحبها جدًا جدًا علي المستوى الشخصي.
أما الأستاذ “فراس سعيد” فمن أول يوم كان لطيف جدًا وبنينا علاقة حلوة مع بعض ساعدتنا في إن الشغل يطلع بشكل حلو.
ماذا كانت تقول لك الفنانة “ليلى علوي” بعد المشاهد التي تجمعك معاها وهل وجهت لك نصائح؟
كنت سعيد جدًا بردود أفعالها علي مشاهدي اللي الحمدلله كانت مبسوطة منها جدًا هي والمخرج الأستاذ أحمد عبد العال وطبعًا كانت طول الوقت بتدعمني وتوجهني بشكل مستمر.
حدثنا عن ردود الفعل حول دور “سليم” حتى الآن؟
الحمد لله ربنا وفقني في الشخصية وردود أفعال الناس كويسة جدًا وقد إيه الشخصية كانت مؤثرة معاهم وطبعًا ده عرفته من كم الرسايل اللي جاتلي على السوشيال ميديا أو من خلال الناس اللي بأقابلها في الشارع.
دور “سليم” به العديد من التحديات والمشاعر، ما هي استعدادتك للدور؟
في البداية لما قريت الدور خوفت جدًا من التغيرات السريعة في الشخصية وتحولاتها بإنه بيفضل فترة ما بيتكلمش وبيدخل في حالة مرضية وأزمة نفسية وكان التحدي الحقيقي إني إزاي أوصل مشاعري للناس من غير كلام وده شيء صعب جدًا والحقيقة ساعدني في التفاصيل دي كلها المؤلف الأستاذ حمدي التايه بشرحه ليا تفاصيل الأزمة النفسية للشخصية ده غير إني اتعلمت درامز علشان تبان تفاصيل الشخصية حقيقية للجمهور.
ماذا عن تجربتك في العمل مع المخرج “أحمد عبد العال”؟
أنا سعيد جدًا بالعمل مع المخرج الأستاذ “أحمد عبد العال” اللي طول الوقت بيساعدني إني أطلّع أفضل حاجة عندي وأظهر بشكل كويس وبجد بأشكره جدًا هو وكل كرو الإخراج في المسلسل اللي حبيتهم جدًا علي المستوي الشخصي.
هل لديك أعمال الفنية القادمة بعد مسلسل “دنيا تانية؟
إن شاء الله قريب هكون متواجد في حاجات تانية جديدة وهتعجبكم لكن دلوقتي تركيزي كله في إنهاء تصوير مسلسل دنيا تانية وظهوره بشكل كويس.
