أستاذة كاملة أبو ذكري وقفت التصوير إمبارح عشان نشوف آخر التطورات مع المحاسب المخطوف.
الهجوم على مسلسل “بطلوع الروح” جاب نتيجة عكسية تمامًا برغم أنه منظم وممنهج ومعروف مين الي وراه.
عشان اللوك بتاعي طبيعي في المسلسل مش مكياج الناس بتفتكر إني داعشي بجد.
يشارك الفنان المتميز محمود فارس في بطولة المسلسل الذي أثار الجدل قبل طرحه “بطلوع الروح” وكشف لـ مجلة هافن عن دوره وتجربته بالاضافة إلى تفاصيل خاصة بالمسلسل وإليكم نص الحوار:
حدثنا أكتر عن تفاصيل دور أبو مصطفى جعفر في مسلسل بطلوع الروح؟
مصطفى هو قائد في قاعدة جيش الخلافة، وبيمثل الراجل الأول واليد اليمنى لـ الأمير عمر “أمير دولة الخلافة”، وله دور مهم جدًا في المسلسل لأنه ثالث رجال التنظيم في داعش وهنشوف باقي التفاصيل في الأحداث القادمة.
ما رأيك في الضجة التي حدثت من رواد السوشيال على المسلسل ميديا قبل عرضه ؟
هو فعلًا حصل هجوم شرس على المسلسل قبل عرضه أنا اعتبرته نجاح للمسلسل، لكنها حاجة غريبة أن الناس بتهاجم حاجة وبتغلط فيها وهي لسه مشفتهاش، بيتهألي الهجوم ده جاب نتيجة عكسية تمامًا برغم أنه منظم وممنهج ومعروف مين الي وراه، بس جه بإفادة كبيرة حتى مع بداية عرض أول حلقة الناس اتفاعلت مع المسلسل بشكل مذهل في جميع أنحاء الوطن العربي .
ما الذي جذبك في الدور؟
السبب أن هي شخصية جديدة عليا وكانت مفاجأة ليا والمجتمع ده كله كان مختلف عني، فالدور أداني فرصة أتعرف على داعش وعلى أفكارهم وعلى حياتهم وهي فرصة عظيمة من أستاذة كاملة أبو ذكري أنها ترشحني لدور كبير زي ده في مسلسل هي على رأسه ومع أستاذة منة شلبي كمان.
ما أغرب فعل من الجمهور واجهته أثناء التصوير ؟
عشان اللوك بتاعي طبيعي في المسلسل مش مكياج، الناس بتفتكر إني داعشي بجد وبيخافو وبيبعدوا عني وفي ناس بيهاجموني في حد هاجمني قبل كدة في السوبر ماركت بشكل عنيف والموضوع كاد أن يصل لكارثة.
والي حصل أني دخلت أجيب حاجة ونسيت إني بملابس الشخصية خالص، النتيجة إن هاجمني شخص بشكل حاد جدًا لغاية ما وقفته عند حده وقولتله إني مصري وبعد ما فهم واستوعب بقينا أصحاب .
هل تخوفت من رد فعل الجمهور على الدور خاصة أنهم حكموا على المسلسل قبل طرحه؟
لأ طبعًا، أنا مبخافش من دور بعمله ولا من رد فعل الجمهور لأن رد فعله مبيخوفش، حتى الهجوم والانتقادات بتكون في صالحنا، أحنا بنعمل عمل فني مش ماسكين أسلحة بجد يعني وبنقتل حد بس تأثير الحوار والفكر والسينما والفن هو الي مخوفهم ومخليهم يهاجموا المسلسل
السينما بالذات ليها تأثير كبير على الفرد أنا شايف أن أحنا عاملين “مسلسل سينما” ده تعبير مجازي عن الشغل الي انا شايفه فيه وقولت لأستاذة كاملة كدة، وكلنا مبسوطين بردود الأفعال وبنعمل عمل يليق بالدراما المصرية.
ودليل على نجاحه أن الجزائر كتبوا إمبارح أن المسلسل يعيد الهيبة للدراما المصرية والعربية ويعيد للدراما الرمضانيه مكانها الطبيعي وبتوجه للشكر ليهم.
ما هو أصعب مشهد واجهك أثناء تصوير المسلسل؟
لغاية دلوقتي صورت مشهد معركة حربية قعدنا نصور فيها فيه 9 أيام تحت المطر والتلج وكانت حاجة صعبة، ولكني مبسوط وأتشرفت بأستاذ كريم الشناوي أننا عملنا مع بعض المشهد ده وإن شاءالله لما أشوفه يكون حاجة مدهشة ويعجب الجمهور.
ماذا عن التعاون مع المخرجة كاملة أبو ذكري ؟
مخرجة عظيمة أي فنان في الوطن العربي يتمنى أنه يكون معاها، أتشرفت بيها ومبسوط أنا رشحتني بنفسها للمسلسل وهو ده التعاون الثاني لينا بعد فيلم “واحد صفر” وأتعاملت معاها لما كانت مساعد مخرج كمان وهي فعلًا ثقة كبيرة وأنا سعيد بيها
كتبت في منشور على فيس بوك “الحمد الله جت سليمة” حول اختطاف شخص من تصوير المسلسل هل ممكن أن تحدثنا عن تفاصيل أكتر وما آخر التطورات؟
هي فعلًا جت سليمة بغض النظر عن إشاعات أن أحمد السعدني أتخطف والفريق كلها أتخطف محصلش كدة، أنا مشيت قبل ما يخطفوا المحاسب ب ٥ دقائق بالظبط الي هو الي هو الأستاذ “صادق”، الفكرة أن الكاست كله كان موجود قبلها في المكان سواء أحمد السعدني، منة شلبي، إلهام شاهين كلنا كنا هناك فحصل لبس في الموضوع
وبالنسبة لآخر التطورات هو للأسف لسه مرجعش لغاية دلوقتي، وأستاذة كاملة أبو ذكري وقفت التصوير إمبارح عشان يشوف إيه هيحصل لسة مع أستاذ صادق.
