• أنا من فانز “أكرم حسني” ومحظوظة بالتعاون معه جدًا.
• لا يوجد تشابه بين شخصية رقية في “مكتوب عليا” وريهام في “فرصة تانية” ولكل شخصية قضية مختلفة تمامًا.
• ردود الفعل على دور “روقة” فاقت التوقعات.
• دوري في “النقطة العميا” أرهقني نفسيًا جدًا واستعنت بدكاترة نفسيين كتير.
• الكواليس مع “عم صلاح ومحمد عز” لذيذة جدًا.
• الموسم الرمضاني هذا العام ثري بالكثير من الأعمال التي تحمل قدر عالي من الجودة.
• تجربة الغناء كانت لطيفة جدًا ورد فعل الجمهور مان عظيم جدًا.
• تمنيت العمل مع “رشدي أباظة، عمر الشريف”.
• أشارك في فيلم “عمهم” بطولة محمد إمام.
“أيتن عامر” عندما تسمع اسمها تتذكر ضحكتها وروحها المرحة وخفة ظلها التي تجعلها قريبة من قلب الجمهور، بالإضافة إلى مواهب المتعددة؛ حيث استطاعت منذ أول ظهور لها في مجال التمثيل إن تلفت أنظار وقلوب الجمهور إليها، بأدوارها المميزة التي تختارها بعناية وتقدمها باحترافية، كما تألقت “أيتن” مؤخرًا بتجربتها في مجال الغناء التي نالت إعجاب الجمهور وأشاد الكثير بموهبتها وجمال صوتها.
وتشارك الفنانة “أيتن عامر” في الموسم الرمضاني الحالي 2022م، بشخصيتين متناقضتين تمامًا؛ حيث تقدم دور “رقية” البنت المرحة خفيفة الظل في المسلسل الكوميدي “مكتوب عليا”، بينما تقدم دور “داليا” التي لديها طبيعة نفسية مختلفة في مسلسل “النقطة العميا”.
وكان لمجلة هافن حوار خاص مع الفنانة المتألقة “أيتن عامر” تكشف لنا فيه تفاصيل مشاركتها في مسلسل “مكتوب عليا، النقطة العميا” وعن تجربتها في الغناء، كما تكشف لنا عن أعمالها القادمة.
في البداية.. ما سبب حماسك للمشاركة في مسلسل “مكتوب عليا”؟
اتحمست جدًا للمشاركة في مسلسل “مكتوب عليا” لأنه بطولة “أكرم حسني” وأنا من فانز أكرم وبحبه جدًا وقد إيه هو بني آدم جميل فعلًا وموهوب بجد.
حدثينا عن تعاونك مع الفنان “أكرم حسني” وعن نسبة الكوميديا في الكواليس؟
أنا اتبسط جدًا بالشغل مع أكرم والكواليس كلها كانت لذيذة جدًا وكلها ضحك وهزار.
ليست المرة الأولى التي تقدمي فيها شخصية الفتاة التي تحب من طرف واحد فما المختلف بين شخصية “سكر وريهام وروقة”؟
فعلًا أنا قدمت دور البنت اللي بتحب من طرف واحد قبل كده في مسلسل “فرصة تانية” ومسلسل “شقة فيصل” بس كل مره كانت بتبقى مختلفة عن التانية نظرًا للأحداث اللي حوليها، وأعتقد إن كل مرة الحمد لله بتتقدم بشكل مختلف.
“ريهام” كانت قضية مختلفة تمامًا غير روقة، ريهام كانت ضعيفة مقدرتش تعدي المرحلة اللي هي كانت فيها، لكن روقه عدت وقررت تنتقم، وشخصية “سكر” في مسلسل شقة فيصل عدت الموضوع وركزت في شغلها ولم تهتم بالإنتقام، فكل شخصية ليها خط مختلف.
حدثينا عن ردود الفعل حول دور “روقة” في مسلسل “مكتوب عليا”؟
ردود الأفعال فاقت كل التوقعات، أنا فرحانة جدًا بالشخصية وفرحانة جدًا إن الناس اتفاعلت معاها، في ناس كتير بيقولولي: “إحنا مش طايقينها وإحنا عايزين نضربها، دي لزقة، دي رزلة” وده حقيقي هي الشخصية كده فعلًا، “روقة” هي شخصية البنت اللي لازقة لأبن خالتها 24 ساعة وبتطارده في كل حتة، هي ثقافتها كده.
وماذا أضافت شخصية “روقة” لأيتن عامر؟
في ناس كتير شايفين إن أنا أول مرة أقدم دور فيه كوميديا مركزة أوي للدرجة دي، فيمكن ده فرق مع الناس أوي وبين جانب جديد فيا بالنسبة للناس؛ لأن مساحة الدور هنا مختلفة عن الأدوار اللي قدمتها قبل كده.
ماذا عن تعاونك مع المخرج “خالد الحلفاوي”؟
أنا كنت مبسوطة جدًا بالتعامل مع خالد دي مش أول مرة نشتغل فيها مع بعض، اشتغلنا مع بعض أكتر من مرة والحقيقة إنه كل مرة مابيخيبش ظني، دايمًا بيديني مسؤلية كبيرة وبيبقى واثق فيا إن أنا قدها والحقيقة إن أنا بحاول على قد ما أقدر أجتهد وأعمل مجهود مضاعف عشان أبقى قد المسؤلية اللي هو أسندهالي والحمد لله إن العمل طالع بشكل كويس وعاجب كل الناس.
في حدثينا عن مسلسل “النقطة العميا” ما هي استعدادتك لتقديم دور “داليا”؟
اجتهدت على نفسي حتى تظهر الشخصية بهذا الشكل، مسلسل “النقطة العميا” مسلسل له طبيعة خاصة، شخصية “داليا” ليها طبيعة نفسية معينة، تعاني من مطاردة ذكريات الماضي؛ لأن والدها ووالدتها ماتوا في حادثة.
شخصية “داليا” كانت مجهدة نفسيًا.. كيف أثرت عليكي؟
طبعًا.. دور “داليا” أرهقني نفسيًا جدًا.
هل استعنتِ بأطباء نفسيين لدراسة طبيعة شخصية “داليا”؟
فعلًا.. استعنت فيه بدكاترة نفسيين كتير جدًا؛ علشان أفهم إيه “النقطة العميا” وإيه الأعراض اللي بتم عن طريق تناول حبوب الهلوسة؛ لأنها اتلعب بيها لعبة كبيرة جدًا، “داليا” كانت ضحية انتقام لبعض الأشخاص كانت عايزة تنتقم من ناس تانية، فأستغلوا “داليا” وخلوها هي أداة الانتقام، ونظرًا إن زوج الشخصية وأولادها بيتوفوا في حادثة عربية بعد خناقة كبيرة وهي اللي بتطلب منهم أنهم يسيبوها ويمشوا فالشخصية بتعاني من الذنب ومطاردة عقدة الذنب طول المسلسل، إلي أن عقلها الباطن بيرفض الحقيقة دي وبتبتدي إنها تتخيل أنهم عايشين معاها وموجودين وده ال بيكتشفه المشاهد في أخر حلقتين، فالحلقات دي أثرت عليا نفسيًا جدًا.
وما هو أصعب مشهد احتاج منكِ تحضير؟
مشاهد المسلسل كلها كانت صعبة، خاصة مشهد اكتشاف حادثة وفاة جوزها وأولادها والكواليس كلها كانت مشدودة لحد كبير؛ لأن المسلسل طبيعته مختلفة، العمل الدرامي غير أكيد العمل الكوميدي، طبيعية الدنيا بتبقى مختلفة بس في أيام كانت بتبقى لذيذة ماكنش بيبقى فيها نكد وعياط كتير في المشاهد، فالموضوع كان بيبقى لطيف الحمد لله.
وكيف كانت كواليس التصوير مع الفنان “صلاح عبدالله، محمد عز”؟
الكواليس مع عم صلاح ومحمد عز بتبقى لذيذة أوي لأن “عم صلاح” تقريبًا مربيني و”محمد عز” صديقي من زمان من قبل دخوله الوسط الفني يمكن بـ 10 أو 11 سنة فمحمد صديق عزيز وعم صلاح في مقام والدي فذكريات كتير جميلة بنا.
“داليا، روقة” شخصيتين مختلفتين كيف وفقتي بينهم؟
شخصية “داليا” اتصورت قبل ما أبدأ “روقة” بكتير جدًا إحنا صورنا مسلسل “النقطة العميا” في أربع أسابيع، وخلصناه مع بداية مسلسل “مكتوب عليا” وكنت اتخلصت خلاص من شخصية “داليا” وقفلت ملفها وحطيتها على جنب وبدأت في شخصية “روقة”.
ما رأيك في السباق الرمضاني لهذا العام؟
السباق الرمضاني هذا العام أنا شايفة إنه ثري.. مليان أعمال كلها تحمل قدر عالي من الجودة.
وما هي الأعمال التلفزيونية التي حرصتِ على مشاهدتها؟
للأسف معنديش وقت كافي لمتابعة جميع الأعمال، لكن أتابع “راجعين يا هوى، الإختيار، المشوار، الكبير أوي” ولكن مش بشكل مستمر بس بحرص إني أتابع الأعمال دي كلما سنحت ليا الفرصة.
حدثينا عن تجربتك في مجال الغناء، وكيف استقبلتِ ردود فعل الجمهور على هذه الخطوة؟
كانت تجربة لطيفة الحمد لله، بحضر حاجات هتنزل بعد العيد على طول أغاني الصيف بقى لذاذة كلها ودمها خفيف وإن شاء الله تبقى جاهزه قريبًا للعرض.
ردود فعل الجمهور كانت بصراحة عظيمة الناس حبوا صوتي جدًا وحبوا الأغنية اللي أنا قدمتها ودي حاجة اسعدتني وإن شاءالله يحبوا كمان الأغاني الجديدة اللي هتنزل الفترة الجاية.
فنان من نجوم الزمن الجميل تمنيتِ العمل معه؟
أنا كان نفسي أشتغل مع “رشدي أباظة، عمر الشريف” ويمكن رشدي أباظة أكتر بحس إن أدائه التمثيلي وطبيعة الأدوار اللي كان بيقدمها تستهويني أكتر، كان بيعمل أفلام صعبة الحقيقة وكان دايمًا العنصر النسائي في الأفلام بتاعته كان بيبقى ليه تواجد بقوة وليه حضور ظاهر.
لو عرض عليكي تقديم دور فنانة من فنانات الزمن الجميل من تتمني أن تكون؟
أنا مابحبش أوي أعمال السير الذاتية ف معتقدش أن أنا هيبقى نفسي أعمل أي مسلسل بيتكلم عن سيرة ذاتيه لفنانة، لكن أقدر أعمل ده لو الشخصية دي لو الناس ماشافتهاش، مثلًا تكون دكتورة، شخصية ليها اشتراك في مشهد سياسي، إنجاز علمي، إنجاز فني بس ليس تمثيل ولا غناء ولا رقص، أحب أعمل كده أكتر.
في النهاية.. ما جديدك في عالم الفن خلال الفترة المقبلة؟
مشاركة في فيلم “عمهم” مقرر عرضه إن شاءالله في العيد، بقدم فيه ضيفة شرف مع “محمد إمام”، عندي أعمال بس بحضرلها المفروض لمنصات بعد رمضان بإذن الله بس بعد ما أخد أجازة محترمة كده وأفصل فيها وأعالج نفسي من كل اللي حصلي الفترة اللي فاتت.
