أب وشيخ ورئيس محكمة وصيدلي وطباخ متعدد الشخصيات، هو فنان قادر على خطف قلوب الجمهور من خلال صدق إحساسه في تقديمه الشخصيات جرئ له بصمة في الأعمال التي يقدمها.
يتحدث عن أية شيء بكل جرأة لا يخاف أحد هو الفنان والمبدع “محمد التاجي”، في حوار خاص لمجلة هافن عن أعماله الرمضانية التي يتألق فيها ويتحدث معنا حول القضايا التي تقدمها الأعمال التي يشارك بها ولكم نص الحوار…
مسلسل فاتن أمل حربي يقدم قضية مهمة مارأيك في هذا العمل؟
فاتن أمل حربي بيقدم قضية مهمة وللأسف إحنا واخدين القضية من جانب المرأة فقط لا القضية تشمل الرجل والمرأة ولحظات الظلم اللي بتقع عليهم وقت الطلاق والأطفال كمان بيقع عليهم ظلم لكن كله أخد القضية من وجهة نظر المرأة، لأن الراجل هنا غير سوي وغير شريف بتكلم عن شخصية “سيف” اللي بيقدمها “شريف سلامة”.
من هو شفيع في فاتن أمل حربي؟
شفيع هو المنقذ والمنتشل اللي مش معروف هو بيعمل كل دا ليه ومع الأحداث هنعرف كل شيء، وهي شخصية سيكوباتية الشكل وغريبة الشكل بها مشاعر متضاربة وهنعرف سره في الأخر.
دايما عامر مسلسل يتحدث عن المدارس والدراسة وخداع عامر للجميع هل ترئ أن هذا يمكن حدوثه في أرض الواقع؟
قضية التعليم في مصر بالنسبة لمسلسل ديما عامر هي قضية مزمنة وكل اللي جم يحلوها عقدوها أكتر وحتى وقتنا هذا وأنا أقصد كل كلمة أقولها إحنا في مصر مخطئين خطأ كبير في حق التعليم أنا كنت متوقع مع التجديد اللي بيحصل نجيب ناس من اللي أتخطت مراحل التعليم وتطورت وعملت فيه ثورة وطفرة في التعليم في بلادهم يمكسوا الأطفال من أول كي جي ويعلموا علشان يطلع معانا نشأ جديد، لأن اللي بيدخل كي جي دلوقتي لحد الأخر أمرنا لله فيه على كده واللي إحنا بنعمله دا قص ولزق وترقيع وحاجة محفوظة وأتعملت كتير مش حل للمشكلة.
مسلسل المشوار لمحمد رمضان يقول الجمهور عنه بأنه دون محتوى أو قصة… مارأيك في هذا الكلام؟
للأسف مش متابع بسبب عدم وجود وقت كافي لأستكمال تصوير دايما عامر وفاتن أمل حربي، بكون ديما موجود في معسكرات مغلقة فمقدرش أقول حاجة لأني معرفش هو عامل إيه.
ملف سري يحكي عن إتهام الأثرياء بالفساد حدثنا عن هذا العمل وماهو دورك فيه؟
مسلسل ملف سري كان مطلوب مني أقدم الشخصية اللي بيقدمها الزميل “علاء مرسي”، ولكن أعتذرت لأسباب فنية وزمنية وإقتصادية، فتواصلوا مع الزميل علاء مرسي وقدمها، ولكن المخرج كلمني وقالي خلاص تعالى قدم دور رئيس المحكمة ودي شخصية جديدة عليا وأول مرة أقدم حاجة بوقار وهيبة رئيس المحكمة، وأتمنى أن أكون قدرت أقدم دا بصدق من خلال المشاهد القليلة اللي قدمتها.
هناك الكثير على الساحة الفنية والتريندات من وجهة نظر الفنان محمد التاجي من هو الأفضل؟
أنا لا أصدق التريندات واللي بيحصل على السوشيال ميديا مجلة كذا عملت كذا ومين بيعمل إيه والمسابقات والتقيم كل دا متفبرك هما بيعملوا اللي هما عايزينه واللي عايزين يكرموا بيكرموا، أنا لقيت بنت مذيعة مستفزة جدا جدا فوق الوصف ووقفولها البرنامج بتاعها تقريبا كان برنامج رياضي ولقيتها طالعة بتتكرم وتاخذ جايزة في حاجه من الحاجات اللي قصدك عليها، والبنت شوفت ليها فيديوهات على الإنترنت مستفزة بتشتم في الضيف وتقل أدبها عليه ومع ذلك بتتكرم هل دا رأي الجمهور أعتقد لا.