حوارات

شروق الشريف عن مشاركتها في “دايمًا عامر”: ردود الفعل جميلة جدًا وبكن بالفضل للمخرج مجدي الهواري

لفتت الفنانة الشابة “شروق الشريف” الأنظار إليها من خلال مشاركتها في مسلسل “دايمًا عامر” الذي يعرض حاليًا خلال الموسم الرمضاني 2022م، وهو من بطولة مصطفى شعبان وإخراج مجدي الهواري.

وكان لمجلة هافن حوار مع الفنانة “شروق الشريف” تكشف لنا فيه عن مشاركتها في مسلسل “دايمًا عامر” وعن كواليس التصوير، وعن تجربتها في مجال الدوبلاج، كما تتحدث عن انضمامها لفرقة “بهججة”.

حدثينا أكثر عن دورك في مسلسل “دايمًا عامر”؟
بقدم دور “دينا” بتجسد دور الانفلونسر اللي بتبقى مهووسة بالسوشيال ميديا وعلى طول أي حاجة في حياتها بتصورها، وحياتها على طول متعرضة للناس وللسوشيال ميديا، وبتواجه مشاكل كتير، ودا بيخليها مش عارفة تكتشف نفسها، وبتكون بعيدة عن أصحابها ومابتعرفش تكون متواجدة حقيقي في الحياة، هي ورا الشاشة على طول.

وكيف تم اختيارك لدور “دينا”؟
عن طريق أستاذ “مجدي الهواري” وحقيقي بشكره على الفرصة الجميلة دي، وتعاونا من قبل في مسرحية “اللي عليهم العين” في كايرو شو.

حدثينا كيف كانت كواليس تصوير المسلسل؟
على أد ما كنا بنصور ساعات كتير وسفر وكان في إجهاد، أد ما كان الشغل حلو أوي وفيه نوع من الفرح والانبساط؛ لأن كان معانا نجوم كتير بيخلونا نبقى مبسوطين على طول.

كيف كانت تعاونك مع الفنان “مصطفى شعبان” والفنانة “لبلبة”؟
التعاون مع الفنان “مصطفى شعبان” والفنانة “لبلبة” حاجة في منتهى الرقي، بنتعلم منهم طول الوقت، مصطفى شعبان على طول بيساندنا وبيحاول يفكنا ولو في أي مشكلة حتى لو شخصية بنكلمه وناخد رأيه، وفي الشغل بيقدم لنا نصائح كتير، وطول الوقت بيحاول يخلينا نظهر بشكل أحسن، وهو كوميدي جدًا في الحقيقة ودمه خفيف أوي.

مدام “لبلبة” في منتهى الأناقة ومنتهى الجمال، وعلى طول بتدينا طاقة وطاقتها دايمًا حلوة، ودايمًا بتقدم لنا نصائح بنتعلم منها كتير؛ لأنها تاريخ كبير أوي، إحنا قاعدين مع تاريخ، ولما مثلت معاها كنت هايبة أوي ومبسوطة أوي إن أنا واقفة قدام “مثلي الأعلى” لأن أنا بغني وبعمل مونولوجات، فهي بالنسبالي شخصية ملهمة جدًا، ماكنتش خايفة من التمثيل معاها، بالعكس هي مشجعة جدًا.

وكيف كانت تجربتك في التمثيل مع المخرج “مجدي الهواري”؟
أستاذ “مجدي الهواري” بكن له كل الاحترام، وبشكره جدًا على الفرصة دي ودايمًا بيشجعنا ويدينا طاقة إننا نطلع المشهد بأحلى صورة، بيحاول يهيئ لنا الجو اللي نعرف نطلع فيه حاجة حلوة، ورؤيته دايمًا مختلفة، وعامل حالة مختلفة خالص في المسلسل.

ماذا عن ردود الفعل حول تقديمك لدور “دينا” في مسلسل “دايمًا عامر”؟
الحمدلله.. ردود الفعل كويسة والناس مبسوطة جدًا وبيجيلي “Feedback” حلوة أوي من الناس، ولسه شخصية “دينا” هيكون ليها حاجات هتبان أكتر وهتقع في مشاكل وتشويق وإن شاء الله تعجب الجمهور.

من النجوم التي تتمني العمل معهم؟
أتمنى إني أتعاون مع جميع الفنانين وحابه أتعاون مرة أخرى مع الفنان مصطفى شعبان ومع الفنانة لبلبة وكل النجوم اللي كانوا معانا في المسلسل؛ لأنهم كلهم حلوين.

حدثينا عن تجربتك في مجال الدوبلاج؟
دخلت المجال من وأنا صغيرة، وأخر عمل قدمته كان “أنكانتو” دور “ميرابل” بالمصري و “Frozen” دور “Anna” وأخرجت أغاني لديزني ولنتفلكس.

حدثينا عن انضمامك لفرقة “بهججة”؟
انضمامي لـ”فرقة بهججة” من 5 سنين، إحنا فريق عبارة عن 5 بنات بنقدم مونولوج، والمونولوج بيحمع بين التمثيل والغنا، بنحاول من خلال الفرقة إننا نرجع تاني المونولوج وبنعمله بطريقة معاصرة بتتحدث عن يومنا والفترة الحالية.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!