يهاجم الفنان تامر عاشور الفنان عمرو مصطفى عن تصريحاته الأخيرة في برنامج حبر سري الذى تقدمه الإعلامية أسما إبراهيم.
حيث نشر منشورًا عبر حسابه الشخصي بموقع “فيسبوك” يهاجمه فيه قائلًا: “النجاح يعني أعمال مش كتر كلام وأقول هعمل واسوي وعايش أتريق على ده وده بقالي سنين، التاريخ جميل مفيش شك بس بيعتمد على الوقت يعني نقيم اللي شغالين دلوقتي لما يقعدوا نفس الزمن اللي أنت قعدته ونشوف، لكن تقييم دلوقتي أسمه جهل بـ التاريخ، أ-ب ملحن يعني لازم مطرب يغني اللحن ده وإلا مكنتش هتبقى ملحن المطرب الأول ينجح بعد كده الملحن ينجح طبعًا مفيش كلام والملحن فى حته والمطرب فى حته كل نجاح مختلف عن التاني”.
وأضاف:”ونادر عبد الله أعماله كلها ناجحة و شاعر كبير قوي قوي قوي كلامه تقيل كلامه خفيف نبقى نوزن ونشوف لكن نبذه عن أعمال نادر التقيله ” اواخر الشتا اليسا، تسلم، كلموها عني، آخر مقابله، تصدق بمين اليسا، بطمنك شيرين، أخيرًا اتجرأت شيرين، ريحه الحبايب عمرو دياب، خلينا نشوفك عمرو دياب، وأضرب فى ٢٠٠ على نفس المستوى بس البوست مش هيكفي تاريخه، بس هو مش بتاع بروبجاندا بس”.
وتابع: “ومحمد رحيم مش محتاج حد يفرحه أكيد ده بابا يا عموره دراسة ومزيكا وحاجة تشرف يعني وتعطل قدامه جدًا بمعمل الكيمياء اللي بتتكلم عنه ده والهامي دهيمه موزع أغنية “قولوله سماح” فنان كبير هو وأدهم أخوه ومش هجيب سيرة عمرو دياب كتير بس هو الڤاترينه اللي قدمتك للناس بـ “خليك فاكرني” سنة ٩٩ يعني كان عندك ١٣ سنة حسب كلامك مع الإعلامية أسما إبراهيم، مش عامر منيب اللي قدمك عامر فعلًا ليه فضل على كل الناس وأنا منهم بس مش هو اللي قدمك متزييفش التاريخ اللي عمال تتمسك فيه، ونعمل سيرش على كل اسم من دول نلاقي أعمال تخض وتاريخ يزعلك شخصيًا مش برامج وتخبيط وهخليهم يعتزلوا ومحدش بينجح والكلام العجيب ده وف الآخر تقولي مصر !! ما تطلع تتكلم كويس على فنانين مصر طيب”.
واستكمل قائلًا: “وقصة نبضات القلب بتاعت الأغاني دي بلح، وهنغير الذوق العام هتغير الذوق العام بـ أيه هتغير الذوق العام وماله أصلا الذوق العام، هو علشان بقى في حاجات بتنجح مش أنت اللي عاملها بقى الذوق وحش بالتخبيط ف ناس تاريخ ووجه مصر حقيقي هتغير الذوق العام روح أدي أغنية العالم الله دي لأي حد غير عمرو دياب مكانتش هتوصل للعالميه اللي انت فرحان بيها هي أغنية تملي معاك محققتش عالمية؟”.
واختتم قائلًا :”أكتر أغنية لعمرو دياب وصلت للعالمية هي تملي معاك ألحان “شريف تاج” مش ألحانك كلمات أحمد علي موسى، السر فى عمرو دياب صدقني والدليل إن كل أغانيك مع أي حد غير عمرو زيها زي باقي الأغاني ولا راحت عالمية ولا حاجه وده مينقصش من فنك ولا موهبتك ومش عيب احنا ثقافه وجمهور كبير والعالم كله بيجي دلوقتي يعمل فيه في عالمنا أغاني وحفلات “متستقلش” وكلامي على عمرو مصطفى”.
يرد الفنان تامر عاشور على عمرو مصطفى بسبب تصريحاته الأخيرة في برنامج حبر سري مع الإعلامية أسما إبراهيم حيث هاجم عمرو مصطفى الفنان عمرو دياب طوال الحلقة وعندما سألته أسما إبراهيم عن أغنية أنت الحظ لـ عمرو دياب رد قائلًا:”أنا مش عاوز أتكلم عن أغاني أي شخص، مش عاوز أتكلم عن ناس عملتلهم شغل لأني مش عاوز افتكرهم، ده مجاش عزاني في أمي محدش يقولي عشرة لأني مش عاوز أجيب سيرة الاسم أصلا”.
وانتقد عمرو مصطفى أغاني المهرجانات ومطربين المهرجانات واتهمهم أنهم يفسدون الزوق وأنهم سوف يرجعون الجمهور إلى الخلف بهذه الأغاني وقال خلال حواره أنه سوف يغير الذوق العام.
