حوارات

غادة طلعت: مشاركتي في “المشوار” تجربة مميزة جت في وقتها جدًا والتعاون مع محمد رمضان كان مفاجأة بالنسبة لي

• كان حلم من أحلامي العمل مع المخرج العظيم “محمد ياسين”.

• مشاركتي في مسلسل “المشوار” تجربة مميزة وجت في وقتها جدًا.

• التعاون مع “محمد رمضان” كان بالنسبة لي مفاجأة.

• “دينا الشربيني” ممثلة شاطرة جدًا وكانت متعاونة ولطيفة جدًا.

• ردود الفعل على دور “سميرة” كانت أكبر من عظيمة ومبهرة جدًا.

• دور أم إبراهيم في مسلسل”الاختيار 2″ أهم تجربة بالنسبة لي؛ لأنها حسستني طعم النجاح.

• “بيتر ميمي” مخرج عظيم بيحب الممثل وعنده رؤية كبيرة.

• “كريم عبد العزيز” نجم كبير وأخلاقه راقيه جدًا وسعيدة إني اشتغلت معاه.

غادة طلعت” موهبة فنية جبارة، مجتهدة وصادقة في المشاعر، لديها بصمة مميزة في كل عمل تشارك به، لا تهتم بمساحة الدور إذا كانت كبيرة أم صغيرة، ولكنها تهتم بأدق تفاصيل الشخصية ولديها قدرة عالية في تقمص الشخصيات بسهولة، بالإضافة لريأكشناتها المميزة التي تختلف من ثانية لأخرى ليصل إحساسها لك بسهولة.

تتميز بذكائها في إختيار أعمالها، حيث برغم مسيرتها الفنية القصيرة ولكنها تخطو في المجال الفني بخطوات مميزة، وتنجح دائمًا من خلالها بتقديم نفسها بشكل جديد وملفت للجمهور.

لفتت الفنانة “غادة طلعت” الأنظار إليها هذا العام من خلال مشاركتها في الموسم الرمضاني 2022م، في مسلسل المشوار بطولة النجم محمد رمضان ومن إخراج محمد ياسين، كما شاركت في مسلسل ملفي سري بطولة النجم هاني سلامة.

وكان لمجلة هافن حوار خاص مع الفنانة “غادة طلعت”.

في البداية.. ما سبب حماسك للمشاركة في مسلسل “المشوار”؟

لأنه من إخراج المخرج الكبير العظيم اللي أنا بحبه جدًا وكان حلم من أحلامي أشتغل معاه أستاذ “محمد ياسين” ودا حلم كبير لكل فنان إنه يشتغل معاه، وخصوصًا إنه بيخرج مسلسل لـ “محمد رمضان” يعني هيكون في مسلسل مختلف جدًا عن كل الأعمال اللي موجودة، فدي تجربة بالنسبالي تجربة مهمة جدًا.

فكنت متحمسة جدًا جدًا وفرحانة إن أستاذ محمد ياسين اختارني؛ لأن اختياراته دايمًا بتبقى مميزة، لأن مش أي حد بيشتغل مع أستاذ محمد ياسين أو بيعجبه، فـ في الوسط معروف إن دي خطوة مهمة جدًا، كنت فرحانة إن ربنا بعتلي عمل زي دا بعد نجاح دوري في مسلسل الاختيار، أنا كنت مش عارفة أختار إيه وخايفة اختار دور يكون مش بنفس المستوى والجمهور يبقى شايفني مش قد ثقته.

وكيف تم اختيارك لدور “سميرة” في مسلسل “المشوار”؟

كنت في لبنان وجاتلي مكالمة هاتفية من المخرج المنفذ الأستاذ “حسام سليمان” قالي إن استاذ محمد ياسين اختارني لدور قصاد دينا الشربيني في الأحداث الأولى من مسلسل المشوار، ولسه هيحكيلي التفاصيل.. قولتله أنا موافقة من غير ما أعرف أي تفاصيل، أستاذ محمد ياسين مش هيعمل عمل عادي، فتحت أي ظرف أنا موافقة ولو هقول جملة واحدة هكون سعيدة جدًا.

حدثينا كيف كانت أجواء تصوير مسلسل “المشوار”؟

كانت بالنسبة لي مميزة جدًا؛ لأن كنت متشوقة جدًا إن أنا أحضر كواليس مع أستاذ محمد ياسين وأشوفه بيشتغل إزاي، لأن هو اسم كبير جدًا، ومن أيام سينما العباقرة اللي إحنا متربين على أفلامهم وأعمالهم، فبالنسبالي كان نفسي جدًا إني أشتغل معاه، وأعرف إزاي بيتعامل مع الممثل وإزاي بيدير اللوكيشن، ولقيته أكتر مما توقعت، مخرج مختلف واللوكيشن بتاعه منضبط جدًا وبيحب الممثل وبيركز جدًا في تفاصيله وبيصوره كتير من زوايا مختلفة، واللوكيشن بتاعه ممتع وأنا كنت زعلانه إن مشاهدي بتخلص ومش هفضل وقت كتير معاه.

حدثينا كيف كان تعاونك مع الفنان “محمد رمضان”؟

التعاون مع الأستاذ “محمد رمضان” كان بالنسبة لي مفاجأة؛ لأني عارفة إنه نجم كبير وعنده جمهوره وذكي ومنفرد، وهو من أهم النجوم اللي في الجيل بتاعه، بس لم أتخيل إنه على المستوى الإنساني بالجمال دا، في منتهى البساطة ومتعاون جدًا، أول ما شافني أهتم بيا جدًا، وكان معتقد أن أنا من العاملات اللي في المصنع فعلًا، لحد ما جه سلم عليا واستاذ “محمد ياسين” قاله غادة طلعت ممثلة معانا وهتقدم دور “سميرة”، قالي يا بنت اللذينة وكان مش مصدق إن أنا ممثلة من كتر ما أنا كنت مهتمية بلبس الشخصية وتفاصيلها وشكل وشي كان عليه انكسار سميرة بسبب الظروف اللي بتمر بيها، وكنت لسه مصوره مشاهدي مع دنيا الشربيني.

بعد ما صورت مع محمد رمضان قالي “أنتي ممثلة عظيمة، برافو” وكنت مبسوطة جدًا إنه مهتم بالتفاصيل ومهتم بتفاصيلي أنا كمان وإنه يقولي كلام كويس، ومجرد إني نزلت بوست إني مشاركة في مسلسل المشوار، لقيته دخل كتبلي “نورتي المشوار يا غادة، ويارب يجعل وشنا حلو عليكي”، طبعًا دا كلام حلو جدًا، دعم كبير من ممثل كبير وبطل العمل، ومع أول ظهور ليا قال لي احسنتي يا غادة، فكل التفاصيل دي تبدو صغيرة لكنها كبيرة جدًا، لأن مش كل النجوم بيعملوا كدا وهو إبن أصول فعلًا.

وكيف كان تعاونك للمرة الفنانة “دينا الشربيني”؟
دينا الشربيني” ممثلة كبيرة وشاطرة جدًا، أنا كنت متخاوفة في البداية؛ لأن مشاهدي معاها فيها عنف وبوقعها على الأرض كذا مرة، فكنت قلقانة إنها تضايق أو تكون مش حابه كدا، فطلبت إني أروح أسألها في البداية هي عندها تحفوظات أو لأ، بس لقيتها بكل بساطة بتقولي لأ طبعًا أنتي براحتك جدًا ومعنديش مشكلة، وهي فعلًا وقعت على الأرض كتير جدًا، وهي كانت متعاونة جدًا ولطيفة جدًا جدًا.

وكيف كانت تجربتك في التمثيل مع المخرج “محمد ياسين”؟

تجربة مهمة جدًا في حياتي، وفي وقتها جدًا، لأن أنا بعد دور “أم إبراهيم” في مسلسل الاختيار كنت محتاجة أشارك في عمل مهم، لأن جاتلي أعمال حسيت إنها مش هضيف لي فرفضتها، فبالنسبة لي تجربتي مع أستاذ محمد ياسين، كانت تجربة مهمة جدًا.

حدثينا عن ردود الفعل التي تلقيتيها حول تقديمك لدور “سميرة” في مسلسل المشوار؟

ردود الفعل أكبر من عظيمة وأكبر من توقعاتي، ومبهرة جدًا ودا عوض وطبطبة من ربنا؛ لأن أنا عارفة إن دوري صغير ولم أتوقع إن يحصل عليه ضجة كبيرة كدا، وإن كل النقاد المهمين يكتبوا عني وإن المخرجين الكبار يتصلوا بيا ويكتبوا عني، في عدد كبير من المخرجين كتبوا عني، مثل: أستاذ هشام فتحي وهو مخرج مهم جدًا بالنسبة لي وناجح جدًا، فإنه يتصل بيا ويقولي إيه الشطارة دي طبعًا دي حاجة عظيمة جدًا، وكتب بوست عظيم فرحني جدًا، والمخرج زياد الوشيحي طبعًا كتب عني كلام حلو جدًا، وأستاذ محمد علي، والمنتج شريف مندور، وزميلي مخرجين وممثلين كبار كتبوا عمي كلام حلو جدًا، وحرصوا إنهم يعملوا بوست ويتكلموا عني، “إسلام إبراهيم، محمد عز، توني ماهر” كتبوا عني كلام حلو جدًا، وغيرهم من النجوم ودا شئ أسعدني جدًا جدًا.

ماذا عن تجربتك في مسلسل “الاختيار 2” ودور أم إبراهيم؟

تجربتي في الاختيار 2 ودور أم إبراهيم، دي أحلى وأهم تجربة في حياتي؛ لأنها حسستني طعم النجاح، ولم أتوقع أن شخصية أم إبراهيم توصل لكل الناس، ولغاية دلوقتي برد على بوستات وردود أفعال الجمهور على دور أم إبراهيم، برغم إن فات سنة عليه، الدور قدمني بصورة مهمة جدًا وحملتني مسئولية كبيرة جدًا، خلت الوسط الفني كله يعرفني، ولغاية دلوقتي بحصد في نجاح دور أم إبراهيم، وممتنة جدًا للمخرج دكتور بيتر ميمي، لأنه اختارني في مسلسل ودور مهم جدًا، وأنا فخورة جدًا إني قدمت دور أم إبراهيم.

من خلال تعاونك مع المخرج “بيتر ميمي” حدثينا عن كواليس العمل معه؟

“بيتر ميمي” مخرج عظيم، بيحب الممثل جدًا وبيهتم بتفاصيله، وبيدي فرص للناس، يعني أنا اختارني من أدوار كوميدي من مسرح أستاذ خالد جلال، مش عارفه هو إزاي شافني في دور أم إبراهيم والدور الكبير والصعب دا، والشخصية اللي أكبر مني في العمر، فهو عنده رؤية كبيرة جدًا وكانت في محلها.

حدثينا عن تجربتك في التمثيل أمام الفنان “كريم عبد العزيز”؟

الفنان “كريم عبد العزيز” نجم كبير وبرنس بمعنى الكلمة، كنت بمثل قدامه مشهد التحقيق كان باصصلي بإعجاب، وبعد المشهد قالي “الله يا بنتي، الله عليكي” وصقفلي جامد، فهو فنان كبير ونجم كبير وأخلاق راقية جدًا، وأنا فعلًا اتبسطت جدًا إني اشتغلت معاه.

الفنانة “غادة طلعت” دايمًا بتقدمي أدوار مميزة تترك علامة لدى الجمهور، ما هي الأساس التي تختارين ع أساسها أعمالك؟

إن الشخصية اللي أقدمها تكون شخصية حقيقية، شبه الناس، صادقة وطبيعية، وأنا بعملها بصدق لأني بصدقها جدًا، وبتجرد نن أي حاجة ممكن تعوق تجسيدي للشخصية بشكل يخلي الناس تصدقه، ماعنديش أي مشكلة إني أطلع من غير ميك أب أو إني أقدم دور سيدة كبيرة، أو إني ألبس لبس الشخصية، معنديش شروط إني أبقى “فيديت” أو أحافظ على جمالي علشان الجمهور، لأ خالص، إني أكون فيديت دا ممكن أعمله في حياتي اليومية في اللبس والصور، لكن في الدور بعمل اللي ينبغي اللي يتعمل عليه أو بحاول؛ لإني بحاول أظهر بالشكل اللي الناس تصدقني فيه، ولأن أنا عندي بعض التجارب اللي قصرت في حياتي، وهي خلتني شايفة النماذج صح، ويارب أكون كدا فعلًا، وأنا شايفة إن ربنا بيوفقني وبيختار لي الصح.

ما رأيك في ظاهرة الترند وهل هي مقياس لنجاح أي عمل فني؟

مش مقياس نجاح أوي، ولكنه مؤشر، وأوقات بيكون تريند صادق، مش تريند مدفوع أو وراه لجان، التريند لما بيبقى حقيقي وصادق بيكون مؤشر كبير ومفرح، أنا وقت دور أم إبراهيم كنت مفكرة إنه دور هيعدي وخلاص، وقتها تفاجئت إني تريند في رمضان مرتين أو ثلاثة، ودا كان صادق، وقتها أنا اتفجئت لأني كنت بتفرج زي زي الناس، ولقيت أغلب السوشيال ميديا بتتكلم عني وكاتبة أسمي وحاطة صورتي وبدور على شخصية أم إبراهيم، فالحمدلله فرحت جدًا.

وما هي أحلامك القادمة على المستوى الفني؟

إني أفضل أقدم الشخصيات اللي شبه الناس، وشخصيات من الواقع، والشارع الحقيقي، أقدم شخصيات أخواتنا وأهالينا، مش عايزة أعمل شخصية الفتاة الجميلة اللي هي سطحية، عايزة أقدم شخصية البنت الحقيقة.

بعد مسلسل “المشوار” هل لديكِ أعمال فنية خلال الفترة المقبلة؟

مسلسل “المشرحة” بطولة الفنانة درة، ومسلسل آخر دور بطولة دينا الشربيني، وبتمنى يارب يعجبوا الناس لم يتعرضوا.

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!