المخرج محمد سراج الدين هو مؤلف ومخرج لنوعية أعمال الرعب النفسي منذ 8 سنوات، وكشف لمجلة هافن عن أسرار جديدة عن فيلمه الرعب “بيلفيجورين” الذي أخرجه وأغرب الأحداث التي وقعت أثناء التصوير، وعن آخر الجوائز التي حصل عليها الفترة الماضية، وإلى نص الحوار…
ما الذي جذبك لدراسة وإخراج أفلام الرعب النفسي بالتحديد؟
في تقديري بعد دراسة أكتر من 6 سنين دراسة رعب نفسي ودراما نفسية… وكتابة أكتر من 8 سنين في نفس التخصص
تأكدت إن ده أصعب وأمتع نوع من الأنواع السينمائية المختلفة وده رأي كمشاهد قبل ما أكون مؤلف أو مخرج.
إحساس إننا نعيش تجربة نفسية كاملة ونتفاعل معاها دي شئ عظيم جدًا ولا يوصف.
حدثنا عن كواليس التصوير وأغرب المواقف التي حدثت وقتها؟
هذا السؤال يحتاج ساعات علشان أرد عليه، خاصة اللي حصل فعليا أثناء تصوير الفيلم صعب جدًا، يكفي أن الشقة اللي صورنا فيها لحد دلوقتي بيخافوا يقربوا منها بسبب الحاجات اللي بدأت تحصل أثناء وبعد التصوير، يعني من وقتها بدأت كل الأجهزة اللي في الشقة تتحرق بشكل غريب وفي نفس الوقت.
وبدأ الموضوع يتطور أكتر بدأ يبقى في أصوات لخطوات في الأوضة اللي صورنا فيها آخر وأهم مشهد، اللي بعتبره مشهد ماستر سين.
وده اللي حصل فيه إن عين الممثل إتقلبت من عين بشر لعين بقر بشكل مرعب و غريب قدام الكاميرا بالفعل وحاجات كتير جدًا حصلت محتاج أيام نتكلم عنها.
كيف كانت تجهيزاتك للفيلم؟
مرحلة تجهيز الفيلم حصلت في أكتر وقت هادي كل العالم عايشه مش بس مصر وهي أيام حظر كورونا، الهدوء اللي كان مسيطر على كل الشوارع خاصة في ساعات الحظر كان بيحمسني أكتر إني أنفذ فيلم رعب في المود دا.
ودا اللي حصل بالفعل رغم إن الفيلم كله أتصور في لوكشن واحد، ودا مقصود علشان أحداث الفيلم، إلا إني قدرت برضوا أستغل المود اللي كان مالي الأجواء كلها ودا برضوا واضح وباين من أول انترو الفيلم.
حدثنا عن الجوائز التي حصل عليها الفيلم والمهرجانات الدولية التي شارك فيها؟
الحمد الله الفيلم لحد دلوقتي مشارك في أكتر من 27 مهرجان دولي في أكتر من 15 دولة وبينافس على جايزة أفضل فيلم رعب وأفضل مخرج، وفاز لحد دلوقتي ب 3 جوايز دولية وهي:
أفضل فيلم رعب من مهرجان نوادا السينمائي الدولي في الهند.
وجايزة أفضل فيلم شرفي من مهرجان ليما السينمائي الدولي ببيرو بأمريكا الجنوبية.
جايزة أفضل فيلم بإجماع الآراء من مهرجان البوابة السينمائي الدولي بدولة الجزائر.
ولسه في مفاجأت أكتر عن الفيلم ولسه في جوايز دولية تانيه هيتم الإعلان عنها الفترة اللي جايه إن شاء الله.
