حوارات

آية البحيري عن تجربتها في برنامج الدوم: من أحلى تجارب حياتي وحلمي تحقق برؤية ليلى علوي والغناء أمامها

تألقت المتسابقة آية البحيري خلال مشاركتها في برنامج “الدوم” لإكتشاف المواهب والذي عرض على قناة On tv، حيث استطاعت آية أن تجذب أنظار الجمهور وأعضاء لجنة التحكيم إليها، بطلتها المميزة التي قال عنها الفنان حميد الشاعري “إنها ستايل” وبموهبتها وصوتها العذب الذي نال إعجاب جميع أعضاء لجنة التحكيم عند غنائها لأغنية “من حبي فيك يا جاري”، فقال عنها المخرج تامر محسن “عندك حضور على المسرح وابتسامة حلوة أوي، المطرب دلوقتي لازم يتسمع ويتشاف”، وقالت عنها الفنانة ليلى علوي “أنا حبيت الأغنية، وحبيت ختام الكوبلية بتاعها في العورب حسيتها إنها حنينة ومظبوطة، غنيتي مظبوط جدًا وحبيت الأغنية منك جدًا”، وقال عنها أيضًا المايسترو العالمي نادر عباسي “العورب بتاعتك جميلة ورقيقة، وحاسس إن صوتك أكبر من كدا”.

كما استطاعت “آية” أن تنال إعجاب الكثير من الجمهور وتوالت إليها رسائل التهنئة والإعجاب بموهبتها، واستطاعت أن تصل للمراحل النهائية من برنامج الدوم.

وكان لمجلة هافن حوار مع المتسابقة “آية البحيري”.

في البداية.. حدثينا كيف جاءت مشاركتك في برنامج “الدوم”؟

صدفة بحتة.. حد من أصحابي قالي على البرنامج وأنا كنت مشغولة بالدراسة ورفضت ولكنه أقنعني، وجيت فعلًا وقدمت وكنت مفكراه أوديشن للأوبرا ومكنتش أعرف إنه برنامج، والصدفة لعبت معايا ووصلت لمراحل نهائية متقدمة الحمدلله، وماكنتش أعرف إن كل ده هيحصل.

وما هي استعدادتك لتلك التجربة؟
مستعدتش خالص؛ لأني ماكنتش أعرف إنه برنامج وهنقيم شهرين خلال فترة البرنامج، بس لما عرفت قبل السفر بأسبوع قررت أرجع بروفاتي تاني عشان أمرن صوتي بعد غياب 5 شهور عن الغناء والانشغال في الدراسة، وطبعًا ملحقتش أعمل غير بروفتين تلاتة، بس الحمدلله توفيق ربنا كان معايا أكتر من مليون بروفة.

من أختار لكِ الأغاني التي قدمتيها خلال مشاركتك في برنامج “الدوم”؟

احنا كنا بنختار أغانينا بمساعدة دكتور “محمد أبو الخير” طبعًا الجندي المجهول العظيم حقيقي واللي استفدنا منه كتير وكان مكسب حقيقي لينا.

وهل كنتِ خائفة من المنافسة في برنامج “الدوم”؟

بالفعل.. كنت خايفة من المنافسة، مش علشان المنافسة لذاتها لأني دخلت مسابقات كتير والحمدلله نافست بقوة واخدت مراكز كتير؛ ولكن خوفي وقلقي كان بسبب إني بعدت عن الغناء 5 شهور وكنت محتاجة أكيد أرجع أمرن صوتي، بس الحمدلله أنا كنت موقفة غنا 5 شهور ووصلت لمراحل نهائية، ما بال بقى لو ركزت واديت الموضوع أهمية وأولوية !! أكيد هعمل كتير ان شاء الله وكله بتوفيق ربنا طبعًا.

من أكثر شخصية من لجنة تحكيم برنامج “الدوم” أثرت فيكِ خلال البرنامج؟

الفنانة ليلى علوي طبعااا، لأنها فنانتي المفضلة منذ الطفولة وكان حلم حياتي أشوفها بس، مكنتش أتوقع إني صدفة اشارك في برنامج وهي تكون ف لجنة تحكيم أحد مراحله وأغني قدامها وأتكلم وأتصور معاها.

ذكرتِ أن الفنانة “ليلى علوي” الممثلة المفضلة لكِ، حدثينا عن إحساسك عند غنائك أمام الفنانة “ليلى علوي” ولقائك بها لأول مرة؟

إحساس مختلف تمامًا
شعوري بالتوتر من رهبة المسرح واللجنة تحول أثناء لحظة غنائي قدامها إلي حماس وشغف وحب وفرحة وكل الاحساسات الجميلة اللي ف الدنيا، ده كان حلم بالنسبة لي.

ما هي أهم النصائح التي قدمها لكِ أعضاء لجنة تحكيم برنامج “الدوم”؟

لأ الحمدلله.. ماكنش في حاجة معينة، الحمدلله نلت إعجباهم كلهم، يمكن كانت نصائحهم تقنية مش فنية، والحمدلله تقنية زي طريقة استخدام المايك وإني اقربه أو أغني بصوت أعلى، بس المشكلة كانت مش كده لأني الحمدلله متعودة على طريقة استخدام المايك كويس جدًا ولكن الفكرة كانت إننا لأول مرة بنستخدم الairpieces وكنا بنبقى سامعين صوتنا عالي وحلو جدًا بس ماكنش بيبقى بنفس الوضوح كده للجمهور، ولكن كمجمل الحمدلله مكانش في أي تعليقات سلبية عليا فنيًا من ناحية الغنا او الأداء.

كيف استقبلتِ ردود فعل الجمهور بعد غنائك في برنامج “الدوم”؟

لم أتوقع أبدًا كل الردود الحلوة دي والدعم الرائع ده، كنت بدمع من المفاجأة وحب الناس الحمدلله ودعم الناس اللي أعرفها، والناس اللي معرفهاش فرحتني كمان أكتر، كانت بتجيلي مكالمات ورسايل وتعليقتات كتير أوي وكنت بحاول طول الوقت أرد عليهم واقدرهم على حسب ما وقتي يسمح.

من أكثر من دعمك في تلك التجربة؟

أسرتي طبعًا وأصحابي واساتذتي في الجامعة وناس كتير حقيقي ماكنتش متخيلة كمية الحب والدعم ده حقيقي.

حدثينا كيف كانت كواليس برنامج “الدوم”؟

من الناحية العملية: كنا بنشتغل كتير جدًا وحقيقي أكتر تجربة تعبنا فيها فعلًا بطريقة مش طبيعية علشان نطلع الشغل أحسن حاجة، ووسط كل التوتر والتعب والارهاق، أول ما بيتقال standby بنبتسم ونظهر حماسنا وحبنا للجمهور اللي مستنينا بشغف وبننسى تعبنا حقيقي.

أما بالنسبة للناحية الترفيهية: فكنا بنقضي أحلى أوقات مع بعض كمتسابقين وحقيقي أصبحنا أصحاب مقربين جدًا وكل ما كان يقرب ميعاد انتهاء البرنامج بنحزن اننا هنسيب بعض، كنا بنلعب وبنهزر وبنغني وبنقضى أحلى أوقات سوا.. تقريبا دي أحلى حاجة في الدوم كله.

ماذا أضافت لكِ مشاركتك في برنامج “الدوم”؟

أضافت لي كتييير جدًا طبعًا،
دي أحلى تجربة مريت بيها في حياتي، بايجابياتها وسلبياتها؛ لأن طبيعي أي حاجة في حياتنا بنمر بيها لازم يبقى ليها ايجابيات وسلبيات، حقيقي استفدت جدًا، فنيًا: اني اتعرفت على ناس فنانين بجد صاعدين ومشاهير الوطن العربي ومسئولين ومنتجين ومخرجين وأصدقاء كمان من كل نواحي مصر شرقًا وغربًا وشمالًا وجنوبًا وكل شخص بثقافته وفنه.

شخصيًا: دي أكتر تجربة افادتني في حياتي الشخصية كمان، اكتشفت نفسي أكتر، عرفت بحب ايه ومبحبش ايه، وأقدر أعمل ايه، اكتشفت اني اقدر اعمل حاجات كتير أوي وده خلاني فخورة بنفسي، عرفت اعتمد على نفسي، قدرت اتخطى كل إرهاق نفسي لوحدي ودعمت نفسي وواجهت كل حاجة صعبة قابلتها بنفسي وتخطيتها، لا حقيقي مهما حكيت أنا استفدت ايه كتجربة شخصية مش هيكفي.

وجهي كلمة لزملائك في برنامج الدوم؟

هقول عليهم صحابي مش زمايلي.. لأننا اصبحنا قريبين أوي حقيقي، هقولهم انتو أحلى حاجة ف الدوم، من غيركم ماكنتش هتبقى تجربة ممتعة كده، احنا هوّننا على بعض حاجات كتير وكنا بنشجع بعض جدًا، ربنا يديم صداقتنا.

بالنسبة للي كملوا.. طبعًا إن شاء الله هنشوفهم في حاجات حلوة جاية وربنا معاهم.

بالنسبة للى خرجوا.. ف أقولهم ده مش آخر السباق، فعلًا هم مواهب خرافية حقيقي بس يمكن ربنا ماكنش كاتبلهم نصيبهم في المكان ده وأكيد نصيبهم وطريقهم ف مكان تاني أحسن ليهم.

رسالتي لكل حد شارك في الدوم سواء كمل أو خرج: لازم تكمل المكسب والنجاح مش في انك توصل للنهائي أو تاخد اللقب لأ المكسب والفوز الحقيقي في الاستمرار.. أنت/ي ظهرت/ي في برنامج من أكبر البرامج في مصر وانتشرت/ي وناس كتير شافتك، حافظ/ي على نجاحك ده واستمر/ي واشتغل/ي على نفسك أكتر وأوعى حاجة توقفك أبدًا.

في النهاية.. ما هي أحلامك القادمة؟

إن شاء الله أركز أكتر فالمجال واديله حقه، وأتمنى أوصل لحاجة كويسة ترضى طموحي وابقى قد ثقة الناس اللي حبتني ودعمتني دايمًا، والاهم أبقى عند حسن ظن نفسي بنفسي، لأن أهم رأي في حياة الشخص هو رأيه وايمانه بنفسه هو أولًا.

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!