الفن نيوزفن

بيتر ميمي: صوت ياسر جلال حقيقي ومفيش جزء رابع من الاختيار

حل المخرج بيتر ميمي ضيفًا مع الإعلامية إنجي علي بحلقة الأمس من برنامج “أسرار النجوم”، والمذاع عبر إذاعة “nogoum fm”.

إذ تحدث خلال الحلقة عن نجاح مسلسل “الاختيار 3″، والذي عرض في الماراثون الرمضاني الماضي 2022.

وفي السطور التالية، نستعرض أبرز تصريحات بيتر ميمي في البرنامج.

مافيش جزء رابع من “الاختيار”

تحدث بيتر ميمي عن وجود جزء رابع من “الاختيار”، قائلًا: “مافيش جزء رابع من الاختيار، وده كان الجزء الأخير من العمل”.

وتابع:”هيبقى في سلسلة تانية بمخرج جديد بمؤلف تاني، وإن شاء الله تكون أهم من اللي فات”.

وواصل:”وتبين حاجات يمكن إحنا ماشوفنهاش في الأجزاء دي”.

ولفت:”التجديد مهم عشان حد يوري الناس بطريقة تانية ده مهم، وبرا لما بيعملوا المسلسلات والأفلام الأجزاء بيغيروا المخرجين والأبطال كمان”.

وأضاف:”سر نجاح العمل، إنه بيعرض حاجة تاريخية مش من بعيد”.

دعم الدولة لـ”الاختيار”

وأشاد بيتر ميمي بدور الدولة في دعم مسلسل “الاختيار”، قائلًا:”الدولة دعمت الاختيار بشكل كبير”.

وأكد على دور الدعم الدولة للعمل:”كنا بنصور في الأماكن الحقيقية تقريبًا كلها”.

مشيدًا بدور الدعم اللوجيستي: “الدعم اللوجيستي موافقات ومركبات، فكل ده طبعًا مش هيتعمل في مسلسل عادي”.

صوت ياسر جلال حقيقي 100%

وحول تقديم الفنان ياسر جلال لشخصية الرئيس عبد الفتاح السيسي، قال:”أحيانًا كنت بتخض وأنا بصوره، ياسر جلال من أكتر الناس المجتهدين، اللي شفتهم في حياتي”.

ليكشف:”اللي أنتو شوفتوا في المسلسل ده كله مجهود ياسر، كان بيجيب الفيديوهات ويذاكرها بالحركة بالنفس”.

واسترسل:”فعلًا كله مجهود ياسر، والدور كان صعب”.

أما عن أصعب مشهد فزع فيه من ياسر جلال وهو يجسد شخصية الرئيس عبد الفتاح السيسي، قال:”أول مشهد ده كان خاضضنا كلنا”.

مستكملًا:”والمشهد اللي كان بينه وبين خيرت الشاطر كان فيه nerve وكان فيه عصبية، المشهد ده كان كويس”.

موضحًا:”وعلى فكرة هو كمان كان حالق، حالق دقن وشعر، وكان مهتمًا بال physical look واللبس”.

مؤكدًا:”ياسر عمل مجهود رهيب، والصوت ده صوته هو، ده صوت ياسر جلال 100%، جاب النبرة لأنه ممثل كبير”.

مكملًا:”اشتغل عليها كتير جدًا، وإحنا مالعبناش في الصوت، ده صوت ياسر، ياسر هو اللي عامل الصوت ده، بالتقطيع بالنفس، كل ده مجهود ياسر”.

أمير كرارة لو عمل كوميدي هيكسر الدنيا

وعن علاقته بالفنان أمير كرارة، قال:”قدمنا مع بعض 3 أجزاء كلبش وكازابلانكا وحرب كرموز و3 إعلانات”.

وأكمل:”هو بني آدم لطيف جدًا ودمه خفيف جدًا، ولو عمل كوميدي هيكسر الدنيا”.

مضيفًا:”مش عارف ليه ماعملش كوميدي لحد دلوقتي”.

وكشف:”إحنا عملنا مع بعض كازابلانا كان أكشن كوميدي”.

وأوضح:”في إفيهات كتير من اللي قالها عمرو عبد الجليل في الفيلم، كانت اقتراحات أمير”.

“موسى”

تجربة لم تنجح 100%*كما تحدث عن فيلم “موسى”، حيث قال:”موسى تجربة لم تنجح 100%، بس هي فتحت باب كويس، وممكن الجاي يبقى أفضل”.

واستكمل:”الفيلم واجه مشاكل في التنفيذ، أنا كنت بصور مشاهد أكشن لحاجة مش موجودة”.

لافتًا:”الفيلم ده أنا كاتبه في 2017 ونزل في 2021، عقبال ماتكتب وعقبال ما أقنعت الإنتاج إننا ممكن نعمل حاجة كده”.

ووصف بطل العمل كريم محمود عبد العزيز، قائلًا:”رائع موهبة مش طبيعية”.

متابعًا:”عملنا فيلمين سوا موسى ومن أجل زيكو، ده كاراكتر وده كاراكتر، كريم ممثل مش عادي وإحساسه حقيقي”.

مفاجأة رمضان 2023

فجر المخرج بيتر ميمي عن مفاجأة:”رمضان الجاي هنقدم مسلسل تاريخي في القرن الـ11، تأليف عبد الرحيم كمال وبطولة كريم عبد العزيز”.

منوهًا:”هتشارك فيه نجمة مهمة جدًا، بس إحنا حاليًا في مرحلة الاتفاق معاها، عشان كده لسه مأعلناش عن اسمها، كل التفاصيل هتعلن عنها الشركة المنتجة”.

بينما أعرب عن سعادته بالعمل مع الفنان كريم عبد العزيز، قائلًا:”التجربة معاه رائعة، واتعلمت منه كتير، هو فنان مش طبيعي، وإنسان محترف بشكل كبير”.

يذكر أن “الاختيار 3” بطولة ياسر جلال، كريم عبد العزيز، أحمد عز، أحمد السقا، صبري فواز، خالد الصاوي، عبد العزيز مخيون، إيمان العاصي، هيدي كرم و منى عبد الغني.

علاوةً على عدد كبير من ضيوف الشرف، وهو من تأليف هانس سرحان، إخراج بيتر ميمي وإنتاج “سينرجي”.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!