حلت الشاعرة الغنائية منة القيعي ووالدها كابتن عدلي القيعي في ضيافة برنامج “منى الشاذلي” الذي تقدمه الإعلامية الكبيرة منى الشاذلي، عبر فضائية “CBC” وتحدثت منة عن أسرار وكواليس خاصة بـ أبرز أعمال ساهمت فيها
حيث أنها كانت السبب خروج بعض الأغاني المميزة إلى النور وجعلتها تنال شهرة واسعة مثل “الغزالة رايقة” من فيلم “من أجل زيكو” وأغنية و”غلبان” لـ أصالة وإعلان “مش هو هو” للفنانة ياسمين عبد العزيز وكريم محمود عبد العزيز التي تم عرضه في رمضان السابق.
تفاصيل أغنية الغزالة رايقة
أفصحت منة عن سبب تسمية أغنية “الغزالة رايقة” بهذا الأسم وكيف قامت بكتابتها فقالت: وأحنا شغالين على الأغنية أنا وإيهاب عبد الواحد وأحمد طارق يحيي وحتى بيتر ميمي كنا حاسيين أن الأغنية دمها خفيف وهتعمل حاجة”.
وتابعت: ” كنا رايحين تصوير وساعتها كنا بنحب نسمع وردة ونحب نشوف المواضيع القديمه الي الناس متكلمتش فيها فأنا كنت مبسوطة بالجو وبقوله الغزالة رايقة بوصفله الحالة الي انا فيها عشان بنطلع أفكار سوا كدة، فبصلي وقالي هي دي وكتبتها وحوشتها عندي”
وأردفت: “بعدها بشهرين بيتر ميمي كلمني وقالي عايز أغنية لذيذة وأول ما قال اللحن افتكرت كلمة الغزالة رايقة حسيتها أنها بتقولها فدي وقتها بقى”.
بداية منة القيعي
وكشف والدها الكابتن عدلي القيعي عن البداية الفعلية الفنية لها وأنها كانت بسبب الموسيقار عمار الشريعي وأكملت منة الحديث وقالت: “أنا خدت موبايل بابا من وراه ودخلت على الأرقام وجبت رقمه وكلمته وقولتله بابا مش عارف إني بكلمك أنا بكتب ونفسي أقرالك الحاجات الي بكتبها”.
وأضافت: “قالي اقريلي قعد نص ساعة يسمعني وميتكلمش كلمة وبعد ما خلصت قالي بصي يا منه انتي افكارك حلوة اوي بس انتي اوزانك مجتش خالص والي شادني ليكي أنك عندك أفكار والأفكار والاوزان والقافية ممكن تتعلميهم”.
مكالمة الزعيم عادل إمام لـ منة
كما كشف عدلي القيعي أن الفنان عادل إمام من دفعته وهو من شجع منة على الاستمرار دون أن يكون على علم أنها أبنته وطلب من ابنته أنه تقص الموقف لـ منى الشاذلي فقالت: “ده كان هايلايت في كريري لحد النهاردة، لقيت عمي بيوصلي في المكتب وبيقولي حد من مكتب الزعيم بيحاول يوصلك وأنا مكنتش مصدقة وبقول يمكن حد عايز من الشركة بتاعت الدعايا والإعلان”.
وأضافت:” لقيته بيكلمني من رقم خاص وبيقولي أيوه يا منة أنا عادل إمام فقولتله يالهوي قام ضحك أول ما ضحك الضحكة بتاعته عرفت أنها هي قعدت أقول يالهوي ومكنتش مصدقة وقعد يشجعني ويقولي أنه بيسمع الأغنية كل يوم”.
وأردفت: “قالي كمان أكمل في اللون ده ومشتتش نفسه واداني تشجيع كبير وسألني أنا لو أنا فعلًا بنت عدلي القيعي قولتله ايوه كان بابا قاعد جمبي وادتهوله وهو كل ده كان بيحاول يزقني وميعرفش إني بنته أصلا”.
كواليس عن إعلان “مش هو” لـ ياسمين عبد العزيز
نجحت منة أن تدخل إلي قلوب الجمهور بدون أن يتعرفوا حتى على اسمها ولكنهم يغنون أعمال فنية بتوقعيها ومن أبرزها إعلان لأحد شركات الإتصال التي تم عرضة رمضان السابق ويحمل “مش هو” لـ ياسمين عبد العزيز وكريم محمود عبد العزيز
وكشفت منة قصته فقالت: “كنت مع أحمد طارق يحيي واتكلمت معاه وشايفة أن الصدى الي حصل ده بسبب ياسمين وكريم، أحنا اه اشتغلنا وتعبنا في الفكرة حتى لما قابلتهم قولتلهم أن اللذاذة كانت في دليفري الكلمات والحضور كمان فرق كتير وكنت فرحانة بياسمين عشان بحبها جدًا وكان ليا تجربة مع كريم قبل كده في الغزالة”.
عدلي القيعي يكشف عن أفضل أغنية لـ منة من وجهة نظره
كشف كابتن عدلي القيعي عن أفضل أغنية لها من وجهة نظره فقال: “في اغنية مهمه ممكن متبقاش الأحلى بس أنا شايفها أنها حلوة ومهمة وكانت دي التجربة الوحيدة الي منة أنتجتها عشان خاطر مامتها عملتها قبل عيد الأم هي واحمد طارق يحيي وغناها أحمد شيبة اسمها “أه يانا ياما”
وتابعت منة” أنا كان نفسي أعمل حاجة شعبي للأم والموضوع حصل بسرعة وسلاسة لذيذة، ممكم متسمعتش اوي لأنها كان من إنتاجنا ومعندناش خبرة أوي في الموضوع ده”.
أغاني قدمتها منة القيعي
قدمت منة القيعي عدد كبير من الأغاني التي لاقت نجاحًا ملحوظًا عقب طرحها وهي “الغزالة رايقة” لـ محمد أسامة و “سايرينا يا دنيا” لـ أحمد سعد و “في حتة تانية” لـ عبد الباسط حمودة و”غلبان” لـ أصالة وأغنية “أه يانا ياما” لـ أحمد شيبة.
