بدأت الفنانة الشابة إيمان الشريف مشوارها الفني بمسرح هواة بالإسكندرية منذ صغرها، ثم قدمت في أوبرا إسكندرية مسرح سيد درويش، وقدمت في معهد فنون مسرحية في القاهرة وتم قبولها وتخرجت من معهد فنون مسرحية، وبعد تخرجها منه بعامين قدمت في معهد موسيقي عربية وتم قبولها، وظلت تعمل في التمثيل والغناء معًا.
وكان لمجلة هافن حوار خاص معها عن مسلسل البيت بيتي والتي شاركت فيه مؤخرًا.
من رشحك لدور شيرين في البيت بيتي؟
اللي رشحني للدور خالد صفوت ودي تاني حاجة بشتغلها معاه وأستاذ خالد مرعي تاني حاجه بردو بشتغلها معاه وأستاذ خالد صفوت عرض عليه فيديو لشغلي وهو أختارني.
حدثينا عن كواليس العمل كيف كانت؟
الكواليس كانت لطيفه جدًا أنا كان التعامل بتاعي مش مع ناس كتير هو كان مع مصطفى خاطر بحكم إنه اخويا، ومحمد محمود عبد العزيز برضوا وجلال الزكي مش هتلاقي ناس كتير يعني مش بتعامل مع كل الناس في العمل.
بس الكواليس كانت لطيفه جدًا وكان في مشهد اللي هو توزيع الميراث، أفتكر إننا قعدنا نضحك كتير جدًا في الكواليس لأن الحالة أصلا كانت مبهجة.
حدثينا عن تجربتك مع طاقم العمل مصطفى خاطر ومحمد محمود عبد العزيز وكريم محمود عبد العزيز؟
الناس كلها لطيفة ومصطفى حقيقي فنان محترم جدًا وموهوب وحقيقي أتبسطت معاه والكيميا لطيفة جدًا بينا، ومحمد محمود عبد العزيز برضوا نفس الموضوع وحقيقي كلهم بلا إستثناء.
هو مكنش ليا نصيب يشغل مع كريم، حقيقية أنا من أشد المعجبين بكريم ومصطفى وكلهم الحقيقة، وبحكم إني أشتغلت مع مصطفى ومحمد وجلال الزكي، وكلهم ناس لطيفة جدًا الحقيقة وكان فيه كيميا لطيفة وأتبسطت حقيقي إن أنا معاهم كنت براحتي مكنتش مقيدة في حاجة بالعكس.
ما رأيك في نوعية الشخصيات مثل شيرين؟
شخصية “شيرين” مختلفة عني تمامًا في الحياة أنا مش كدا خالص هي شخصية أنا شوفتها مالهاش شخصية، هي راسمة بس شكل خارجي من برا بدليل إن جوزها بيتحكم فيها ومش عارفة تعمل إيه معاه فهي معندهاش رأي وهي بعيدة عني تمامًا وهي شخصية متعجرفة كدا.
أنا مش معاها خالص بس طبعًا كدور أنا حبيته عشان هو مختلف عني وأنا بحب أعمل الشخصيات المختلفة عني، لأن بيبقي فيها لعب وتفاصيل وإنك تفكري في الشخصية مبحبش حاجه شبهي أوي بحس اه إني ماشي هعملها وأجتهد فيها بس في الآخر مش دي الحاجة اللي الناس هتقول عليها واو فأنا أكيد مش مع شخصية شيرين بس أنا حبيت شخصية شيرين مش حبيتها عشان هي كويسة لاء عشان هي مختلفه عن إيمان.
كيف ترين نوعية الرجال مثل “رامي” في البيت بيتي؟
مع تحفظي علي كلمة نوعية الرجالة اللي زي رامي ممكن يكون كلامي قاسي شوية، أنا بشوف اللي زي رامي في البطاقة بيبقي مكتوب ذكر بس هو كراجل قليل إنه يتقال على حد ده راجل لأن الرجولة دي فيها صفات كتير أوي مش موجودة في أي حد للأسف.
فشخصية رامي لاء هو أنا مقدرش أشوفه في الحياة ومقدرش إنه يبقى جوزي ومقدرش إنه يكون حد أعرفه حتى، لأن الشخص اللي زي رامي مش مسؤل وعايش على فلوس مراته، فالشخص ده برفضه تمامًا ومقدرش يكون موجود في حياتي ومقدرش أتعامل معاه حتى لو صداقة.
بماذا تنصحين السيدات المتزوجات مثل رامي؟
أنا مبعرفش في موضوع النصايح ده لأن كل واحد ليه ظروفه بس قولتلك رأي الشخصي، أنا استحالة يكون في حياتي حد شبه رامي بس أكيد قبل الجواز بيبقي في مرحله خطوبة أو تعارف دي أنتي بتبتدي تشوفي الشخص رايح فين أو في المواقف بيتعامل إزاي فأكيد هتفهمي أو هتلقطي أي حاجة توضح إن الشخص ده إستغلالي ولا الشخص ده راجل ويتحمل المسؤلية فأكيد هتفهمي أي حاجة.
ولو محصلش والست أتجوزت واحد وأكتشفت بعد الجواز إن هو كدا وأنا مش مع حتة إنه عشان لو في أولاد فأستحمل لو الشخص مينفعش إنه أكمل معاه حياتي وإنه شخص بيستغلني ماديًا وكل حاجة مقدرش أكمل.
أنا عندي إنه أروح أشتغل وأتعب مقابل إن أعيش حياة كويسة أنا ساندة نفسي بنفسي، ده أفضل لي من إني أكون عايشة مع حد مش متحمل المسؤلية أولًا وثانيًا يكون بيستغلني لاء.
ولو هيبقى فيه نصيحة أكيد مش هقول للناس ةنفصلوا عن أزواجكم لأن كل واحد ليه ظروف مقدرش أحكم بحاجة، بس أنا مقدرش أعيش مع شخص زي ده ولو أنتي قادرة تعملي حاجه لنفسك وعندك شغل ليكي بتاعك أو حتى شغل عند حد بس هتكوني نفسيا اهدي وتكوني مرتاحه بعيد عن شخص بيستغلك ده أحسن بكتير وممكن الأولاد يتربوا بطريقه أفضل وهما بعيد.
لو أصبحتىدي في موقف بينو وتم أخذ حقك ماهو رد فعلك؟
أكيد هدور إني أخد حقي وهو مكنش عارف أصلًا أنه ده حقه، وهو كان فاكر إنه باباه فعلًا كتبله القصر فهو مع الأحداث هنفهم إنه إحنا اللي عملنا كدا، غيرنا الوصية تمامًا أو كريم وأنا كنت أكيد عارفة عشان هو مستهتر وكدا وأنا لو عارفة أن ليا حق هفضل أسعى أن أنا أخده لأن ده حقي وأكيد ربنا هيحاسبني لو أنا أتنازلت عن حقي.
من وجهة نظرك هل الإستهتار مبرر إن الأخ لا يعطي لأخيه حقه؟
لا مش لدرجة إنه أخد حق حد بس لو أنا أخت وأخويا الصغير مستهتر أنا ممكن أحافظله على حقه ده لحد ما يفهم أو يستوعب أو يدرك أنه لو خد الحاجة دي ممكن يضيعها، فأنا أماني ليه أنه أخليني محافظة عليها لحد مايفهم الدنيا أو أحاول أفهمهاله بشكل مبسط إيه، وكدا كدا لازم ياخد حقه.
ما النصيحة الذي تودي تقديمها للأخوات لكي يوطدوا علاقاتهم ببعض؟
المفروض إن دي حاجة بالفطرة كدا ودي راجعة للتربية من وهما صغيرين أتربوا إزاي لأن الموضوع ده بيفرق جدًا، ممكن يبقى عندك أخين تخليهم يطلعوا بيعشقوا بعض بجد وبيحبوا بعض وبيخافوا على بعض أوي وممكن تخليهم يطلعوا بيغيروا من بعض ويبقوا كارهين بعض، وأنا بشوف أن الموضوع راجع للتربية من الأول وإن نخليهم يحبوا بعض بجد ويخافوا على بعض ويحبوا الخير لبعض ودي أهم حاجة وإنهم يكونوا واحد مش إتنين يعنى.
لو أخوات كتير لازم كلهم يبقوا واحد مينفعش يبقى كل واحد بيفكر في نفسه وبس لا أنا بفكر في المجموعة الموضوع ده راجع التربية وللأسف مش كل الناس بتربي الأولاد زي بعض وفي ناس بتفرق مابينهم وده بيخليهم لما بيكبروا يبقى في حالة أنانية شوية عند بعض منهم في حالة غيرة وراجع للتربية عشان هما يكبروا ويبقوا بيحبوا بعض أكتر ويفهموا أن ده حب بالفطرة ولازم ينموه مش إن هما خلاص إتربوا كده فهو كده يعني.
هل بتأمني بوجود العفاريت والأرواح المحبوسة مثل القصر في البيت بيتي؟
اه بأمن بيه طبعًا لأنه دي حاجة مذكورة في القرآن ووجودهم حقيقة، بس الحمد لله الواحد عنده شوية إيمان قوي والحمد لله بحصن نفسي على قد ما أقدر وبحاول ماركزش أوي في الموضوع ده بس لو هقعد في مكان كده لو أنا عارفة مش هقعد فيه أصلًا.
لو معرفش أي مكان بدخله غريب عني مش بهتم ومش بركز أنه مفيش حاجة اسمها كده بدخل أقرأ قرآن وأصلي، وخلاص الدنيا تمام.
ما نوعية الأعمال التي تتمني تقديمها؟
نفسي أقدم حاجات كتير مفيش حاجة حاصرة نفسي فيها، نفسي ألعب كوميدي مع إني دوري في المسلسل كان بعيد عن الكوميدي، نفسي أعمل أدوار كتير مختلفة.
ما رأيك في نوعية المسلسلات القصيرة مثل البيت بيتي؟
أنا بحب عامة حلقات المسلسل اللي هو بيبقى ١٥ حلقة أو ١٠ حلقات، أنا بحب الحاجات دي جدًا دلوقتي بقى الخمس حلقات وده موجود أصلًا من زمان، بس أحنا عشان موسم رمضان ٣٠ حلقة بنبقى حاصرين نفسنا في ٣٠، لكن أنا بحب عامة الأعمال ٨ حلقات و ١٠ حلقات.
أهم حاجة الإيقاع يكون مشدود وفي رسالة وفي مشكلة بتحصل وفي أحداث بحس أنه دا بيبقى أفضل من أنه يتعمل مسلسل طويل كل حاجة وليها طعمها بس بشوف أنه الحكايات الصغيرة بتبقى إنجاز وبنقول كل حاجة فيها وبشكل سريع وإن إحنا الإيقاع كمان بقى سريع أوي في الحياة عامة والناس مبقتش عندها وقت تقعد تتفرج على حاجة وقت طويل بقى يستهويها الحاجة الصغيرة والحلقات القصيرة.
من وجهة نظرك… المسلسلات خارج موسم رمضان أفضل أم في موسم رمضان؟
كل حاجة وليها وقتها، رمضان ليه بهجته والمسلسل فيه بيبقى مختلف والعمل الكويس هو اللي بيفرض نفسه بس إحنا مش هنستنى طبعا على موسم رمضان.
والموسم اللي برا رمضان ليه جمهوره وليه ناسه ووقته والحاجة الكويسة هي اللي بتفرض نفسها وبتخلينا نشوف الحاجة سواء في رمضان أو برا رمضان، في أعمال كتير مش عايزة أقول أسماء بس في أعمال كتير نجحت جوا رمضان برغم زحمة رمضان بكم المسلسلات الكتير بس في أعمال فرضت نفسها كمنتج بيتقدم وكذلك برا رمضان الحاجة الكويسة هي اللي بتبقى موجودة والناس بتشوفها كويس أو بتسمع عنها.
وأقرب مثال البيت بيتي هو برا رمضان ومش معروض في سيسزون رمضان ومعروض برا رمضان في وقت عادي مفهوش أي حاجة والمسلسل نجح جدًا لأنه فرض نفسه.
هل المنصات إيمان الشريف، البيت بيتي، مصطفى خاطر الإلكترونية ممكن أن تأخذ مكان شاشة التليفزيون؟
مفيش حاجة سواء منصة أو تليفزيون مفيش حاجة هتاخد مكان حاجة يمكن عشان الرقابة والناس بقت تروح للحاجة اللي على النت تشوفها سريعًا من غير إعلانات والتفاصيل دي، بتبقى أفضل بس في الآخر التليفزيون هيفضل هو التليفزيون ليه طعمه وليه شكله والناس مش هتستغنى عنه معتقدش أنه حتى بعد سنين قدام هيبقى فيه أكيد تطور بس معتقدش أنه هيستغوا عنه كل حاجة وليها جمهورها وليها شكلها وطعمها.
