ردت الفنانة هيدي كرم على متابعيها عبر استوري “الإنستجرام” الخاصة بها، في عدة موضوعات أهمها مرورها بحالة اكتئاب في مرحلة من حياتها، وإنها سيدة متفتحة وفكرة الزواج متواجدة حتى إذا تزوجت بشخص من غير ديانتها.
وقالت:”الجواز نصيب وأما يجي الشخص المناسب والوقت المناسب ممكن أتجوز حتى لو ديانته غير ديانتي، أنا شوفت ناس كتير اتجوزت من ديانات مختلفة وكانت ناجحة وأنا ست منفتحة ومتفتحة على الديانات التانية”.
وتابعت كرم:”مش هتجوز واحد أصغر مني بكتير، لأني دايما عندي تخوف من الموضوع ده، بخاف شكلي يبقى كبير عنه وشي يكرمش قبله، عينه تزوغ على واحدة تانية، فالفكرة دي مرفوضة بالنسبالي”.
وأضافت:”أنا أخدت أدوية اكتئاب في مرحلة من حياتي وشايفة إنه ليه لا، لأني عديت بمرحلة صعبة ودي حاجة مش عيب إني أخد أدوية بسبب حالتي النفسية”.
وتحدثت الفنانة هيدي كرم عن أدوية الاكتئاب قائلة:”مش باخد أدوية اكتئاب حاليًا بس كنت باخدها في مراحل من حياتي، ومش شايفة أنه عيب إننا ندور على حاجة تساعدنا، أدوية الاكتئاب زيها زي أدوية دور البرد بلاش تقاوحوا ودوروا على حاجة تساعدكم تخرجوا من المرحلة دي عشان صعبة”.
والجدير بالذكر أن شاركت الفنانة “هيدي كرم” في رمضان الماضي بمسلسل “الاختيار 3″، بالتعاون مع عدد كبير من الفنانين، أبرزهم كريم عبد العزيز، أحمد عز، ياسر جلال، أحمد السقا، إيمان العاصي، محمد رياض، ومن إخراج بيتر ميمي.
