عرفت انه مات!!

عرفت انه مات؟ هو مين
هو جارنا من زمان …
سرحت في البدايه اول يوم ظهر في بيتنا ..
كان شاب وسيم وقيم بيغيروا منه شباب حارتنا
كان مجنن البنات
لابس قميصه المشجر ماشي وراه الثقه بتجرر
رافع راسه فوق عالي ولا عينه بحد بتتاثر
كان بيخرج كل يوم بس مبدر
اخر الليل بيجي مجرر رجله جر
زي مايكون اتنكس او نازل عليه القر
نص لبسه مش مهندم وقميصه مفهوش ولا زر
كنت اسمع جار جار يجبوا سرته والحكاوي نزله تخر
قولت مين الحلو الاسمر مين اللي ضحكته في الصبح تنور
لكن مساه دايما معكر
يوم يومين علي دا الحال والوضع مش بيتغير
بعد شهر لا شهور قول سنين اتبدل حاله المسكين
لابس جلابيه بيضه دقنه نازله لنص بطنه وماسك سبحه طول مترين
اتبدل ليه الحزين
يوم يومين سمعت صوته في ميكرفون وقت صلاة الجمعه
كلامه كله حكم ومواعظ وورا كل كلمه دمعه
قولت ياهادي الهدي انت ادري بيه يارب
بردو عدي شهر اتنين قول سنين
شوفته مره نازل وحده بس عينه مغربه وايده من بعضها مقربه
زي خايف او حزين
قولت اسال هو مين يمكن اسعده الحزين ابن الحزين
مفهمتش من حد كلمه كل واحد رمي ليا كلمتين
اللي قال اصله يتيم واللي قال امه هامله واللي قال منعرفوش جه منين
قولت لنفسي لازم اقرب منه يوم واصاحبه حبه الوحده مره
حاولت مره وراها مره
وفي يوم صحيت علي صوت جيراني
قولت خير قالوا صحبنا مات سالت مين الجاني
قالوا الولد انتحر
قولت يا خبر
سالت نفسي ليه انتحر
بس الاجابه موجوده في كل العيون
في اللي بعد واللي سابه بات حزين
واللي اتكلم واللي شتم واللي عاب فيه بكلمتين
بيقولوا الغربه مره
انا بقول المره انك تعيش في بلدك وحيد
وسط ناسك وسط اهلك بردو وحيد
ايد بتضرب وايد تشد وايد بتسلخ من حديد
معدش رحمه مفيش تفاهم
كل بيعادي الكل والكل عامل فاهم
حد يوم حس بيه لما صاع
حد يوم ساله ليه بقيت في دين الله مباع
حتي لما حزن وقفل علي حاله ضاع
بين وحدته وبين غربته وبين سيرته اللي مشاع
عرفته هو مين
هو واحد زي الف كل يوم بيموتوا بسبب التنمر
هو واحد زي الف عايش في زمن التكبر
هو واحد زي زيك بس ورا حزنه اتستر