الفن نيوز

هدى المفتي عن مروان حامد: “مختلف وأي حد يتمنى يشتغل معاه”

حلت النجمة الشابة هدى المفتي ضيفةً مع الإعلامية منى الشاذلي، خلال حلقة اليوم من برنامج “معكم” المذاع عبر قناة “cbc”.

وتحدثت هدى عن نجاحها، من خلال شخصية الراقصة نرجس.

والتي قدمتها في فيلم “كيرة والجن” مع النجمين كريم عبد العزيز وأحمد عز، ومن إخراج مروان حامد.

وكشفت هدى أنها ذهبت لعمل أوديشن على دور بالفيلم، لكنها لم تكن تعرف أنه دور نرجس.

وقالت هدى: “المكتب بتاع أستاذ مروان حامد طلبوا مني إني آجي أعمل أوديشن، علشان خاطر الدور بتاع نرجس”.

ولفتت: “وحقيقي ماكنتش أعرف أنا بعمل أوديشن لأنها دور أصلًا، وبدأ هو يطلب مني حاجات ويديني ورق، يقولي اقري كذا”.

وأردفت: “طب اتكلمي بتون صوت معين بطبقة صوت معينة، طب أنا عايز نجرب ميك أب معين عليكي، عايز نجرب لبس معين”.

وتابعت: “وبدأنا واحدة واحدة، هو فيه ورق إنتي عمالة بتقرأيه معاه، فيقولك اقرأيه بالطريقة المعينة”.

وواصلت: “طب لو إنتي كذا هتقرأيه إزاي؟، لو إنتي رقاصة هتقرأيه إزاي؟، غموض فظيع، وكل يوم أنا أروح ها هياخدوني ولا مش هياخدوني؟”.

وعمّا إذا كانت تعرف أن العمل من البداية من بطولة أحمد عز وكريم عبد العزيز أم لا، قالت هدى: “وقتها، آه طبعًا”.

وأوضحت: “الأخبار نازلة، وهما كانوا مصورين صورة أصلًا، اللي هي أول صورة نزلت دي، من قبليها بكتير”.

وعن أمنياتها حول الدور، قالت: “بصي أنا كنت متأكدة إن الدور، عارفة فيلم “خمسة باب” بتاع “يا تاج راسي” ده؟، إنها واحدة منهم، ماعرفش ليه؟”.

وأكملت: “يعني كنت متأكدة إنها واحدة من الناس دي، بس رقاصة رقاصة لأ خالص، حاجة من النوع ده، كنت حاسة إنها من النوع ده”.

أما عن السبب في ذلك، أوضحت هدى: “لأن نوع اللبس اللي كنت بقيسه، ونوع الماكياج اللي كان بيتحط، كان في السكة دي خالص في السكة دي موت، فحسيت إنه هيبقى في السكة دي بس”.

هدى المفتي تكشف عن أسلوب مروان حامد كمخرج

واستكملت هدى: “أستاذ مروان حامد كمخرج مختلف تمامًا، يعني أي حد يتمنى يشتغل مع أستاذ مروان حامد”.

وأشارت: “خصوصًا لو هياطك في دور زي ما يكون هيحطك في قالب هيصبك في قالب معين وهيشكلك بتشكيلة جديدة”.

ثم لفتت: “فكنت متأكدة، وأنا حاطة في بطني بطيخة صيفي، إني هبقى طالعة حاجة صح جدًا”.

وحول إذا ما كانت قد شاهدت الفيلم في السينما، قالت هدى: “آه في السينما، مافيش حد مع أستاذ مروان حامد بيتفرج على الفيلم قبل الفيلم خالص، هو الفيلم يومها في السينما، زيك زي كل الناس”.

رضاء هدى المفتي عن دورها في الفيلم

وبخصوص إذا كانت راضيةً عن نفسها في الفيلم، أكدت هدى أنها كانت راضيةً عن دورها في الفيلم جدًا.

وكشفت: “كنت مبسوطة أوي، يعني كنت يومها حاسة إن أنا عملت حاجة مهمة، يعني اللي هو حاجة دور مهم”.

لتكشف هدى عن الأوديشن، الذي كان من ضمن مشاهد الفيلم، قائلةً: “المشهد بتاع القطر القشاش، لما رايحين لأحمد عز، وبعدين هي قالت له “القطر القشاش”، فهو ده المشهد، اللي أنا عملت عليه أوديشن”.

مشيرةً: “أنا بعمل مشاهد على مدار أسبوع مع أستاذ مروان، أنا باجي كل يوم أعمل أوديشن، وفي الآخر لما عرفت، قال لي “بتعرفي ترقصي ولا لأ؟””.

كاشفةً عن ردها عليه، قائلةً: “فقلت “آه بعرف أرقص طبعًا”، “لأ أنا بتكلم عن الرقص بتاع سامية جمال بتاع زمان القديم ده، بتعرفي ترقصيه؟””.

مضيفةً: “قلت له خايفة الدور يروح “يعني آه عندي فكرة بتفرج كتير، بس ممكن أتعلم برضو”، كنا داخلين بعد رمضان، وجاب لي اتنين مدربين رقص قعدوا يمرنوا فيا”.

الفيلم استوحى شخصية الراقصة من تحية كاريوكا
وفيما يتعلق باستيحاء الشخصية من تحية كاريوكا، قالت هدى: “هي الشخصية نفسها مستوحاة من تحية كاريوكا، لأن هي كانت راقصة في الزمن، اللي هي كانت فيه”.

منوهةً: “غير طبعًا ممثلة، بس كانت برضو مع المقاومة، كانت بتساعد ضد الإنجليز، وكانت بتشيل منشورات في العربية بتاعتها”.

يذكر أن النجمة هدى المفتي شاركت في ثلاثة أفلام، خلال موسم الصيف، وهي “عمهم” مع محمد إمام، “كيرة والجن” مع كريم عبد العزيز وأحمد عز، و”بحبك” مع تامر حسني وهنا الزاهد.

اترك تعليقاً

لن يتم نشر عنوان بريدك الإلكتروني.

جميع الحقوق محفوظة لـ مجلة هافن HAVEN Magazine
Powered by Mohamed Hamed
error: Content is protected !!