تصدرت الفنانة القديرة فريدة سيف النصر التريند، بعد دعمها للفن والفنانين.
وذلك في بوست نشرته عبر حسابها الشخصي بموقع التواصل الاجتماعي “الفيسبوك”، أعلنت فيه عن استيائها من الهجوم المستمر على الفن والفنانين.
وأكدت أن الفنانين يتسببون في فتح بيوت 14 مليون مواطن، من بينهم عمال أو أسطوات.
وقالت فريدة في البوست:”أنا زعلانه علينا كلنا أوي، المصريين أحلى وأطيب وأجدع من كده بكتير، خفة دم وكرم وذوق، إيه اللي حصل، ليه بنستخبى ورا شاشات وننزل نحر رقاب بعض، الكلمة القاسية بتذبح، بقينا نكديين مانعرفش نفرق بين جد وهزار كله عايز يتخانق مع كله، إيه ده”.
وأردفت:”وكل يوم يعاملوك بوش أو حسب المصلحة في إيه، بعض الناس ماسكين الفنانين وكأن في تار بلا أسباب، دي عجزت ودي كرمشت ودي غيرت دينها وده دمه تقيل وده كبر في السن، لكن بيغني، وده بيرقص كونغرو وده اتكسح ودي روحي موتي، كفاية عيب بتقولوا كده لأهاليكم، ما كل العالم وإنتم بعدين لازم تكبروا دي سنة الحياة، مالكم في إيه بجد، هما الناس دي ما أسعدكمش أعمالهم فترات من الزمن، طيب بلاش إنت مابتحبش فلان غيرك بيحبه، في إيه يا جماعة، تحسوا مخطط لهدم الفنانين القوى الناعمة، اللي فاتحين بيوت أربعتاشر مليون، متخيلين، كل المهن شغالة معانا، تحت إيديهم كام عامل وأسطى، كل واحد فيهم عنده أهل وزوجة وأطفال، وفي اللي جوز ولاده وعندهم بيوت مفتوحه، بتحاربوا تمن عدد البلد في أكل عيشهم، اقرأوا كده المسلسل بينكتب ناس قد إيه عمالة في كل المجالات، من أول مؤلف لحد السواقين في العمل، مسلسل واحد ممكن يشغل خمسة آلاف حد مش هزار، شوفوا الأسماء وقولولي، كفاية هدد في الفن، الوحش انقدوه بأدب والكويس شجعوه، إنما تهزأوا فنانين كبار ليه يعني، على فكرة أنا عارفة إنها لجان مستهدفة الفن المصري، والفن عمومًا”وأتمت: “ما هو العربي بيصب هنا، هاه قررتوا إيه، هانشتم من ورا الشاشة، ولا هانقول كلام نصح حلو يا باشا”.
ثم نشرت فريدة بوست آخر، بعد تصدرها التريند، بطريقة خفيفة الظل، قالت فيه:”إيه يا جماعة، هو أنا كل مافضفض أبقي تريند ليه، يعني كلامي ديكولتيه ولا مقالي له فتحة من الجنب، ده أنا مامي يا روحي، قولت لكم جوجل طبيخي يوه أقصد خبيطي بطيخي نو خطيبي مون فيانسيه أحيه، ماتحرمش منك يا جوج، إيه بادلع حبيبي”.
يشار إلى أن آخر أعمال فريدة مسلسل “رانيا وسكينة”، الذي تم عرضه في رمضان الماضي.
وشاركت في بطولته إلى جانب النجمتين روبي ومي عمر، ولاقى العمل نجاحًا كبيرًا عند عرضه الأول برمضان، عبر قناة “mbc مصر”.
بجانب أنه يواصل نجاحه حاليًا، خلال العرض الثاني له أيضًا عبر قناة “mbc مصر”.
وقد لعبت فريدة من خلال المسلسل شخصية الحاجة ياقوت، التي تختبئ عندها رانيا وسكينة، هربًا من ملاحقة الشرطة لهما، وكذلك مطاردة عصابات الألماظ لهما.
يذكر أن “رانيا وسكينة” من بطولة روبي، مي عمر، أحمد خالد صالح، عمر الشناوي، فريدة سيف النصر، مدحت تيخة وغيرهم، وإخراج شيرين عادل.
