أجرت المطربة شيرين عبد الوهاب مداخلةً هاتفيةً لبرنامج “معكم” مع الإعلامية منى الشاذلي، خلال استضافتها للشاعر الغنائي أيمن بهجت قمر، بعد حصوله على البكالوريوس.
وهنأت شيرين “قمر”، قائلةً له: “مبروك يا أيمونتي”، كما فجرت مفاجأةً مدويةً، كاشفةً: “وأنا كمان النهاردة لسه قايلة لدكتور أشرف زكي أنا كمان عايزة أكمل تعليمي “.
لتعلق منى: “دي شوطة”، ثم تابعت شيرين: “دي خطوة جريئة جدًا، والواحد دلوقتي يعرف يتعلم، وإحنا صغيرين كنا بكره الصحيان بدري والمدرسة، بس دلوقتي لأ”.
ولفت “قمر”: “بس المذاكرة سهلة أوي”، وأكملت شيرين: “إحنا بنفتقد في حياتنا الروتين، الروتين ده مهم جدًا، عشان الفنان مايصابش بأي اكتئاب أو وحدة، أو يحس إنه ملك نفسه كبير نفسه”.
وأردفت: “لما نرجع تاني في سننا ده، نبقى عايزين نكمل دراستنا دي حاجة جميلة جدًا”، لتسألها منى: “كان حاكيلك عن موضوع الشهادة، اللي قال هيكملها وهيكملها، كان قاليك على الموضوع ده؟”.
لتجيب شيرين: “أيوه، وبعدين كمان اتفاجئت بتنفيذها بصراحة، وخطوة جميلة جدًا وأنا بشوف بره الناس عندها 70 سنة و60 سنة بيعملوا كده”.
وعن بداية معرفتها بـ”قمر”، قالت شيرين: “كتير أوي، 20 سنة كده مثلًا”، ليكشف “قمر”: “من بحبك أوي، فاكرة؟”، لتعلق شيرين: “طبعًا”.
أيمن ده ضنايا
وعن الصفات، التي تميز “قمر”، قالت شيرين: “بصي أيمن ده ضنايا، أنا بحسه ضنايا”، ليعلق “قمر”: “أنا أكبر منها، ده أنا أبوها، هي ضنايا إحساسًا”، لترد شيرين: “أيوه طبعًا إحساسًا”، وسط ضحكات منى على حديثهما.
وواصلت شيرين: “بصي أيمن طفل كبير، بسيط جدًا فوق ماتتخيلي، وهادي وبيخلي باله دايمًا من صحابه وبيتابعهم، وأنا كمان بيتابعني مش سايبني خالص”.
وأكملت: “ووقف معايا في أزمتي الأخيرة دي وقفة أنا عمري مانساهاله، ورد “قمر”: “إحنا إخواتك يا شيرين”، لتضيف: “أنا بحب الجمهور كله وبحييه، هما بجد وقفوا معايا”.
شيرين تحضر مع “قمر” فيلمًا جديدًا
كما كشفت شيرين عن مفاجأةً سعيدةً لجمهورها، وهي عودتها للسينما من خلال فيلم كوميدي تحضر له مع “قمر”.
فلتسقط الرجالة
ورفعت شيرين شعار: “لا حب مع الحياة، ولا حياة مع الحب”، وأضافت: “فلتسقط الرجالة”، ليعلق “قمر”: “هي شيرين لازم تروح ضاربة حتة كده”.
وتمنت الإعلامية منى الشاذلي للمطربة شيرين عبد الوهاب التوفيق، موجهةً لها رسالةً، قالت فيها: “إنتي عندك قلب محب بطبيعتك”.
واستكملت: “وبتنمنالك أي قصص تدخليها، عمل، عاطفية، أسرية، حتى بيزنس تبقى قصص موفقة وهادئة تليق بمكانتك الكبيرة”.
يذكر أن الشاعر الغنائى أيمن بهجت قمر كان قد فاجأ الجميع بحصوله على البكالوريوس في السياحة والفنادق، بعد 17 سنة من قيده بالفرقة الرابعة.
