ظهرت الفنانة نيرمين الفقي بإطلالة أنيقة، حيث ارتدت ملابس باللون الأسود، واعتمدت على ترك شعرها مفرودًا على أكتافها، وبدت عليها ملامح خسارة الوزن بشكل لافت.
من جهة أخرى، أعربت نيرمين الفقي عن سعادتها بالمشاركة كضيفة شرف في مسلسل “الكبير أوي 6” بطولة أحمد مكي، قائلة: «النهاردة استمتعت استمتاع غير طبيعي، كل الناس كانت هايلة، ده غير إن مكي تحسيه من جواه تلقائي موهوب، وكان نفسي أكمل أكتر».
وأضافت خلال مداخلة هاتفية مع أحد البرامج : «أول حد لمتي بتحلى معاه هم أهلي وعيلتي، بعد كده صحابي.. الصحاب اللي بجد، لأن فيه صحاب بجد وفيه صحاب وأوي أوي دول، فأنا برتاح مع الناس الطبيعية التلقائية اللي بنحب بعض بجد ومن قلبنا».
وتابعت: «أنا مقلة في أعمالي، وده مش بإرادتي، لكن حسب الأعمال اللي بتُعرض عليا، ولأنّي بنتقي أدواري، ومفيش فنان بيقعد في البيت بمزاجه».
كما تحدثت عن صعوبة العمل في التمثيل، قائلة: «كل أعمالي أرهقتني، إحنا مهنتنا صعبة للغاية، وكل عمل بيأخذ من صحتنا وعمرنا، وبيبعدنا عن أهالينا وحياتنا الشخصية، وأتذكر أثناء تصوير آخر جزء من مسلسل “نصيبي وقسمتك”، كنا بعيدًا عن البيت لمدة 36 ساعة، وفي مسلسل “أبو العروسة”، بعد ما خلصت تصوير، من التعب روحت المستشفى».
وأشارت إلى رغبتها في التنوع في أدوارها: «بحاول أغير جلدي وأقدم شخصيات متنوعة، وأحاول بشتى الطرق إني أبين موهبتي حسب الأعمال اللي تُعرض عليّ».
وتحدثت عن أكثر الأمور التي تؤثر على نفسيتها: «فيه حاجات ممكن تكسر أي ست، زي إنك تختاري بني آدم سليط اللسان أو ممكن يمد إيده عليكي، أو إن الراجل اللي مرتبطة بيه يحسسك إنك ولا حاجة.. دي حاجات تكسر أي حد».
وعن علاقتها بوالدتها، قالت نيرمين الفقي: «أمي الله يرحمها كانت بتطفش العرسان مني، لأنها كانت متعلقة بيا جدًا، وكانت صاحبتي قبل ما تكون أمي، ولما تعبت، تحولت إلى بنتي.. كانت بتخاف عليا جدًا، خاصةً إن علاقتها بوالدي مكنتش مستقرة وانفصلوا، فكانت خايفة عليا إنّي ممكن أتأذى».
