✍️نورهان مجدي الغنام
احمد سعيد، مدرب فنون قتالية يبلغ من العمر 38 سنة، أستمر لمدة ٣٠ سنه فى مجال الفنون القتاليه زى الكونغ فو ، الكيك بوكسينج ، mma , جيوجيتسو.
شارك في أكثر من عمل فني مع أحمد ميكي، آخرهم مسلسل الغاوي.
وكانت لمجلة هافن حوار خاص مع أحمد سعيد وكان نص الحوار كالأتي:
عرفنا أكتر عن نفسك؟
أنا مدرب فنون قتاليه ، وكمان مدرب باركور
رياضه الباركور دى لعبه عسكريه شويه بتعتمد على التسلق و اجتياز الحواجز و النط من مسافات عاليه للارض بدون اى اصابات .
كلمنا عن العمل مع أحمد ميكي؟
اشتغلت مع مكى ٣ مسلسلات الكبير ، الاختيار ، و أخر مسلسل كان الغاوى ، الشغل مع مكى مش بيكون كتير لانه بيعمل معظم المشاهد بنفسه ، الا اذا كان مصاب مثلا زى المسلسل الاخير وده اكتر مسلسل اشتغلت فيه معاه.
لية أخترت شغل الدوبلير رخم أنه خطر؟
أنا مدرب فنون قتالية، وهذا اكسبني خبره عاليه فى مجال الاكشن مثل مشهد نطه من مكان لمكان و المسافه كبيره طبعا الممثل مش محترف و مش هيقدر يعمل مشهد زى ده ، ساعتها يجى دور الدوبلير هنا
مثلا مشهد تانى مطلوب ان الممثل هيتخبط بعربيه بردو خطر ان الممثل يعملها بنفسه لانه مش هيكون عنده خبره ياخد الخبطه فين و ينزل على انهى جزء فالعربيه و يقع ازاى على الارض بدون اى اصابات ، و طبعا ده فى وجود سيفتى كامل للجسم.
إي أصعب حركة عملتها؟
اصعب حركه عملتها فالمجال ده كانت خبطه عربيه فى فيلم كازابلانكا كنت عامل دوبلير الفنان التركى خالد ارغانش وكان طالع فالفيلم بدور شخصيه الخواجه.
https://www.instagram.com/p/B9PctBfFKDx/?igsh=MTRieDhnMm41cGt4bg==
بتستعد ازاى قبل اما تقدم مشاهد النط والضرب؟
الاستعداد بيكون طبعا إحماء كويس جدا علشان كل ماكان الاحماء كويس كل مكان الاداء احترافى اكتر ، و لو المشهد محتاج سيفتى بلبسه تحت الهدوم و ببداء اعاين المكان اللى هتتعمل فيه الحركه و أمن عليه كويس جدا و اعمل اكتر من بروفه علشان احس بالحركه قبل ماعملها.
ايه رأيك في الفنانين اللى بتعمل المشاهد دي بنفسها زي السقا والعوضي؟
الفنانين اللى بيعملوا المشاهد بنفسهم طبعا دى حاجه جميله جدا ، بس فى خطوره اولا على الممثل لانه فالاول و الاخر مش متخصص و ليه limit ، فلو عيند وقرر انه يعمل حركه خطيره فهو بيعرض نفسه للخطر و بيعرض العمل كله للعطله لانه لو لا قدر الله اتصاب “وده احتمال وارد جدا لانه زى ماقولت مش متخصص” كده الفيلم او المسلسل هيتعطل لحد مالفنان يتعالج و الله اعلم علاجه هياخد وقت قد ايه بقي، كمان الدوبلير بيكون محترف وده بيدى المخرج او مصمم المعارك فرصه كويسه جدا انه يصمم عمل قوى وفى مشاهد تشد المشاهد.
https://www.instagram.com/p/CNyhvMsFkHq/?igsh=MWd6OGIxcHBzMzViYQ==
إي الحاجة اللي نفسك تحققها في مجال التمثيل؟
بالنسبالى انا حابب اتعمق اكتر فمجال الاكشن وتصميم المعارك لان الجزء ده فى مصر مش احسن حاجه مع ان عندنا مستويات ممتازه لو استعنا بيها فأى عمل هتعمل طفره فمجال الاكشن فمصر
