✍️ياسر خالد
تعد الفنانة ياسمين رحمي من النجمات الشابات اللواتي لفتن الأنظار بقوة خلال السنوات الأخيرة، بفضل أدائها المتقن، موهبتها الكبيرة وحضورها المميز، إلى جانب قدرتها على الانتقال بين مختلف الشخصيات والأنماط الدرامية بسلاسة شديدة، ما جعلها تحظى بمكانة خاصة لدى الجمهور.
تشارك ياسمين رحمي بعملين أحدهما درامي ألا وهو حكاية هند مع الفنانة ليلى زاهر، التي سيتم عرضها ضمن حكايات مسلسل ما تراه ليس كما يبدو، أما العمل الآخر فهو عمل سينمائي وهو فيلم طلقني مع الفنانة دينا الشربيني والفنان كريم محمود عبد العزيز.
في هذا الإطار كان لـ مجلة هافن هذا الحوار الممتع والشيّق مع ياسمين رحمي، الذي كشفت لنا خلاله أسرار وكواليس كلا العملين.
فإلى نص الحوار…
حدثيني عن شخصية فاتن في فيلم طلقني.
شخصية فاتن في فيلم طلقني هي بنت الفنان محمد محمود وزوجة الفنان محمود حافظ، وهي بنت من طبقة متوسطة وبنشوف من خلال الأحداث إيه الكاركتر.
ما هو شعوركِ وأنتِ تعودين للسينما من جديد بعد غياب سنتين.
هو أنا مش حاسة إن أنا غِبت سنتين، لأن أنا السنة اللي فاتت علطول كنت بعمل فيلم سينما بس بره مصر في الصين، فماحستش إني غِبت أوي مالحقتش يعني، السنة اللي غِبت فيها عن السينما في مصر عملت فيلم بره مصر.
حدثيني عن شخصية يسرا في حكاية هند من مسلسل ما لا تراه ليس كما يبدو.
يسرا في هند هي أخت جوز ليلى زاهر اللي بيقوم بدوره برضو حازم إيهاب، وهي بنت شخصيتها قوية ويعني بنت نقدر نقول إن هي هتبقى كاركتر مختلفة شوية عن حاجات أنا قدمتها قبل كده، بسبب شخصيتها وتعاملها مع الأحداث.
تلتقين بـ ليلى زاهر وحازم إيهاب للمرة التانية بعد في بيتنا روبوت 1 وحكايتي مع الزمان.. حدثيني عن شعورك بكلا اللقائين.
ليلى لذيذة وجميلة صغيرة وحلوة والحياة معاها لذيذة، وحازم إحنا في حكايتي مع الزمان ماكنش عندنا مشاهد مع بعض فمالتقيناش وجهًا لوجه، بس لما اتعاملت معاه شخص لذيذ جدًا وhelpful للممثل اللي معاه.
تعاونتِ مع المنتج كريم أبو ذكري مرتين في الوصية وحلوة الدنيا سكر.. هل الكيميا زادت بينكما؟
العلاقة طبعًا ازدادت ثقة أكبر، ويعني حسيت فعلًا زي ما بيقولوا إن أنا بنت الشركة، ده هيبقى تالت عمل ليا معاهم.
تعاونتِ مع المخرج خالد مرعي في علاقة مشروعة وبابا جه.. هل ترين أن أستاذ خالد من أكثر الناس الذين يخرجون الطاقات الفنية اللي بداخلكِ؟
هو واضح إنه شخص مؤمن بيا ومصدّق فيا وعايز يديني فرص، فبتمنى إن هو يفضل دايمًا مصدّق فيا كده وأفضل دايمًا أشتغل معاه، لأن هو مخرج مريح والشغل معاه بيضيفلي كتير جدًا جدًا.
وهل ترين أن أستاذ خالد مرعي يراكِ بشكل مختلف كممثلة؟
هو بيشوفتي إن أنا بقدم كوميدي وده هو حابّه فيا، فقرر إن هو يقدمني دايمًا في أعمال كوميدية ودي حاجة باسطاني جدًا.
حدثيني عن شعوركِ بلقائكِ بـ دينا الشربيني لأول مرة، والذي يأتي بعدما التقت بها والدتك الفنانة الجميلة عفاف مصطفى من خلال حكايات بنات 1 و2.
هي ماما آه اشتغلت معاها، حتى أول ما شوفتها قولتلها ماما بتسلم عليكي كتير جدًا أنتي واحشاها أوي، هي دينا لذيذة في الشغل وحبّوبة متواضعة ولذيذة جدًا.
قدمتِ الـ30 حلقة، الـ15 حلقة، الـ10 حلقات، الـ3 حلقات وخلال هند تقدمين 5 حلقات.. هل ترين أن الـ5 حلقات أصعب بحكم أنها تكون مكثفةً أكثر؟
هي مكثّفة طبعًا، هي أسهل لأن مابتاخدش وقت طويل في تصويرها، فالشخص بيفضل عايش في مود الشخصية فترة قصيرة مش فترة طويلة، فبتكون الدنيا على الممثل أسهل، وبشوفها بالنسبة للجمهور ألذ لأن القصص سريعة، فممكن حد يتفرج عليها في يومين كلها على بعضها، فبتبقى لذيذة للجمهور مافيهاش لا مط ولا تطويل.
ما الذي يفرق معكِ أكثر عدد الحلقات أم الكرو أم القصة أم الحبكة؟
كل حاجة بتفرق معايا كل حاجة لازم تكون كويسة، الحبكة لو كويسة هيبقى العمل كويس، لكن لو الكرو وحش هيبقى العمل وحش، فكل عنصر من العناصر دي لازم يكون حلو.
شاركتِ مع محمد رمضان في زلزال.. متى سنراكِ في عمل مع محمد رمضان ثانيةً؟
أنا شاركت آه معاه في زلزال بس إحنا مالتقيناش في مشاهد مع بعض، فأنا ماعتبرتش نفسي اشتغلت معاه، اشتغلت معاه زمان جدًا في بدايته في مسلسل اسمه هاي سكول من سنين طويلة، أنا كنت حتى لسه بدرس لسه في المدرسة، ده اللي إحنا اشتغلنا فيه مع بعض وكنا ساعتها وقتها أصدقاء قريبين جدًا، لكن في زلزال إحنا مالتقيناش خالص في مشاهد.
لو اتعرض عليا إن أنا أشتغل معاه، يا ريت ماعنديش مشكلة إني أشتغل معاه، هو ممثل شاطر وأعمالها بتتشاف مش هيبقى حاجة مضرّة إن أنا أشتغل معاه.
هل ممكن لو عُرضت عليكِ فكرة إعلان وأعجبتكِ أن تقدمي إعلانات؟ أم أن تركيزكِ منصب أكثر في الدراما والسينما؟
ده مجال مختلف الإعلانات، الإعلانات بتبقى كأنها بونبوناية الشغل اللي هي مابتبقاش محتاجة مجهود أد ما بتبقى فلوسها أفضل ونطاق إنها تتشاف أكتر من الأفلام والمسلسلات، لأنها بتتذاع في كل حتة الإعلانات، بس أنا بشوف إن يمكن الإعلانات أنا لسّه شوية على إني أعمل إعلانات دلوقتي، دايمًا الإعلانات بتركّز على النجوم السوبر ستارز علشان يبقوا هما اللي بيسوقوا للمنتج، فممكن أعمل كده بس قُدام شوية مش دلوقتي.
