تسنيم أيمن
في قلب القاهرة.. يعد المتحف المصري الكبير واحدًا من أهم المعالم الثقافية والفنية في مصر، حيث جمع بين عبق التاريخ وروعة التصميم الحديث. لكن خلف الإبهار الذي شاهده الجمهور، كانت هناك ساعات طويلة من التحضيرات والعمل الشاق.
حيث تحدثنا مع “فارس السَّيِّد” وهو أحد المشاركين في كواليس العرض عن أدائه وتجربته الفريدة:
المشاركة في عرض ضخم يعكس هوية مصر الحضارية ومش مجرد أداء حركي، إزاى تعاملت مع الفكرة دي قبل ما تبدأ؟
“كنت فخور جدًا إني جزء من حاجة بتعبر عن مصر بالشكل ده. العرض كان عالمي ومبهر وكلنا كنا بنكمل بعض، وحسّيت إن كل حركة بنعملها ليها معنى كبير.”
كنت متخيل إن التجربة هتبقى بالشكل ده ولا الواقع فاجئك؟
“بصراحة الواقع فاجئني جدًا، ما كنتش متخيل إن العرض هيطلع بالجمال ده، كان مبهر وكل حاجة كانت منظمة ومتكاملة بشكل يخليك فخور إنك شاركت فيه.”
إزاي تم اختيارك لتجسيد الشخصية الفرعونية؟
“في عرض المتحف لمصر، ده كان من خلال برضو شركة الكوست اللي أنا كنت مقدّم فيها إنّي أشتغل موديل. فكنت ببعت صوري وكده، وتم اختياري من ضمن الناس اللي شاركوا. بصراحة العرض كان حاجة في منتهى الروعة، وعملت بروفات لمدة 12 يوم على اللي كنا هنقدمه على المسرح، ولحد يوم العرض كل حاجة كانت ماشية كويس جدًا. العرض كان مبهر وكلنا كنا بنكمل بعض، وما كنتش متخيل إنه هيطلع بالجمال والعظمة دي.”
احكيلي عن أجواء الكواليس، هل كان فيها رهبة؟ توتر؟ ولا حماس؟
“كانت مليانة حماس، بس كنا منظمين جدًا وكل واحد عارف دوره. كنا بنبدّل اللبس بسرعة ونرجع نكمّل، والكل كان بيشتغل بروح واحدة.”
بالنسبة للبس والميك أب الفرعوني، استغرق وقت قد إيه في التحضير؟
“اللبس بدأوا يجهزوه قبل العرض بحوالي 3 شهور، وكانوا بيفصلوه قطعة قطعة، وده كان مجهود كبير. قبل العرض بيومين جرّبنا اللبس الكامل مع الميك أب اللي كان فيه تفاصيل فرعونية زي الكحل والحاجات دي.”
هل كل مشاهد العرض كانت مباشرة على المسرح أم أن بعض اللقطات كانت متصورة مسبقًا وتم إدماجها مع العرض؟
“في مشاهد أصلاً متصورة قبل العرض واتحطت مع العرض، بس كانت كل حاجة منظمة ودا اللي خلى الناس ماتحسش بفرق.”
هل كان الفريق كله مصري ولا كان فيه مشاركين من دول تانية؟
“آه، كان فيه مصورين وميكب أرتيست ومعدين أجانب مش بس مصريين.”
كمشارك داخل المشروع، إزاي كنت شايف عملية التنظيم؟ وهل حسّيت إن الدولة فعلاً بتتعامل مع العرض كـ “حدث حضاري وطني” مش مجرد استعراض؟
“التنظيم كان ممتاز جدًا، وكل حاجة كانت محسوبة، وكنا متمرنين كويس جدًا قبلها. فعلاً حسّيت إنهم شايفين العرض كحدث حضاري ووطني، مش مجرد استعراض فني.”
