✍️نورهان مجدي الغنام
حضرت الفنانة لبلبة العرض الخاص لفيلم “عصابة الماكس” التي كان من إخراج حسام سليم، تأليف أمجد الشرقاوي، وشارك في هذا العمل كلًا من أحمد فهمي، روبي، محمد أسامة، حاتم صلاح، لبلبة، أحمد فهيم.
وظهر العديد من الممثلين كضيوف شرف من ضمنهم “أحمد السقا، كريم فهمي، هشام ماجد، حمدي المرغني، محمد لطفي”.
وأثناء حضور العرض الخاص استغلت مجلة هافن لقائها مع الفنانة لبلبة وتحدثت عن كواليس فيلم “عصابة الماكس”.
كلمينا عن كواليس فيلم عصابة الماكس؟
الكواليس كلنا كنا حاسين إننا رايحين رحله مدرسية، يعني بنصحى من الفجر نحضر اللبس اللي هنلبسوا وبننزل كلنا بكل حب، وفريق العمل نفسهم دمهم خفيف، فا محسناش إننا بنعمل شغل، بس الشغل كان في مجهود جامد لانه كله كان تصوير خارجي وفي صحرا وفي شوارع.
كلمينا عن كواليس العمل بالذات مع أحمد فهمي واوس اوس؟
كنا بنضحك، ومكنش في مقالب، الفيلم ده انا مش قادرة اتكلم عن دوري عشان انا دوري هيكون مفاجئة الناس لو عرفته من دلوقتي مش هينفع، لازم يتفرجوا عليه ويشوفه، الدور مش انا يعني انا لابسه شخصية معينه وبمثل الشخصية ده، في بعض الحاجات ممكن دمها يكون خفيف، احنا كنا بنضحك اصلا منغير انا نصور ، فريق العمل كلهم كانوا دمهم خفيف زي اوس اوس وفهمي وروبي، والفيلم ده مش هقدر انسى ذكرياته.
احنا اشتغلنا حوالي 3 شهور وكان شغل جامد بنصحى من 4 الفجر نعمل الميكب وبنطلع مبسوطين عشان بنشتغل حاجة جديدة، وفكرة جديدة ودمها خفيف، وأتمنى انه يعجب الناس.
الفرق بين السينما الشبابية دلوقتي وزمان وشايفاها ازاي؟
الأتنين حلوين سواء السينما زمان او دلوقتي لان زمان برضوا مكانش في التكنولوجيا ده برضوا لكن كانوا بيعملوا أفلام مهمة وكانوا بيعملوا أفلام كويسة وأفلام قديمة، لكن دلوقتي في تكنولوجيا تقدري تطلعيها فوق في السما وتنزلي وكل ده بيتعمل بزر أو أكثر، والناس تحس ان الفنان بيطلع وينزل بسبب التكنولوجيا الجديدة.
أكتر فيلم ليكي من زمان لما بتكوني مضايقة بتتفرجي عليه؟
أنا عاملة حولي 93 فيلم فا انا بحب أشوف نفسي وانا طفلة لإني برجع بذكرياتي إني كنت إزاي وانا طفلة، بحب جدًا اتفرج على فيلم ليلة ساخنة لأن الفيلم ده عزيز عليا وخد فيه 13 جائزة كأحسن ممثلة في مصر والخارج. انا دايما بختار مش بشتغل دور انا مش حابة بالعكس انا بحب اشتغل دور عرفاه ومتمكنة منه ودوري في الفيلم ده دور “نجوى” أنا حابيته واتحديت نفسي فيه لانه مختلف عن أي دور عملته قبل كده.
