✍️نورهان مجدي الغنام
دخلت إسراء كارم مجال الإذاعة والراديو منذ سنوات وكانت بدايتها صحافية في مؤسسة “أخبار اليوم ” إلى أن أستكملت حلمها وأصبح لها مكان واسع داخل مجال الراديو والتلفزيون وكانت لمجلة هافن حوار خاص معاها.
كلمينا عن نفسك؟
أنا إسراء كارم، بشتغل في المجال الإعلامي من حوالي ١٢ سنة بدأت بمجال الصحافة في مؤسسة أخبار اليوم واللي أكيد كانت البداية واللي اتعلمت فيها وأضافت ليا كتير، والحمدلله قدرت أعمل اسم كويس في مجال الصحافة، وبجانب ده اتعرفت بشغلي في مجال العلاقات العامة والماركتينج والتعليق الصوتي، وخصوصًا إني كنت بعمل إعداد وإخراج وسكريبت لبرامج مختلفة، لحد ما وصلت للإذاعة.
ازاي بدأت في مجال الإذاعة؟
من وأنا صغيرة كنت دايمًا بحب أمسك أي حاجة كإنها مايك وأعمل نفسي مذيعة، وكنت غاوية تغيير أصوات وأقلد المذيعين والشخصيات الكارتونية، وبقى الحلم الأكبر بالنسبالي هو إني لما أكبر أبقى مذيعة، اشتغلت حاجات كتير بس فضل الأقرب لقلبي التعليق الصوتي، لحد ما عرض عليا رئيس راديو ٩٩ إف إم، الإعلامي الأستاذ أحمد شبانة، الانضمام لفريق عمل القناة، ورغم خوفي في الأول من فكرة إني مبقاش على طبيعتي قدام المايك، إلا إني بعد أول يوم تجربة حسيت إني لاقيت نفسي والموضوع ممتع جدًا وخصوصًا إني بحقق حلم الطفولة.
أول برنامج قدمتيه؟
أول برنامج كان فيديو في بوابة أخبار اليوم تجارب اجتماعية مختلفة، أما في الإذاعة فكان برنامج “تيجي نتفاهم” واللي بقدمه مع زميلتي الإعلامية شيرين بكر، وهو من حياتنا ومواضيع بيعيشها كل الناس مش مقتصرة على فئة معينة، والحمدلله عمل صدى كويس والناس عرفتني أكتر منه.
مين اللي شجعك انك تدخلي المجال ده؟
أهلي وأصحابي طول الوقت كانوا بيشجعوني إني أدخل مجال الإذاعة من سنين مش من دلوقتي، ولما بدأت عملت ده بشكل مفاجىء ليهم كلهم، لكن حقيقي تفاعلهم وتشجيعهم حفزني أكتر، وخصوصًا إن بقى في متابعين بشكل دايم للبرنامج وعلى طول بيشاركوني بآرائهم ومن فترة اتفاجئت بمتابع للبرنامج عاملي أغنية بإسمي عاملها بالذكاء الاصطناعي، غير المتابعين اللي كانوا حريصين ينشروا مقاطع من البرنامج.
هل حابة إنك تدخلي مجال التمثيل؟
يمكن وأنا صغيرة كنت بفكر في الموضوع ده جدًا، لما كبرت شوية حسيته مش شبهي حتى لو بحبه، بس يمكن بتمنى الفترة الجاية أكون مذيعة تليفزيون وأقدم برنامج مميز ومختلف يأثر في الناس، ومين عارف بكرة مخبي إيه.
